Félagsleg húsaleiga hækkar

Á Vísi is. er frétt um það að félagsleg húsaleiga hafi hækkað um hvorki meira né minna en 6% við síðustu vísitölubreytingu en þær verða ársfjórðungslega. Þess er einnig getið að Félagsbústaðir hafi sótt um að fá að hækka grunnleiguna um 10% en Velferðarráð Reykjavíkurborgar hefur ekki enn tekið afstöðu til þeirrar beiðni. Ástæðan fyrir hækkunarbeiðninni segja Félagasbústaðir að sé fjárhagserfiðleikar fyrirtækisins.

En hvað um fjárhagsstöðu leigjendanna sem vitað er að er fólk sem ekki hefur fjárhagsgetu til að kaupa sér íbúð eða leigja á frjálsum markaði? Nái grunnhækkunin sem Félagsbústaðir vilja fá fram hefur húsaleigan hækkað um 16%. 

Hvað ef leigan hækkar svo um 6% ársfjórðungslega vegna vísitölubreytinga. Það gerir 24% hækkun á ári. Þarf nú ekki að fara að vísitölubinda húsleigubætur svo fólk neyðist ekki til að hrekjast út úr félagslegu leiguhúsnæði?

Hætt hefur verið að niðurgreiða húsaleigu með fastri prósnetutölu af leiguupphæð en í staðinn hafa verið teknar upp sérstakar húsaleigubætur þar sem tekið er mið af fjárhagsstöðu hvers og eins við ákvörðun húsaleigu. Hjá flestum er sagt að leigan lækki en hún getur hafa hækkað hjá sumum.

Jórunn Frímannsdóttir forstöðumaður Velferðarsvið Reykjavíkurborgar skrifaði grein um þessar breytingar í Morgunblaðið. Hins vegar hefur ekki verið haft fyrir því að gera hverjum og einum leigjanda grein fyrir því hvernig húsaleigubætur hans eru reiknaðar. Leigjendurnir fá bara innheimtuseðil með nýrri upphæð án nokkurra skýringa á breyttri upphæð húsaleigubóta. Þetta er mikið tillitsleysi við leigjendur í máli sem snertir eins mikið afkomu þeirra eins og  húsaleigan er og þetta er ekki Reykjavíkurborg sem sveitarfélagi sæmandi. 

Það kostar kannski peninga að gera þetta. En það er enginn afsökun. Sumt er óhjákvæmilegt. 

Hið opinbera getur ekki verið þekkt fyrir að sýna skjólstæðingum sínum svona mikið tillitsleysi.      

 

Athugasemdir

[Þorsteinn Briem, 8.7.2008 kl. 15:36]

Auðvelt að senda með innheimtuseðlunum staðlað bréf til allra leigjendanna, hefði ég haldið, þar sem almennar forsendur útreikninganna hefðu komið fram. Hver og einn leigjandi hefði svo getað reiknað út sínar húsaleigubætur út frá þessum forsendum.

[Sigurður Þór Guðjónsson, 8.7.2008 kl. 16:01]

Tilo dæmis það en betra þó að hverjum og einum sé greint frá því hvers vegna hans upphæð í húsaleigubótum er eins og hún er en ekki einhvern vegin öðruvísi.