Skatan

Ég tek heilshugar undir svívirðingar nafna míns Sigurðar Helga Guðjónssonar formanns Húseigendagélagsins um helvítis skötuna og þá sem leggja sér slíkan viðbjóð til munns.

Nokkrir skötusyndaselir hafa risið upp á afturhalann og mótmælt réttmætum svívirðingum Sigurðar Helga en fnykinn leggur af rökum þeirra langar leiðir og segir það allt sem segja þarf um þau.

Skötuát landsmanna á Þorláksmessu, rétt fyrir heilög jólin, er alvarleg ógnun við kristilegt siðgæði, ókristilegt siðgæði og allar aðrar tegundir af siðgæði í landinu.

Það er villimannslegt siðleysi sem tekur mannáti í engu fram.

Þetta skrifa ég svo liggjandi uppi í sófa eins og kæst skata, innilokaður vegna óveðurs og annarra  hremminga.    

Athugasemdir

[Lára Hanna Einarsdóttir, 14.12.2007 kl. 16:01]

Hverjir fleiri en ég voru að blogga um svívirðingar nafna þíns? Ég þarf endilega að finna þau blogg til að sýna stuðning.

[Sigurður Þór Guðjónsson, 14.12.2007 kl. 16:14]

ÆtLar enginn að bæta við svívirðilegum svívirðingum um skötuna? 

[Ásgeir Kristinn Lárusson, 14.12.2007 kl. 16:21]

        Skammast í skötulíki

        og skaðlegt telur átið.

        Hvað skyldi náðugur Nimbus

        nýlega hafa í sig látið?
 

[Lára Hanna Einarsdóttir, 14.12.2007 kl. 16:21]

Ætlarðu ekki að segja mér hvar ég finn hinar færslurnar?

[Sigurður Þór Guðjónsson, 14.12.2007 kl. 16:24]

Þetta voru blaðagreinar.

[Lára Hanna Einarsdóttir, 14.12.2007 kl. 16:27]

Vertu nú góður við mig og segðu mér í hvaða blöðum og helst á hvaða blaðsíðum blaðagreinarnar birtust. Það þætti mér verulega vænt um.

[María Kristjánsdóttir, 14.12.2007 kl. 16:38]

Nú þykir mér skörin færast upp í bekkinn.

[Sigurður Þór Guðjónsson, 14.12.2007 kl. 16:50]

Já, eru þeir nú farnir að glefsa í mig skötusyndaselirnir! Fleiri slíkir skötusyndaselir eru að skrifa greinar í 24 stundir í dag.

[Lára Hanna Einarsdóttir, 14.12.2007 kl. 17:03]

Hvarflar ekki að mér að glefsa í þig - ég gæti meitt þig. En kærar þakkir fyrir upplýsingarnar. Ég fann 2 greinar á bls. 18 í 24 stundum í dag og var hæstánægð með báðar.

[Svavar Alfreð Jónsson, 14.12.2007 kl. 17:29]

Ég mótmæli harðlega og mun hafa í frammi svæsinn áróður fyrir skötuáti næst þegar ég heimsæki leikskólana.

[halkatla, 14.12.2007 kl. 17:32]

aumingja litla kæsta skatan!

[Árni Gunnarsson, 14.12.2007 kl. 17:45]

....sem tekur mannáti engu fram?

[Sigurður Þór Guðjónsson, 14.12.2007 kl. 17:45]

Mótmæli í skötulíki eru ekki tekin til greina!

[Matthildur Ágústa Helgadóttir Jónudóttir, 14.12.2007 kl. 21:59]

Einn einasta dag á ári langar okkur að komast nær Guði okkar með því að eta kæsta skötu með kartöflum og mörfloti.  Alla aðra daga liggjum við sem í dvala og etum venjulegan mannamat með ykkur hinum.  Að ætla að úthýsa okkur eins og presti úr leikskóla er náttúrulega aðför. 

Skammastu þín Sigurður!

[Heimir Lárusson Fjeldsted, 14.12.2007 kl. 22:37]

Kæst skata er Guðsgjöf:)

Mér sýnist þú vera að braggast!

[Árni Gunnarsson, 14.12.2007 kl. 23:10]

Bedúínar báru fregn

af barni í lágri jötu.

Ljóssins hátíð læðist gegn-

um lykt af kæstri skötu!

[Svava frá Strandbergi , 14.12.2007 kl. 23:58]

'Skötubarðvængjuð fjandafjöld
flengjast þar yfir dægrin löng' 

Var það ekki svona sem Kristmann Guðmundsson komst að orði í bókinni um kennarann sem fór í ferðalag með geimverum og endaði með að setjast að á annari plánetu? Þar varð hann ástfanginn og eignaðist egg með ástkonu sinni sem þau gátu með andlegum unaði einhvers konar. Man ekkert hvað bókin heitir. 

[Sigurður Þór Guðjónsson, 15.12.2007 kl. 00:14]

Skötuspursmálið er: er til svona mikið af þessu forljóta kvikindi í sjónum að ekki sjái högg á vatni þó veiddar séu þúsundir skatna fyrir hverja Þorláksmessu? 

[Marta B Helgadóttir, 15.12.2007 kl. 01:22]

Skatan er góð, herramannsmatur.

Það er bara lyktin sem er vond. Mér finnst það samt tepruskapur í fólki sem býr í fjölbýlishúsum að þola ekki lyktina svona eini sinni á ári eða svo.

Sumir þurfa að þola andstyggðar reykingalykt frá nágrönnum sínum allt árið um kring.

[Jónína Dúadóttir, 15.12.2007 kl. 06:58]

Mér finnst skatan og lyktin af henni skemmtilega vond. Og þetta er nú bara einu sinni á ári og mér finnst engin ástæða til að vera að amast við því.

[Sigríður Sigurðardóttir, 15.12.2007 kl. 10:17]

Skatan er grautúldinn viðbjóður, sem ég forðast meira en allar svæsnustu flensupestar vetrarins.  Og hananú!

[Guðmundur D. Haraldsson, 15.12.2007 kl. 14:58]

Elska sumir úldinn fisk

útúr kæsta skötu

eflaust betra er á disk

allt úr ruslafötu.

--

Má vera að þessi sé eldgamall, sniðugur þó.

[Sigurður Þór Guðjónsson, 15.12.2007 kl. 20:00]

Og sumar skötur eru forframaðri en aðrar skötur. 

[Linda, 16.12.2007 kl. 02:25]

Ég skil ekki þennan vibba sið, óháð því hvað fólk fékk sér að borða hér í den vegna fátæktar eða hvaða ástæðu sem er þá er þetta einn siður sem má jarða endanlega að mínu mati. En, ég mundi nú ekki ganga svo langt að banna fólki að elda þennan mat, kaupi bara frekar reykelsi og svoddan ef ég byggi í stigagangi, sem er ekki raunin þannig að ég er vel sloppin.  Sendi þér hér með Jólakveðjur, vona að þú finnir gleðina í tæka tíð.  og vonandi færir sveinki þér eitthvað skemmtilegt að lesa.

[Sævar Einarsson, 16.12.2007 kl. 23:30]

Ef formaður Húseigendafélagsins er persónulega í nöp við skötuna er hann fyllilega óhæfur að taka við kvörtunum þess efnis og fyrr frýs í helvíti að ég muni nokkurtíman láta einhvern banna mér hvað ég hef í matinn á mínu heimili. Einusinni sem oftar fór ég að ná í póstinn og skildi eftir opið inn, þá pikkaði einn sem býr í þessari sameign í öxlina á mér og bað mig um að loka hurðinni afþví það kæmi reykingarlykt fram á gangin ... ég sagði viðkomandi að snáfa í burtu og skella sér í sturtu því það væri svitalykt af honum.