Misstum við af einhverju?

Hvað svo sem segja má um mótmælin í dag spyr ég: 

Misstum við af einhverju sem máli skiptir þegar lokað var á þessa ömurlegu formenn stjórnmálaflokkana sem flestir eru búnir að fá sig fullsadda af? 

Sjónarvottar eins og Salvör Gissurardóttir gera nú ekki mikið með ''ofbeldi' mótmælenda. Það er alveg með ólíkindum að lesa ofsa og illyrði sumra sem blogga um þetta í dag en voru ekki á staðnum. Sannkallað ofbeldi í orðum!

Af þessari frétt ætti að vera ljóst að það var lögreglan sem átti upptökin að átökunum. 

Nafn mitt er Sigurður Þór Guðjónsson

Já, það heiti ég svo sannarlega. Og ég er eini Íslendingurinn sem ber það nafn. Ég heiti ekki Sigurður  Guðjónsson þó það nafn standi í Þjóðskránni við nafnnúmer mitt, einungis vegna þess að ekki var pláss fyrir allt nafnið í tölvunni hjá þeirri stofnun.

Ég skrifa nafn mitt alltaf sem Sigurð Þór Guðjónsson og það er nafnið sem allir aðrir tengja líka við mig.

Ég get ómögulega viðurkennt annað nafn á mér, hvorki í einkalífi eða á opinberum vettvangi enda er þetta mitt raunverulega nafn.

Þar af leiðir að ég get ekki ábyrgst orð mín í fjölmiðlum eða annars staðar nema undir mínu eigin nafni. Ég hef líka gert það vandræðalaust, hvað svo sem stendur í Þjóðskránni,  á öllum vettvöngum, þar með talið fyrir Hæstarétti.

Nöfn manna eru hluti af þeim sjálfum sem ekki er hægt að svipta þá gegn vilja þeirra með einhverjum reglum. Réttur minn til nafns míns hlýtur að vega þyngra en tölvutakmarkanir Þjóðskrárinnar eða reglufesta Morgunblaðsins.

Ég vona að ég verði ekki látinn gjalda þess á neinn hátt hjá Morgunblaðinu og undirstofnunum þess, svo sem blog.is, þó ég vilji einungis kannast við ábyrgð orða minna undir mínu eigin nafni.  

Veðurdagatal fyrir allt árið

Hér birtist eins konar veðurdagatal fyrir alla daga ársins hvað varðar meðalhita sólarhringsins, hámarks- og lágmarkshita, sólarhringsúrkomu og daglegar sólskinsstundir í Reykjavík, ásamt hámarks-og lágmarkshita á öllu landinu. Þetta sést á fylgiskjalinu en þarf dálítilla skýringa við.

Lengst til vinstri er mesti og minnsti meðalhiti sólarhringsins hvern viðkomandi dag sem mælst hefur í Reykjavík frá því í september 1935 og einnig árin 1920-1923. 

Hitinn 1920-1923 sem hér er gefinn við nokkrar dagsetningar er tekinn úr dagatöflum í Íslenskri veðurfarsbók eftir þremur athugunum sólarhringsins en lagfærður að meðalhita sem síðar hefur verið reiknaður yfir allan mánuðinn. Meðalhitinn frá 1949, er opinber meðalhiti frá Veðurstofunni.

Sjálfur hef ég reiknað meðalhitann frá því í september 1935 til ársloka 1948. Frá 1941 studdist ég við 8 athuganir á sólarhring svo þar á vera kominn réttur meðalhiti. Fram að þeim tíma hafði ég einungis aðgang að fimm athugunum á sólarhring. Meðalhitann fann ég þá einfaldlega með því að leggja saman allar hitatölur hvers mánaðar og finna meðaltal þeirra og bera það saman við opinberan meðalhita hvers mánaðar eins og hann birtist í Veðráttunni og taka mið af mismuninum. Hér er EKKI hirt um flutning veðurstöðvarinnar um borgina heldur eins og hver mánuður var mældur á þaki Landssímahússins við Austurvöll á þessum árum.  

Einnig er þarna meðaltal mesta og lægsta hita sólahringsins sem kom hvern dag frá því í mái 1880 til ársloka og svo árin 1888 til 1903 en ekki raunverulegur meðalhiti en hann er ekki tiltækur fyrir þessi ár.

Loks er meðaltal hæsta og lægsta álesturs á mæli þriggja athugana frá morgni til kvölds árin 1907 til 1919 en ekki meðaltal raunverulegs hámarks- og lágmarkshita. Þessi gildi munu yfirleitt vera hærri en orðið hefði ef þau sýndu meðaltal hámarks-og lágmarks. Aðrar mælingar en þessar  voru bara ekki gerðar í Reykjavík þetta tímabil. Árin 1907-1919 standa því eiginlega sér og sýna aðallega hvaða dagar voru hlýjastir og kaldastir á þessu tímabili innbyrðis en erfitt er að bera dagana þessi ár saman við dagana á hinum árunum nema einna helst allra köldustu dagana.    

Hámarks- og lágmarkshiti í Reykjavík á hverjum degi er hér allur í einu lagi alveg frá 1920 til okkar daga en síðan útaf fyrir sig frá 1880 til 1907. Ýmisar eyður eru í  þessum gangnabanka sem til er sótt og koma þau tímabil því ekki til átlita, t.d. vantar hármkshita  alveg árin 1881-1884 og nokkurn hluta ársins 1905, en lágmarkshita nokkra mánuði 1885 og 1886 og frá því  í október 1903 og fram í janúar 1907. Ýmsar aðrar skemmri eyður eru hér og þar. Tölurnar frá 1880 til 1907 eru af sírita en ekki kvikasilfursmælum og þess vegna ber þeim ekki alveg saman við minnsta hita sem mælst hefur  nokkru sinni í þessum mánuðum á kvikasilfursmæla og sést í þessari töflu.  En þetta eru aðeins örfá tilvik hér í töflunum.

Og svo er það líka sér á parti sem hæst og lægst var lesið á mæli  á athugunartímum 1907 til 1919.

Það tíðkast í Veðráttunni frá 1957, mánaðarriti Veðurstofunnar, að skipta á milli sólarhringa kl. 18 hvern dag. Þess vegna ber það stundum við að hiti kl. 18 einhvern dag, t,d, 20 stig , verður skráð sem hámark næsta dag þó hitinn hafi þá  frá morgni til kvölds ekki farið hærra en í 12 stig. Hér hefur verið reynt að sjá við þessu, bæði fyrir Reykjavík og allt landið og stundum tekið mið af hitaskrám  frá kl. 9-18 eða 18-9 en ekki eingöngu hitaskrám kl. 18-18 eins og gert er í Veðráttunni,  en  til eru þessar þrjár tegundir af skrám. Þetta er samt ekki alltaf auðvelt, ekki síst að vetrarlagi (þegar þetta atriði skiptir reyndar minna máli) og má búast við einhverju misræmi og álitamálum (sem fáir munu þó af vita!). Hámarkshitatölur og lágmarks hafa hins vegar aldrei verið til frá miðnætti til miðnættis þangað til sjálfvirku stöðvarnar byrjuðu. Allt er þetta spurning um hvenær eðlilegast er að skipta sólarhringnum en 18-18 er ekki heppileg skipting fyrir þann tilgang sem býr að baki birtingar þessa dagatals fyrir alþýðu vora (svo maður noti nú gamaldags og virðuleggt orðalag!!).  Varðandi lágmarkshitann á landinu eru ekki taldar með nokkrar hálendisstöðvar í óbyggðum sem störfuðu í aðeins fáein ár en hins vegar Hveravellir þar sem athuganir voru hátt í hálfa öld. 

Í sérdálkum er dreginn út mesti og minnsti hiti á kvikasilfursmæli sem vitað er um hvern dag á landinu frá 1920.    

Sólarhringsúrkoman er í tvennu lagi, annars vegar frá stofnun Veðurstofunnar 1920 og áfram og hins vegar árin 1885 til 1907. Úrkoman er mæld kl. 9 að morgni og sýnir það sem fallið hefur frá  sama tíma deginum áður. 

Fjöldi sólskinsstunda er frá árinu 1923.

Mesti og minnsti hiti á öllu landinu hvern sólarhring er aðeins tiltækur frá 1949 eins og hér er sýnt. Hins vegar er bætt við í sérdálki nokkrum stökum gildum sem birst hafa sem hámark eða lágmark alls mánaðarins í Veðráttunni eða Íslenskri veðurfarsbók  fyrir einstakar veðursstöðvar í hverjum mánuði á árunum 1920-1948 og eru hærri eða lægri en  nokkur dagsgildin frá 1949. Sömuleiðis eru birtar tölur í sérdálki frá sjálfvirkum stöðvum frá 1995 ef þau eru hærri eða lægri en önnur gildi.  

Í flipum sést þegar um fleiri en eina dagsetningu er að ræða. 

Útgildi í öllum dálkum eru auðkennd með lit eða dekkra letri svo auðvelt verði að finna þau.  

Villur geta verið hér á sveimi en þær verða leiðréttar undir eins og upp um þær kemst.

Opnið fylgiskjalið til sjá veðurdagatalið. Munið að hægt er að skrolla skrána upp og niður og til hliðanna!

Heimildir: Íslenzk veðurfarsbók, 1920-1923, Veðráttan 1924-2006, Veðurfarsyfirlit 2006-2009, vefsíða Veðurstofunnar, ýmis gögn frá Veðurstofunni.  

       

Skrár tengdar þessari bloggfærslu:

• dagatalvedur.xls

Opið bréf til umsjónarmanna Moggabloggsins

Ég blogga ekki undir dulnefni heldur einmitt mínu rétta nafni. Eigi að síður hefur mér hefur borist eftirfarandi tilkynning inn á stjórnborðið á bloggsíðu minni.

''Nafnið sem þú gefur upp á blogginu þínu er ekki það sem sama og skráð er í Þjóðskrá. Í henni er skráð nafnið Sigurður Guðjónsson. Vegna þeirra breytinga sem fyrirhugaðar eru um áramótin á blog.is getur þú því ekki bloggað um fréttir mbl.is nema að þetta nafn sé birt sem nafn ábyrgðarmanns á blogginu þínu. Auk þess birtast bloggfærslur ekki á forsíðu blog.is nema nafnið sér birt.

Ef ábyrgðarmaður er birtur, má sjá hann með því að smella á mynd af höfundi, sem alla jafna má finna í dálkinum Um höfundinn á bloggi viðkomandi.

Ábyrgðarmann má einnig birta og fela að vild efst á síðunni Stjórnborð --> Stillingar --> Um höfund.''

Hér finnst mér reglufesta umsjónarmanna Moggabloggsins verða einum of einstrengileg. Um mig er fjallað eins og ég skrifi undir dulnefni og reyni að skirrast við því að bera ábyrgð á bloggfærslum mínum.

Ég var skírður Sigurður Þórarinn Guðjónsson og í einu uppflettiriti um þekkta Íslendinga má sjá það nafn í þessu formi Sigurður Þórarinn Guðjónsson og það er það nafn sem ég hef notað frá 1980 í virðingarskyni við Þórönnu ömmu mína þaðan sem Þórs-nafnið er komið, en áður nefndi ég mig aðeins Sigurð eins og mér var innrætt frá barnæsku. Tölvukerfi Þjóðskrárinnar rúmar hins vegar ekki, að minnsta kosti fram á síðustu tíma, svona langt nafn. Þess vegna var það stytt í opinberri útgáfu Þjóðskrárinnar. Fullt nafn mitt er þó skráð hjá Þjóðskránni og myndi koma fram á skírnarvottorði.

Ég hef kosið að stytta millinafn mitt eins og alvanalegt er og skrifa mig þess vegna Sigurð Þór sem fer reyndar einkar vel og er orðið mér -  og öðrum - alveg ingróið, hluti af sjálfsmynd minni. Það er ekki dulnefni heldur stytting á skírnarnafni mínu og ég hef löglegan rétt  að skrifa það alveg eins og ef ég skrifaði mig t.d. Sigurð Þ. Guðjónsson. Þjóðskráin rúmaði ekki  eini sinni Þórs nafnið en bauð mér upp á eitt Þ. en ég valdi að sleppa því. Ég læt hins vegar ekki tölvutakmarkanir Þjóðskrár og blog is. í sameiningu þröngva mér til að nota ekki löglegt skírnarnafn mitt í lítið eitt styttri mynd. Þetta mál er sem sagt stærra en svo að það snerti einungis blog.is. Það er almenns eðlis og snertir í raun og veru alla landsmenn hvað nafnréttindi þeirra varðar.

Ég hef verið þekktur undir nafninu Sigurður Þór Guðjónsson í áratugi meðal þjóðarinnar. Kennitala sú sem ég hef gefið upp til Morgunblaðsins vegna bloggsins ber saman við kennitölu Sigurðar Guðjónssonar á Þjóðskrá, sem ekki fékk fullt nafn sitt birt þar.

Ég vænti þess að forsjármenn Moggablaðsins taki tillit til þessara staðreynda og svipti mig ekki þeim rétti mínum að geta bloggað við fréttir og birtast á forsíðu blog is. fyrir það eitt að villa EKKI á mér heimildir.

En ég læt ekki þröngva mér til að láta aðeins nafnið Sigurð Guðjónsson birtast með þessari ágætu mynd sem er af mér á bloggsíðu minni. Enginn blogglesandi kannst við það nafn á mér. Þá væri ég sannarlega farinn að villa á mér heimildir.  

Tilkynningin frá Moggablogginu barst mér í dag, daginn fyrir gamlársdag. Það er því nær ekkert svigrúm til viðbragða fyrir hátíðarnar en aðgerðir Moggabloggsins gegn þeim sem skrifa undir dulnefni koma til framkvæmda á nýjársdag. Mér finnst þetta mjög tillitslaust að gefa svona litinn frest. Ég reyndi að hringja í Árna Matthíasson en  hann er ekki við á blaðinu í dag. Vegna tímahraksins gríp ég því til þess ráðs að skrifa umsjónarmönnum blog. is þetta bréf.

Ég vona að þeir hjá Morgunblaðinu átti sig á eðli þessa máls og meðhöndli mig ekki eins og ég riti undir dulnefni og svipti mig ekki þeim rétti að geta bloggað við fréttir og birtast á forsíðu blog.is.

Þess má geta að ég er eini maðurinn á landinu sem ber nafnið Sigurður Þór Guðjónsson svo ég fæ ekki dulist en nokkrir heita Sigurður Guðjónsson.

Ég hef alltaf borið fulla ábyrgð á skrifum mínum og skrifa undir réttu og löglegu nafni.   

 

Bókmenntaviðburður!

Á gamlársdag verður birt hér á þessari sjóðheitu bloggsíðu hvorki meira né minna en veðurdagatal fyrir allt árið.

Bara að skrolla upp og niður! Þá birtist viðkomandi dagur með alla sína veðurspeki.

Bókmenntaviðburður ársins!

Í boði Allra veðra von þar sem er allra veðra von! 

 

Landráð framin í gáleysi eru líka landráð

Þetta sagði Páll Skúlason heimspekingur í samtali við Evu Maríu í sjónvarpinu í kvöld. Þetta er djarflega mælt. Þó Páll hafi ekki verið að segja að hér hefðu einhverjir framið landráð hlýtur það samt að vera sneiðin í ljósi aðstæðna í þjóðfélaginu. Hann orðar upphátt það sem margir hugsa en kunna ekki við að segja.

Landráð eru alls staðar talin með verstu glæpum. Landráðamenn eru hvergi látnir komast upp með slíkan glæp.   

Annars verður það að segjast eins og er að viðtalið var að þessum orðum slepptum óskýrt og sviplítið.  

 

Frábært veður

Veðrið síðustu tvo daga hefur verið aldeilis frábært. Vindur hefur verið fremur hægur, úrkoma lítil og afar hlýtt. Í Reykjavík hefur hitinn verið 7-8 stig og stundum meira  samfellt í meira en sólarhring. Víðast hvar er snjólaust á landinu og aðeins á Grímsstöðum á Fjöllum er alhvít jörð. Allir vegir eru greiðfærir. 

Hitinn í þessari hrinu hefur komist í 13 stig á Sauðanesvita, skammt frá Siglufirði og yfir tíu stig á allmörgum stöðum á Vestfjörðum, miðbiki Norðurlands og á Austfjörum. 

Ástæðurnar fyrir þessari veðurblíðu er hægt að lesa hér.  Þetta gerist alloft og stundum verður svona veðurlag þrálátt, getur jafnvel varað vikum og mánuðum saman.

Við skulum vona að svo verði núna. 

Þetta veðurlag finnst mér óska jóðaveður. Ólýsanlega miklu þægilegra en kuldi og mikill snjór sem margir vilja víst hafa á jólunum. Munurinn núna og síðustu vikuna fyrir jól er ótrúlegur. 

Jólasnakk

Ég átti þessi líka fínu jól eins og fyrri daginn. Í raun og veru er ég afskaplega hátíðlegur maður, þó þess gæti ekki svo mjög á þessari bloggsíðu, og á því auðvelt með að  setja í  jólagírinn. Á aðfangadagskvöld át ég eins og svín og tók upp gjafirnar. Lá svo á meltunni á jóladag og hélt áfram að éta eins og svín. Á öðrum degi jóla var allt í sama  svínslega farinu. En á meltunni liggjandi hlustaði ég líka á jólaóratóríur margvíslegar svo ég var ekki með öllu óandlegur. Um kvöldið á öðrum í jólum sá ég í sjónvarpinu myndina Brúðgumann og fannst hún skondin en ekki sérlega skemmtileg. Og ég verð víst að móðga marga með því að lýsa því blákalt yfir að þessi mynd Kjötborg fannst mér alveg hundleiðinleg. 

Eina bók hef ég lesið um jólin: Gróðurhúsaáhrifin og loftslagsbreytingar eftir Halldór Björnsson. Það er fyrsta bók á íslensku um þetta málefni. Enga dóma hef ég nokkurs staðar lesið um bókina. Ég er að hugsa um að skrifa minn eigin dóm hér á bloggsíðunni. En það tekur einhverja daga að gera það ef ég þá geri það. 

Í þeim jólamessum sem ég heyrði var venjunni samkvæmt talað um gleði jólanna en svo var líka minnst á það, líka eftir ritúali, að jólin væru mörgum erfið vegna sorga og andstreymis sem  sumir hefðu orðið fyrir og menn upplifðu einmitt mjög sterkt um jólin. Þetta vita auðvitað allir. En það sem fór í taugarnar á mér í þessu sambandi var það að prestarnir fóru svo ekkert meira út í þetta, allt var þetta bara venjubundið hjal en þessu fólki var ekki sýndur neinn áhugi eða alúð. Allt ætlaði  aftur á móti í ræðum prestanna að öðru leyti um koll að keyra í JÓLAGLEÐI. Þeim sem voru í einhvers konar sorg um jólin var í raun bara stjakað frá, eins og alltaf er gert í jólaguðþjónustum  nema hvað þeir voru nefndir og svo var bent á Jesum Krist til að lækna þeirra mein. Skyldi aldrei neinum presti nokkurn tíma detta í hug að helga jólaræðu sinni þeim sem eru miður sín um jólin með  einhverri alvöru umflöllun í stað hefðbundins jólasnakks. Skilaboðin eru í raun og veru: Þeir sem ekki geta gleymt sorg sinni um jólin geta bara étið það sem úti frýs. Einhvern veginn svona upplifði ég þessar jólamessur, einkanlega þá sem kvenprestur einn var með í útvarpinu á öðrum degi jóla. 

 

Hér vil ég endilega skjóta inn áríðandi persónulegri yfirlýsingu: Ég vil undir engum kringumstæðum láta kvenprest jarða mig. Karlremba, segja systur mínar. En ástæðan er eingöngu persónuleg  og ég er ekki á móti kvenprestum. En konur yfirleitt hafa aldrei botnað neitt í mér, fyrir utan örfáar vinkonur mínar sem skilja allt, umbera allt og fyrirgefa allt (!), og bakað mér ekkert nema sársauka og vonbrigði. Ég vil  því ekki að kona og það prestvígð að auki hafi síðasta orðið í lífi mínu og bulli jafnvel eitthvað um mig sem karakter! Þá geng ég aftur og fylgi þeirri kvinnu og afkomendum hennar í 9. lið og gjöri þeim ófáar skráveifur, glettur og glennur!

En hvað með þá sem geta það ekki?

Spurningin er hvað gert verður við þá sem ekki geta staðið undir þessari gjaldtöku sem snýst aðallega um gjald fyrir að leggjast inn á sjúkrahús. Þeir verða þá auðvitað í fyrsta lagi auðmýktir. Og svo fá þeir víst enga læknishjálp, verða bara sendir heim. Það er nefnlega tilgangslaust  að leggja á gjöld ef menn komast upp með að neita að greiða þau. Þeir sem ekki borga fá ekki læknishjálp. Svo einfalt er það. Þetta er orðið að staðreynd á Íslandi.

Hvað segja annars læknar? Það er undarlegt að ekki hefur enn heyrst eitt einasta orð frá þeim um þessa gjaldtöku. Ekki einn einasti þeirra hefur talað.Það er bara eins og þeir séu ekki í þjóðfélaginu. 

Standa undir gjaldtöku

Hafa menn einhverju við þetta að bæta?

"Sérhver maður hlýði þeim yfirvöldum, sem hann er undirgefinn. Því ekki er neitt yfirvald til nema frá Guði, og þau sem til eru, þau eru skipuð af Guði. Sá sem veitir yfirvöldum mótstöðu, hann veitir Guðs tilskipun mótstöðu, og þeir sem veita mótstöðu munu fá dóm sinn.....yfirvöldin...... eru þjónn Guðs þér til góðs.....Þess vegna er nauðsynlegt að hlýðnast....." (Rómverjabréfið 13:1-7).

Til þessara orða var vitnað á aðfangadag af öllum dögum á einni bloggsíðu.

Hafa þeir sem verið hafa að mótmæla yfirvöldum undanfarið einhverju við þetta að bæta?