Veðurdagatal fyrir janúar

Jæja, börnin góð! Hér birtist þá hið langþráða veðurdagatal fyrir janúar (reyndar ansi síðbúið) líkt og áður hefur birst á þessaari veðurtöff bloggsíðu fyrir ýmsa aðra mánuði, hvað varðar meðalhita sólarhringsins, hámarks- og lágmarkshita, sólarhringsúrkomu og daglegar sólskinsstundir í Reykjavík, ásamt hámarks-og lágmarkshita á öllu landinu. Þetta sést á fylgiskjalinu en þarf dálítilla skýringa við.

Lengst til vinstri er mesti og minnsti meðalhiti sólarhringsins sem mælst hefur í Reykjavík frá 1936 og einnig árin 1920-1923. Næst kemur meðalhiti mesta og minnsta hita sólarhringsins frá 1889-1903, tekinn af sírita en ekki af kvikasilfursmælingum,  en ekki raunverulegur meðalhiti. Munurinn á þessu tvennu er yfirleitt mjög lítill að meðaltali heils mánaðar en getur orðið nokkur dag og dag. Meðalhitinn er hins vegar ekki tiltækur nema frá 1936.  Meðalhitinn frá 1949, er opinber meðalhiti frá Veðurstofunni en fyrir árin 1920-1923 og 1936-1948 hef ég leyft mér að finna út meðalhitann sjálfur út frá nokkrum hitaathugunum á dag sem ég hef tiltækar. Loks er meðalhiti hæsta og lægsta álesturs á mæli þriggja athugana frá morgni til kvölds árin 1907 til 1919 en ekki meðaltal raunverulegs hámarks-lágmarkshita.  Aðrar mælingar en þessar  voru bara ekki gerðar  Reykjavík þetta tímabil. Um háveturinn eru þessar mælingar samt mjög nærri meðalhita eins og hann væri út frá átta athugunum á sólarhring eins og venjan er að reikna hann. Þarna sést að 1918 slær allt út flesta daga hvað kuldann snertir. Þá komu dagar þar sem meðalhiti sólarhringsins hefur örugglega verið vel undir tuttugu stiga frosti.  

Útgildi hámarks og lágmarkshita í Reykjavík á hverjum degi er hér allur í einu lagi alveg frá 1935 og til okkar daga en síðan útaf fyrir sig frá 1881 til 1903 fyrir lágmarkið en 1885 til 1907 fyrir hámarkið  (einstaka ár voru eyður) og svo er það líka sér á parti sem hæst og lægst var lesið á mæli 1908 til 1919.

Ekki eru tiltækar tölur fyrir daglegan meðalhita, hámark og lágmark árin 1924-1934. Þau ár koma því ekki til álita hér enn sem komið er að minnsta kosti hvað hitann snertir en hins vegar bæði fyrir sólskin og úrkomu. Það er auðvitað hið versta mál en verður svo að vera. Þó eru hér stakar mælingar fyrir Reykjavík í flipum, teknar úr Veðráttunni ef þær voru hærri en allar aðrar tiltækar tölur.

Hámarkshitinn er lesin á veðurstöðum á þrennan hátt, frá kl. 9-18, kl. 9 að morgni frá klukkan 18 eða 21 deginum áður og svo er lesið kl. 18 og gildir frá kl. 18 daginn áður og eru það þær tölur sem alltaf eru prentaðar í Veðráttunni, yfirlitsriti Veðurstofunnar um hvern mánuð. Þær hafa þann galla að þegar mjög hlýtt hefur verið kl. 18 einhvern daginn er hætt við að sá hiti verði meiri en mælist allan næsta dag eftir kólnun næturinar. Þá sitjum við uppi með hita á ákveðinni dagsetningu sem mældist í rauninni daginn áður en ekki á þeim degi sem við á! Ég hef reynt að sjá við þessu í þeim mánuðum sem ég hef áður fjallað um. Um háveturinn er ekki gott að reyna að sigta nokkuð út í þessum efnum vegna breytilegs gangs hitans yfir sólarhinginn og er hér því bara að langmestu leyti fylgt hitanum frá kl. 18-18.

Sólarhringsúrkoman er í tvennu lagi, annars vegar frá stofnun Veðurstofunnar 1920 og áfram og hins vegar árin 1885 til 1907.

Fjöldi sólskinsstunda á dag er frá árinu 1923.

Meðaltal dálkanna læt ég fylgja með að gamni.

Þessar töflur allar hef ég útbúið sjálfur eftir tiltækum gögnum en þetta eru ekki tilbúnar töflur frá Veðurstofunni eins og þær liggja fyrir hér.   

Mesti og minnsti hiti á öllu landinu hvern sólarhring er aðeins tiltækur fyrir hvern dag frá 1949 frá skeytastöðvum og 1961 fyrir aðrar stöðvar en  auk þess frá Teigarhorni frá 1937. Hins vegar er bætt við nokkrum stökum gildum sem birst hafa sem hámark eða lágmark alls mánaðarins í Veðráttunni á árunum 1920-1948 og eru hærri eða lægri en öll dagsgildin frá 1949 og svo lágmarkstölur frá hinum eina og sanna kuldajanúar 1918. 

Hámarksita frá sjálfvirkum stöðvum frá 1996 ára má sjá í sérstökum dálki ef þær slá út það sem kvikasilfursmælarnir hafa mælt  en sjálfvirkar hitamælingar hafa aðeins staðið í nokkur ár. Samsvarandi  lágmarkshita hef ég ekki að sinni.

Í flipum má sjá þegar um fleiri en eina ársetningu er að ræða og ýmsar snjallar athugasemdir! Lesið endilega það sem stendur í dularfullum flipunum!  

Villur geta verið hér á vappi og jafnvel meinlokur en þær verða leiðréttar undireins og upp um þær kemst.

Stefnt er að því á Allra veðra von í göfugri veðurdellu (!) að útbúa sams konar dagatal fyrir alla mánuði ársins og þegar fram í sækir einnig ýmislegt lesmál og kort um veðrið hvern dag ársins. 

Heimildir: Íslenzk veðurfarsbók, 1920-1923, Veðráttan 1924-2003, Veðurfarsyfirlit 2004-2007, vefsíða Veðurstofunnar, ýmis gögn frá Veðurstofunni.  

Skrár tengdar þessari bloggfærslu:

• c_documents_and_settings_fri_geir_my_documents_jandagt.xls

Athugasemdir

[halkatla, 26.1.2008 kl. 14:50]

þú ert svo svalur, eða var það kannski Mali sem bjó þetta allt til?

[Sigurður Þór Guðjónsson, 26.1.2008 kl. 15:30]

Mali er sá alsvalasti og við vinnum saman!