Ótrúleg framhleypni Fischershópsins

Í 18 fréttum Ríkisútvarpsins kom fram með orðum Guðmundar G. Þórarinssonar að Fischerhópurinn vilji að útför Bobby Fischers verði hér á landi og hún verði gerð á vegum hins opinbera. Og Guðmundur rökstuddi skoðun sína í löngu máli. Þeir vilja jafnvel að Fischer verði jarðsettur í þjóðargrafreitnum á Þingvöllum. 

Ekkert hefur enn heyrst frá unnustu skákmeistarns um þetta mál og því um síður frá dóttur hans sem mun vera á Filipseyjum.

Er það ekki taktleysi í Fischerhópnum að vera með kröfur í þessu efni opinberlega áður en nánustu aðstandendur hafa látið i sér heyra um óskir sínar? Hvað gerist svo ef aðstandendur hafa annað í hyggju?

Guðmundur G. Þórarinsson segist ekki vilja stofna til deilna í þessu máli. En þessi framhleypni er nú samt einmitt vegurinn til að efna til þeirra. Ég tala nú ekki um að flækja þjóðargrafreitnum inn í málið. Hugmyndin um þann grafreit var mistök og eftir að tveir menn voru grafnir þar með stuttu millibili fyrir meira en hálfri öld hefur verið  þegjandi samkomulag með þjóðinni að gleyma honum bara. Einungis það að nefna að grafa Fischer í þjóðargrafreitnum hlýtur að vekja upp viss átök ef einhverjir verða því andvígir og sú andstaða hefur þegar komið fram sem von er.   

Auðvitað eiga aðstandendur Fischers að ákveða í einu og öllu hvar hann verður grafinn og það er bara sjálfsögð kurteisi og tillitssemi af Íslendingum að þegja rétt á meðan ekki er vitað hvað aðstandendurnir ætlast til. Að sjálfsögðu á svo að veita aðsteandendum alla aðstoð eftir að vilji þeirra kemur fram. 

Reyndar fékk ég það hugboð í gær að útför skáksnillingsins ætti eftir að valda miklum og óþægilegum deilum. Vonandi gengur það þó ekki eftir.

Hugmyndir Fischershópsins eru svo kjánalegar að engu tali tekur. 

Athugasemdir

[Hólmdís Hjartardóttir, 19.1.2008 kl. 18:32]

Ég er gapandi yfir þessu, það er unnustunnar að ákveða.

[halkatla, 19.1.2008 kl. 18:36]

ótrúleg framhleypni ´

en ég og kisurnar biðjum að heilsa ykkur Mala!

[Lára Hanna Einarsdóttir, 19.1.2008 kl. 19:35]

Ég hef nú fengið á tilfinninguna að Guðmundur njóti sviðsljóssins og komi til með að nýta sér andlát Fishers til að baða sig í því.

Mér finnst að þessum mönnum komi ekkert við hvar maðurinn verður jarðsettur, það er annarra að ákveða það.

Og á Þingvöllum??? Það fannst mér nú beinlínis hlægilegt.

[Emil Hannes Valgeirsson, 19.1.2008 kl. 19:49]

Er ekki laust pláss fyrir hann í Fischersundi?

[Sigurður Þórðarson, 19.1.2008 kl. 22:39]

Hvaða, hvaða, mega vinir hans ekki koma með uppástungu?

[Kristján Sigurður Kristjánsson, 19.1.2008 kl. 23:37]

"Óviðeigandi framhleypni Fischershópsins"

Maðurinn er þó allavega látinn.

[Anna (IP-tala skráð) 20.1.2008 kl. 13:53]

Fyrirgefið, en ég fékk nú bara hláturskast þegar ég las þá endemis þvælu að RJF hópnum skuli hafa dottið í hug að jarðsetja Bobby Fischer á Þingvöllum. Við hlið stórskáldanna Einars Benediktssonar og Jónasar Hallgrímssonar! Hélt fyrst að þetta ætti að vera brandari, en nei, þeir eru virkilega að hugsa um staði eins og Þingvelli fyrir jarðneskar leifar Bobbys. Sammála einhverjum sem skrifar hér fyrir ofan að einhverjir þessara manna njóta þess að baða sig í sviðsljósinu vegna andláts Bobbys. En hlífið okkur við öðru eins bulli og grafreit á einum helgasta stað Íslands.

[Vilhjálmur Örn Vilhjálmsson, 20.1.2008 kl. 15:15]

Hefur einhver hugsað um lögerfingja Fischers á Filippseyjum?

[Sigurður Þór Guðjónsson, 20.1.2008 kl. 16:32]

Gott hjá mér Vilhjállmur að benda á þetta. Við skulum vona að Fischerhópurinn gleymi nú ekki að gæta hagsmuna lifandi erfingja Fischers sem er auðvitað mikilvægara en hvað gert verður við hina dauðu.

[Guðmundur (IP-tala skráð) 20.1.2008 kl. 16:36]

Nú er sviðsljósið of verðmætt þessum mönnum, að láta sér detta í hug að jarðsetja Fischer á Þingvöllum, þá er náttúrulega verið að setja fordæmi að hver sá sem stendur sig vel á alþjóðavettvangi fá sig jarðsettan á Þingvöllum ef einhver annar óskar þess. Má þá nefna Björk, Kristján J, Örn Arnars og fl og fl. Hvaða fíflaskapur er þetta.

[Frelsisson (IP-tala skráð) 20.1.2008 kl. 18:03]

já frekja og yfirgangur... og að láta sér detta það í hug að hann eigi að vera meðal mikilmenna á Þingvöllum er ótrúlegt.

Þessir menn eiga að skammast sín ef þeir kunna það 

[Sigurður Þór Guðjónsson, 21.1.2008 kl. 12:02]

Frá minni hendi eru ekki um sérlega sterkar tilfinningar að ræða. Ég tek ekki undir neitt óhróður um Fischer. Mér finnst bara að menn eigi ekki að  að vera að gefa út yfirlýsingar meðan ættingjarnir Fischers eru ókomnir - og svo finnst mér eins og svo mörgum öðrum að ALDREI eigi að grafa meira í þennan  þjóðargrafreit sem var meiriháttar mistök enda hefur þjóðin sýnt það í verki að grafa þar engan í 60 ár. Að vera alveg sama um eiithvað mál þarf svo ekki endilega að vera nein dyggð - það getur alveg eins verið bara kæruleysi! 

[María Kristjánsdóttir, 21.1.2008 kl. 13:50]

Helst sýnir þetta að vinskapur við frægt fólk er varhugaverður - það fylgir honum svo mikil ábyrgð!

[Sigurður Þór Guðjónsson, 21.1.2008 kl. 17:16]

Halla og María! Ansi eruð þið góðar saman. Þið eru laglega ...  

[Sigurður Þór Guðjónsson, 21.1.2008 kl. 18:06]

Nú er búið að jarðsetja Fischer í kyrrþey í Laugardæliskirkjugarði samkvlmt hans eigin ósk. Betur að Fischerhóprinn hefði haft biðlund til að hlusta á aðstandendur Fischers áður en hann rauk í fjölmiðla .

[María Kristjánsdóttir, 21.1.2008 kl. 18:46]

Og mikið var það nú gott á okkur.

[Sigurður Þór Guðjónsson, 21.1.2008 kl. 19:09]

Já!

[Lára Hanna Einarsdóttir, 21.1.2008 kl. 19:20]

Sá hlær best sem síðast hlær, þótt úr gröfinni sé!

[Greta Björg Úlfsdóttir, 22.1.2008 kl. 18:09]

Já, Bobby gaf öllum langt nef að handan, meira að segja presti og sóknarbörnum líka, - það er engu líkara en laumast hafi verið með gröfu þarna rétt inn fyrir hliðið og tekin gröf þarna rétt við stíginn heim að kirkjunni. Það verður líklega áfram líf og fjör hjá kónginum, ef kirkjusókn er sæmileg hjá sr. Kristni.

[Sigurður Þór Guðjónsson, 22.1.2008 kl. 18:25]

En ætli sé hægt að hengja sig upp á að það sé Bobby sem er í gröfinni?

[Vilhjálmur Örn Vilhjálmsson, 24.1.2008 kl. 12:22]

Sigurður, síðasta spurningin flokkast undir þráhyggju. Heldur þú að hann sé enn á lífi? Þetta var líka þráhyggjuspurning. Nú er þetta orðin samsæriskenning Sigga og Villa