Slær júlí hitamet í Reykjavík

Meðalhitinn í Reykjavík það sem af er júlí er 13,4 stig sem er 3,2 stig yfir meðallagi. Ef mánuðurinn héldi þessari tölu til mánaðarloka myndi hann verða hlýjasti júlí sem mælst hefur. Sá hlýjasti hingað til var júlí 1991 upp á 13,0 stig en 14,0 fyrstu 10 dagana. Ég held að okkar júlí sé sá næst hlýjasti miðað við 10. júlí.

Allra veðra von býður nú hysterískum aðdáendum sínum upp á það að fylgjast með frammistöðu þessa júlímánaðar á meðfylgjandi fylgiskjali sem verður uppfært mjög þétt og reglulega.- Ef ég dett þá ekki dauður niður í miðjum klíðum.  Frown

Þarna má sjá gang hitans í höfuðborginni á þriggja klukkustunda fresti allan sólarhringinn en auk þess lágmarks-og hármarkshita (reynt er að miða við miðnætti) hvers sólarhrings og meðalhita. Þá er úrkoman sem mælist frá kl. 9 þann dag sem um ræðir til kl. 9 næsta dag. Úrkoma er alltaf mæld kl. 9 og hefur því í rauninni fallið að mestu daginn fyrir dagsetninguna sem gefin er upp í hefðbundnum veðurupplýsingum. En við höfum þetta svona. Úrkomudálkar eru auðir þegar ekkert  hefur fallið en 0,0 stendur þegar ''úrkoma var svo lítil að hún mældist ekki''. Þá er sólskin sem mælist á degi hverjum. Loks er hægt að sjá mesta hita sem mælst hefur hvern dag á landinu og lágmarkshita á stöðvum á láglendi en auk þess á Grímsstöðum, Möðrudal, Mývatni, Brú á Jökuldal, Svartárkoti og Hveravöllum. Ég hef þessar stöðvar með vegna þess að gegnum árin hafa lágmarkstölur birst frá þeim meðan þær voru mannaðar (nema hvað Svartárkot er ný stöð en þar er enn  byggð). Hitinn  á þeim er því góður til viðmiðunar við fyrri ár en ég sé ekki ástæðu til að vera eldast við lágmarkshita upp um öll fjöll en þar eru nýlega komnar stöðvar út um allt. Loks er dálkur sem sýnir útjafnaðan (ég vil nú ekki segja útvatnaðan en þetta eru leiðinlega lágar tölur) sólarhringsmeðalhita hvers dags í Reykjavík yfir mörg ár.

Upplýsingar um sólina gætu orðið til vandræða því þær eru inni á vef Veðursstofunnar aðeins stutta stund á degi hverjum og get ég feilað þar um. En skítt með það! Við gerum okkar besta.

Allar eru frumupplýsingarnar náttúrlega sóttar á veðurvef Veðurstofunnar, en hér raðað saman,  og ætti eitthvað svona einmitt að vera á þeim góða vef!

Því miður hef ég ekki yfir þeim forritum að ráða til að gera flott línurit, bara ljót og  leiðinleg. Þess vegna get ég enn ekki boðið upp á slíkt.

En hér getum við fylgst með því á Allra veðra von (já, hvar annars staðar?!) hvort júlí í Reykjavík setur hitamet. Vonin er reyndar ekki sérlega sterk miðað við spár til 20. júlí en ekki vonlaus  ef  t.d.  gerir hitakast í lok mánaðarins líkt og í upphafi hans. Það gerðist einmitt í júlí 1991.

Viljiði annars veðja hvort júlí nái 13 stigum í Reykjavík? Ég veðja sáluhjálp minni.Halo Devil Hverju viljið þið til kosta?

Þessi færsla verður hér uppi til mánaðarloka en færist kannski efst undir Síður ef ástæða verður fyrir meira spennandi veðurblogg á næstunni. En fylgiskjalið verður alltaf með nýjustu framvindu mála.

Þetta er ekki síður spennandi en gullmótin í frjálsum íþróttum. Tekst júlí 2009 að næla í gull í Reykjavík?


Skrár tengdar þessari bloggfærslu:

Athugasemdir

1 Smámynd: Einar Sveinbjörnsson

Mánuðurinn er búinn að vera jafn og góður eins og þú bendir réttilega á.  Vissulega væri gaman að endurtaka leikinn frá 2003 en til þess að svo verði má engan skugga bera þar á.  Til þess að setja met í Reykjavík má hitinn helst ekki stíga eitt  hlðarspor allan mánuðinn. 

Spáð er hedur kólnandi veðri  með NA- og N-átt og þó ekki verði hægt að tala um kuldatíð eins og verst getur orðið um mitt sumar mun engu að síður kólna strax eftir helgi í um 2 til 3 daga. Líka suðvestanlands, þó svo að sólarhringshitinn ætti að hanga í 10 til 11 stigum.  Vissulega gæti alvöru hitabylgja segjum síðustu 10 dagan bjargað því sem bjargað verður !

En það er fekar að úrkoma verði minni en venja er.  Samanlögð er hún um 5 mm þessa 10 fyrstu dagana.  Hálf öld er frá úrk. innan 15 mm í júlí í Reykjavík (1958).  Meira að segja 2007 þegar umferðareyjar sölnuðu og urðu heiðgular mældist úrkoman 33mm í júlí.

ESv 

Einar Sveinbjörnsson, 11.7.2009 kl. 19:59

2 Smámynd: Emil Hannes Valgeirsson

Við erum væntanlega að tala um júlí 1991 en ekki 2003.

En miðað við spárnar næstu daga þá ætti 13 stiga hitinn ekki að nást en ég ætla samt ekki að éta hattinn minn upp á það. „Wetterzentralinn“ virðist allavega bjóða upp á góðviðri út mánuðinn hér suðvestanlands.

Emil Hannes Valgeirsson, 12.7.2009 kl. 00:26

3 Smámynd: Sigurður Þór Guðjónsson

Við sjáum til hvað þetta varðar!  Trú, von og heitur kærleikur er það sem gildir! Það held ég nú. Það er nú líkast til. 

Sigurður Þór Guðjónsson, 12.7.2009 kl. 00:40

4 Smámynd: Marta Gunnarsdóttir

Ég er farin að þrá rigningu. Hitinn er kæfandi og það sést ekki fyrir endann á honum..................ennþá.

Marta Gunnarsdóttir, 12.7.2009 kl. 01:12

5 Smámynd: Sigurður Þór Guðjónsson

Mér finnst einkennilegt þegar Íslendingar fara að kvarta um hita svo sjaldgæfur sem hann er. Nú er ekki einu sinni hitabylgja, bara hlæyindi. Þegar veðurathugunarmaðurinn á Kirkjubæjarklaustri hafði skráð 29 stiga hita tvo daga í röð í byrjun júlí 1991 var viðtal við hann í blaði þar sem hann bað um 12 stiga hita og rigningu. Hana fékk hann oo hefur almennilegur hiti ekki komið síðan á Klaustri. Maðurinn skildi engan vegin þann veðurfarslega merka atburð sem var að gerast.

Sigurður Þór Guðjónsson, 12.7.2009 kl. 10:30

Innskráning

Ath. Vinsamlegast kveikið á Javascript til að hefja innskráningu.

Hafðu samband