Guð er minn hirðir!

Í nótt gerðust óvænt tíðindi í mínu annars tíðindasnauða lífi. Ég var að skoða margt og margt á netinu í hálfgerðu iðjuleysiskasti. Ég flakka sjaldan um netið en geng yfirleitt beint að því efni sem ég vil nálgast. En nú kom ég allt í einu á síðu sem ég vissi ekki að til væri. Hún birtir tónlist hundruða tónskálda á nótum. Af einhverri rælni fletti ég fyrst upp á tékkneska snillingnum Anton Dvorák. Hann var betri en þessi Muggison (að ég tali nú ekki um þessi Enimen andskoti, jæja, best er víst, að stilla fordómum sínum og dómhörku í hóf!) og gerði einhverja frægustu sinfóníu sem nokkru sinni hefur verið samin, þessa sem kölluð er "frá nýja heiminum" af því að hún var samin í New York og vitnar í negrasálma.

Þarna rakst ég á Biblíusöngva op. 99 eftir Dvorák og fór að fletta þeim. Eitt lagið var við 23. sálm Davíðs: Guð er minn hirðir, mig mun ekkert bresta, og allt það. Og skemmst er frá því að segja að þetta finnst mér eitthvert fallegasta lag sem ég hef vitað og þekki ég þó mörg lög en vissi ekki af þessu  lagi. Ég var að kynnast því í fyrsta sinn.   

Það sem gerir lagið svo fallegt er einfaldeiki þess, mýkt og mildi, traust og góðvild sem stafar frá því í hverri nótu.  

Ég er veikur fyrir svona. Ég er veikur fyrir því þegar trú manna gerir þá vitra, góða og ljúfmannlega. Þannig gerði trúin Dalai Lama en mynd um hann var sýnd um daginn í sjónvarpinu. Og þannig hefur trúin, hvort sem hún er kristin, gyðingleg, múslimsk eða búddísk,  gert marga menn ef þeir láta ekki bölvaðan bókstafinn blinda sig.  

Athugasemdir

[Katrín Snæhólm Baldursdóttir, 21.8.2007 kl. 15:57]

Já

[Linda, 21.8.2007 kl. 16:07]

Já lagið Drottinn er minn hirðir er dásamlegt. 

Bókstafur gerir afskaplega lítið fyrir trúna einn og sér, það eru orðin sem bókstafurinn byggir upp sem gefur tóninn, því er bókstaftrú, furðulegt fyrirbæri

[Sigurður Þór Guðjónsson, 21.8.2007 kl. 16:51]

Það eru til mörg lög við Drottinn er minn hirðir. Eitt er oft sungið í íslenskum kirkjum, veit ekki hvaða lag það er en ekki er það gott. Schubert gerði snilldarlag við sálminn fyrir kvennakór sem aldrei er sungið í íslenskum kirkjum. Lag Dvoráks er lítið þekkt og er samið fyrir tvær radddir og píanóundirleik, sem auðvelt væri þó að leika á orgel, við tékkneskan texta en hefur verið oft verið gefið út og sungið með þýskum texta. Ekki veit ég til að það hafi heyrst hér á landi þó það geti auðvitað verið á einhverjum tónleikum. Og svo kemur hér ein bókstafstrúarfullyrðing eða ígildi hennar: Enginn mun hólpinn verða nema hann geti sungið báðar raddirnar í þessu lagi!

[Jón Valur Jensson, 21.8.2007 kl. 20:56]

Bókstafir sálmsins fallega -- já, vinsælasta sálmsins vegna fegurðar inntaks síns og orða -- blinduðu ekki augu Dvoráks, heldur opnuðu þau fyrir andlegum verðmætum. Bókstafurinn er mikilvægur, Sigurður, já, gulls ígildi, vissirðu það ekki? Eða viltu afskrifa og lítilsvirða öll þau óheyrilegu verðmæti þekkingar og fegurðar, sem við eigum í töluðum orðum og skrifuðum? Það færi þér illa sem rithöfundi, manni orðsins ... Með góðri kveðju,

[Jón Steinar Ragnarsson, 21.8.2007 kl. 21:06]

Kannast við þetta lag úr einni af mínum uppáhaldsmyndum, KOLYA eftir Ian Svérak, sem fékk Óskarinn sem besta erlenda mynd á sínum tíma.  Þessa mynd má finna á leigum hér og ræð ég öllum að sjá hana.

[Guðmundur Halldórsson (IP-tala skráð) 21.8.2007 kl. 21:55]

Gott blogg, Guð er góður, megi hann blessa þig

[Sigurður Þór Guðjónsson, 22.8.2007 kl. 00:06]

Já, Jón Steinar. Nú rennur upp fyrir mér ljós. Mér fannst ég kannast við lagið þegar ég las það í nótt og ekki síður eftir að ég prentaði það út og lék það yfir á píanóið í dag. Ég sá nefnilega myndina Kolya og hef á henni mætur eins og öllu rússnesku. Músikgáfa Dvoráks var ótrúleg og hann var líka svo ærlegur eitthvað, var eiginlega alltaf bara tékkneskur bóndi þó hann kynni allt í músik. Jón Valur: Nú þurfum við að fara að æfa saman raddirnar í þessu lagi hans Dvoráks!

[Sigurður Þór Guðjónsson, 22.8.2007 kl. 10:49]

Já, auðvitað. Það átti ég að gera strax í færslunni! En hér er slóð á tónskáldalistann og þar er hægt að fara inna á forsíðuna þar sem gert er ráð fyrir verkefninu sem enn er í þróun.  http://imslp.org/wiki/Category:Composers

[Sigurður Þór Guðjónsson, 22.8.2007 kl. 12:14]

Rugl er þetta: gert er grein fyrir verkefninu en ekki ráð. Svona villur heita meinlokur!