Vinsamleg tilmæli

Jæja, þá eru allir búnir að taka niður jólaljósin. Fínt er! En þá er að tendra kærleiksljósin í hjartanu (hélduði að þið slyppuð svona billega) í einum grænum og láta þau skíðloga hvað sem tautar og raular allt þetta herrans ár. 

Ætlar einhver að mótmæla þessu? Ætlar einhver að lifa hortugu og kærleikssnauðu lífi það sem eftir er ársins?

 

Athugasemdir

[Þorkell Sigurjónsson, 7.1.2008 kl. 11:24]

Sæll Sigurður.  Nú er ég í stökustu vandræðum þar sem ég vildi gjarnan fara að þínum tilmælum og taka niður jóla ljósin, en skyldi þá ekki beiðni frá Goslokanefnd hér í Eyjum sem fer fram á, að við skerbúar höldum áfram að tendra ljósin til 23. janúar. Þá eru einmitt35 ár frá byrjun Heimeyjar gosins. Hvað er til ráða?   

[Lára Hanna Einarsdóttir, 7.1.2008 kl. 11:36]

  Nú ertu í klípu, Siggi.  Veitirðu undanþágur?

[Jónína Dúadóttir, 7.1.2008 kl. 12:37]

Það getur varla nokkur lagt í að mótmæla þessu, enda ein af fallegustu hugmyndum í hótunarformi sem ég hef heyrt/lesið

[Svavar Alfreð Jónsson, 7.1.2008 kl. 12:38]

Ég hafði nú hugsað mér skemmtilega blöndu af auðmjúkri ósvífni og hatrammri hjartagæsku jafnvel eitthvað fram á góuna.

[Sigurður Þór Guðjónsson, 7.1.2008 kl. 14:22]

Undanþága veitt Keli enda eru Vestmannaeyingar guðs sérvalda útkjálkaþjóð.

[Heimir Lárusson Fjeldsted, 7.1.2008 kl. 16:38]

Hortugur og kærleikssnauður heiti ég því

að í heiminn kem ég endurborinn

vandræðin í.

[Lára Hanna Einarsdóttir, 7.1.2008 kl. 16:44]

Svo þú ert af öðru þjóðerni en við hin...!  Það vissi ég ekki.

Þetta er þriðja eða fjórða vísan sem ég sé eftir Heimi í athugasemdum víðsvegar í dag. Allar góðar!

[Heimir Lárusson Fjeldsted, 7.1.2008 kl. 20:22]

Takk Lára Hanna:

Langt hún Lára Hanna fer

leiðir hvern sem er.

Bara ef vissi

svo vitið ei missi,

hver hún í rauninni er.

[Guðmundur (IP-tala skráð) 7.1.2008 kl. 23:03]

Alveg örugglega einhver!