Snjólaust í Reykjavík og hiti yfir meðallagi

Þegar janúar er hálfnaður er hitinn í Reykjavík 0,9 stig yfir meðallagi. Og í morgun var jörð þar talin alauð samkvæmt reglum en þær líta framhjá klakabunkum og snjólænum. Síðar i dag fór reyndar að snjóa. 

Það er því ekki hægt að segja að þessi janúar sverji sig alveg í ætt við desember sem sannarlega var ansi kaldur og einstaklega snjóamikill.

Framundan eru þó því miður engin hlýindi. 

Úrkoman í Reykjavík er þegar komin 17% fram yfir meðaltal alls janúarmánaðar.  

 

 

Skrár tengdar þessari bloggfærslu:

• akrv_2012_1_0.xls

Næstum því algjör merkingarleysa

Borgarstjórinn sagði í kvöldfréttum Rikisútvarpsins að við búum á Íslandi. Með því vildi hann réttlæta það ástand sem ríkir víða hvað hálku varðar í höfuðborginni. Það skal játað að erfitt er við hana að eiga þegar snjóar og snjóar meira ofan í það sem fyrir er, en þessi orð eru nákvæmlega það mesta rugl sem hægt er að segja varðandi vandamál sem stafa af veðri, þó það sé reyndar oft sagt, að við búum á Íslandi.

Það getur líka snjóað heil ósköp á Norðulöndum, Rússlandi, sums staðar í Evróu, Japan, Kóreu, Kína, Íran, Norður-Ameríku og víða annars staðar á norðlægum breiddargráðum.

Íslenskt veðurfar hefur auðvitað sín sérkenni en er samt í grundvallaratriðum ekkert öðruvísi en veðurfar á norðlægum slóðum hvað varðar vandræði af venju fremur miklum snjó og ýmsum öðrum aftökum í veðri. Mestu varðar góð og skipuleg viðbrögð. Að lýsa því yfir sem skýringu eða afsökun vegna afleiðinga veðuratburða, að við búum á Íslandi, er næstum því fullkomin merkingarleysa.

 

Skrár tengdar þessari bloggfærslu:

• akrv_2012_0_0.xls

Enn bætist við hálkuna

Það er rétt hjá borgarstjóra að óvenjulega mikill snjór er nú í Reykjavík. Þetta er óneitanlega sérstakt ástand. En það gerist samt alltaf annað slagið. Og borgin hlýtur að geta brugðist við því til að tryggja öryggi borgaranna. Tugir manna hafa slasast og ekki víst að þeir vilji sýna mikinn skilning. Margar götur og gangstéttir hafa verið í óbreyttu standi í marga daga. Hitt er annað mál að borgararnir verða líka að sýna skynsemi og verja sig sjálfir.

Ég fékk mér til að mynda forláta mannbrodda og hleyp um allt eins og ólmur kálfur!

Nú mun enn bæta við snjó næstu daga.  

Spáð er hláku á föstudaginn en það þarf mikla og langa hláku til að leysa allan klakann.

Í verstu tilfellum getur svona ástand varað í nokkrar vikur.  

 

Borgarstjóri biður um skilning

Skrár tengdar þessari bloggfærslu:

• akrv_2012_0.xls

Ástand gangstétta til skammar og skaða

Í þessari frétt, sem vísað er til, er eingöngu litið á málin frá sjónarhóli bílanna. Slysahætta geti skapast fyrir bifreiðar.

Ekki er minnst á það að ástand gangstétta, til dæmis í gamla bænum, hefur aldrei verið verra í manna minnum. Þær hafa lítið verið ruddar og ekki einu sinni hirt um að setja sand á þær. Gangséttirnar eru einfaldlega stórhættulegar. Gangandi fólk hefur samt reynt að troða snjóinn því það þarf að komast leiðar sinnar í brýnum erindum og hafa því myndast margar raðir af fótsporum. Þær hafa síðan frosið og eru gangstéttirnar allar í hólum og hæðum og yfir að fara eins og  versta apalhraun. Og þetta er ekki hægt að laga úr því sem komið er. 

Aðeins löng og sterk hláka getur hreinsað gangstéttirnar og hún er alls ekki í sjónmáli. Fremur mun snjóa  og myndast þá snjólag sem hylur flughálkuna undir niðri og gerir gangstéttirnar að sannkölluðum slysagildrum. Svona verða þá gangstéttirnar jafnvel bara langt fram á vetur. Það er alveg með ólíkindum að slíkt sé látið gerast. 

Að ekki sé svo minnst á snjóhraukana meðfram öllum gangstéttum sem gera fólki næstum því ókleift að fara yfir göturnar. Meira að segja hefur ekki verið hirt um að gera skarð í hraukana þar sem merktar gangbrautir eru yfir akvegi við umferðarljós. Gangandi menn geta hæglega runnið til þegar þeir eru að klungrast þar yfir og bíða eftir réttu ljósi og dottið út á akbrautina beint fyrir framan næsta akandi bíl.

Þetta vinnulag er fyrir neðan allar hellur og ótrúlegt að slíkt geti komið upp í höfuðborg eins ríkis. 

 

 

 

Ruðningurinn skapar slysahættu

Ósýnilegi maðurinn

Ekki hafa komið veðurskeyti inn á vef Veðurstofunnar, að ég held, það sem af er ársins frá Reykjum í Hrútafirði og Hrauni á Skaga. Manni dettur nú í hug hvort veðurathuganir hafi lagst þar niður um áramótin eða hvort þetta er aðeins tímabundið. Hins vegar hafa komið snjódýptarmælingar frá Hlaðhamri við Hrútafjörð. Þar hafa lengi verið gerðar veðurfarsathuganir.

Mér finnst að þegar veðurstöðvar hætta eigi að tilkynna það á  vef Veðurstofunnar. 

Mælingar frá úrkomustöðvum koma áfram ansi stopult inn á  vefinn. Það er bagalegt þegar stöðvar gefa upp svo mikla snjódýpt t.d. einn dag að hún er sú mesta á landinu en svo heyrist ekkert frá þeim marga næstu daga og enginn  veit hvar mesta snjódýpt hefur mælst á landinu.

Alla tíð hafa veðurstofustjórar verið talsvert áberandi í íslensku þjóðlífi og komið opinberlega fram á ýmsan hátt, skrifað greinar og veitt viðtöl og meira að segja séð um sjónvarpsveðurfregnir, oft glaðir og hýrir í bragði.

Mér skilst að einhvers konar veðurstofustjóri sé enn við lýði. En hann heyrist aldrei nefndur og kemur aldrei opinberlega fram. Ekki veit ég hver hann er. 

Veit það nokkur? 

Af er að minnsta kosti sú tíð að veðurstofustjóri njóti vinsælda og virðingar meðal veðurnörda og almennings.

Nú er hann bara ósýnilegi maðurinn.

En hvað um það. Fylgiskjalið alræmda sem hefur verið ósýnilegt það sem af er ársins er nú allt í einu orðið sýnilegt hér á bloggsíðunni, Reykjavík og landið á blaði 1 en Akureyri á blaði 2. -

Já, hvar annars staðar en á anarkistaveðursíðunni Allra veðra von?! 

 

Skrár tengdar þessari bloggfærslu:

• akrv_2012.xls