Áfram Katla!

Magnús Tumi Guðmundsson sagði í Kastljósi áðan að meiri líkur en minni væru á því að næsta Kötlugos verði lítið eða miðlungsgos fremur en stórt. Vísaði hann eingöngu til sögunnar í þessu tilliti. Svona fjórða hvert Kötlugos væri stórt en hin ekki.

En Magnús Tumi veit bara ekkert um þetta fremur en aðrir, til dæmis ég eða vor ástsæli forseti. Á átjándu öld komu tvö stórgos í Kötlu í röð, 1721 og 1755 og næsta gos þar á undan, 1660, var líka ansi drjúgt. Og ekki síður gosið þar á undan, 1625.

Hins vegar mun þjóðin líklega spjara sig í næsta Kötlugosi eins og öllum öðrum.

Annars eru spekúkúkasjónir um það að virkni fjallsins fari minnkandi  því síðustu aldir hefur það gosið sjaldnar en næstu þúsund árin þar á undan. En áreiðanlega getur það samt skvett vel úr sér og ærslast all mjög. 

Og vonandi fer nú Katla gamla að gjósa sem fyrst til að leiða til lykta þessar deilur um það hvað hún ætli sér að gera.

Áfram Katla! 

 

 

Athugasemdir

[Gissur Jóhannesson (IP-tala skráð) 28.4.2010 kl. 21:49]

Hvar í ósköpunum  í veröldinni ert þú staddur mannfýla að óska eftir Kötlugosi þú veist nú lítið hvað þú ert að tala um.                             Ég er rúmlega áttræður karl sem hef haft Mýrdalsjökull með Kötlugjá daglega fyrir augunum frá því ég man eftir mér. Ég eins og fleirri sem eiga hér heima vitum að Katla getur komið hvenær sem er hún gæti þessvegna komið á morgun  eða eftir 10 ár eða 20 eða 100 ár Vestmannaeyjargosin komu eftir 5000 ár að talið var. Vonandi sefur Katla sem lengst. Það sem breyst hefur frá fyrri Kötlugosum er að með nútima tækni er  hægt að fylgjast með hverskonar jarðhræringum sem þar verða í Mýrdalsjökli. Ég þekki Mýrdalssand mjög vel,það má segja að núna um 90 árum eftir Kötlugosið 1918 sé sandurinn orðin það gróinn að hann er hættur að fjúka ef vind hreifir.

Ég þekkti marga menn sem til voru í Kötlugosinu 1918 þeir sögðu mér margt um Kötlugosið og það umhverfi sem hér var fyrir það. 

[Sigurður Þór Guðjónsson, 28.4.2010 kl. 22:22]

Er ekki illu best aflokið? Það mun gjósa. Það er ósköp óraunhæft að vona að Katla gjósi ekki sem lengst. Það er bara tilgangslaus bjánaskapur og svona álíka eins og að taka allt bókstaflega sem sagt er. Allar óskir í þessu sambandi eru reyndar tilgangslausar. Náttúran fer sínu fram. Orð mín, sem eru kannski kaldhæðnisleg, ber auðvitað að skilja sem ábendingu um það að náttúran muni sjálf svara því hvort næsta gos í Kötlu verður mikið eða lítið. En hvar í ósköpunum hefur þú karlskratti lært mannasiði þegar þú ávarpar ókunnuga menn?

[Lára Hanna Einarsdóttir, 28.4.2010 kl. 23:47]

Mér hlýnar um hjartarætur þegar ég sé svona yfirskrift: "Áfram Katla!" Þú veist af hverju... 

[Sigurður Þór Guðjónsson, 28.4.2010 kl. 23:57]

Voff!

[DoctorE (IP-tala skráð) 29.4.2010 kl. 10:24]

Gissur ætti að vera nægilega gamall til þess að skilja að óskir virka ekki... alveg eins og bænir, sem eru einskonar óskir furðufugla sem eru ekki sáttir við plan galdrakarlsins ógurlega.

Ég óska þess að lofsteinn komi á jörðina, að sólin brenni út, að supernova springi við hliðina á okkur, að ég vinni í lottó og verði skrilljóner...
Þarna eru einhverjar óskir.. sem vel gætu gerst; Það að ég óski þessa breytir engu til með hvort þetta gerist eða ekki.

Áfram Katla, áfram lofsteinar og hinu ýmsasta bömmer ;)

[Vilhjálmur Örn Vilhjálmsson, 29.4.2010 kl. 10:27]

Þú segir þetta ekki rétt. Allah stjórnar gosum og stærð þeirra á öllum tímum, sbr. þetta: http://postdoc.blog.is/blog/postdoc/#entry-1048789 Svo það er áfram Allah! Kötturinn hans DoktorEs er að reyna að segja okkur þetta.

[Njörður Helgason, 29.4.2010 kl. 10:43]

Kötlugos eru vond fyrir land og þjóð. Sem betur fer hafa ekki verið mikil dauðsfólk manna í þeim. Reyndar dóu tveir menn af voldum eldinga á nítjándu öldinni í Skaftártungu.

Ég held að staðan sé sú í dag að gos eins og Eyjafjallajökulsgosið og þá Kötlugos. Þeytigos sem senda gosefnin um alla álfuna séu verst fyrir flugið í Evrópu. Það er það versta.

[Sigurður Þór Guðjónsson, 29.4.2010 kl. 12:09]

Hér eru mættir tveir af mestu hamfarabloggurum allra tíma, postdoc og Doctor E. Og svo mamma hennar Kötlu. Það er ekki að furða þó kisan gapi alveg af undrun og skelfingu!  

[Höskuldur Búi Jónsson, 29.4.2010 kl. 12:24]

Það er víst svo með flest eldfjöll að það er hagstæðast fyrir okkur mennina (sem búum í næsta nágrenni við þau) að þau gjósi sem oftast - því það er yfirleitt þannig að því lengra sem að líður á milli gosa, því öflugri verða þau. Það er allavega reynslan - því fyrr því betra.

Hitt er annað að ef maður er í hárri elli, þá vill maður kannski að það frestist um nokkur ár, svo maður sleppi sjálfur við afleiðingarnar (en einhverjir aðrir verða þá að taka afleiðingunum - sem verða mögulega verri).

[Sigurður Þór Guðjónsson, 29.4.2010 kl. 12:38]

Því lengra sem líður milli gosa því öflugri gos. Þetta lúrði líka á baki orða minna. Vonandi gýs þá Katla sem allra fyrst!

[DoctorE (IP-tala skráð) 29.4.2010 kl. 13:02]

Það bjargaði ekki Tiger Woods... gaus aðeins of oft ;)

[Kama Sutra, 29.4.2010 kl. 17:20]

Meiriháttar krúttleg kisa.

[Þórir Kjartansson, 29.4.2010 kl. 18:15]

Viðtalið við Magnús Tuma í gærkvöldi er nú skynsamlegasta umræðan sem ég hef séð um þessi mál til þessa.  Kom mér reyndar á óvart að hann skyldi telja gosið 1721 til meðalgosa.  Þá kom sennilega stórkostlegasta vatnsflóð sem komið hefur úr Kötlu þó gjóskan hafi verið minni en í stórgosinu 1755.  Og þar af leiðandi held ég að  hún sé hæpin, kenningin um,  að því lengra sem líður á milli gosa séu þau  stærri.  Og Njörður, það var í gosinu 1755 sem Jón hreppstjóri í Svínadal og vinnukona hans létust í eldingu af völdum gossins.  Það eru einu skráðu dauðsföllin  í Kötlugosum síðan  1625 þegar Þorsteinn Magnússon skráði fyrstu áreiðanlegu heimildirnar  sem til eru um Kötlugos. Þórarinn Öfjörð, Páll prestur og Benedikt skáldi drukknuðu að vísu í Kötlukvísl á Mýrdalssandi haustið 1823 en þá var gosinu sjálfu lokið fyrir tveimur mánuðum.  Aftur á móti er næsta víst að manntjón hefur orðið þegar Lágeyjarhverfið sem var á milli Hjörleifshöfða og Álftavers eyddist 1311.  En um það er ekkert til nema óljós munnmæli.  

[Sigurður Þór Guðjónsson, 29.4.2010 kl. 18:35]

Sammála því að þetta var skynsamleg umræða í sjálfu sér en við vitum samt ekki mikið um hvernig næsta gos verður. Og það er ekki einhlítt að eftir langt goshlé komi mikið gos. Eftir 80 ára hlé kom lítið gos 1580.

[Geir Rögnvaldsson (IP-tala skráð) 29.4.2010 kl. 21:40]

Eins og ég hef áður sagt hér á netinu á öðrum stað þá mun Katla ekki gjósa í þessari umferð. Forseti vor hefur spáð því að hún gjósi og hann hefur haft rangt fyrir sér í 93,8% tilvika undanfarið ár. Ergó Katla gýs ekki !!!

[Njörður Helgason, 1.5.2010 kl. 17:08]

Já ég nennti ómögulega að fletta þessu upp. Ánægjulegt ef fólk les villurnar.