Septemberarnir þrír

Þrír septembermánuðir skera sig alveg úr fyrir hlýindi, 1939, 1941 og 1958.  Meðalhiti þeirra var í Reykjavík 11,8, 11,6 og 11,4 stig. 

Meðalhiti júlí árin 1961-1990 var 10,6 stig í Reykjavík og 11,2 árin 1931-1960. Á þessu sést að septemberernir þrír voru ígildi góðra júlímánaða hvað hitann snertir.

Sumrin þessi ár voru líka með þeim allra hlýjustu í heild. September er talinn til sumarmánaða og munar því ekkert smáræði um mánuði af þessum hitaflokki.

Meðalhitinn það sem af er september núna er 13,6 stig í Reykjavík, hærra en nokkur september hefur afrekað þ. 11. Munurinn á okkar september og fyrstu 11 dögunum 1939 má þó reyndar enginn heita. Sá mánuður stóð sig  til mánaðarloka. 

Nú er bara eftir að sjá hvort okkar september tekst að blanda sér í baráttuna um hlýjustu septembermánuðina. Hvort tenórarnir þrír... nei afsakið, septemberarnir þrír vildi ég sagt hafa verða þá orðnir fjórir!

Á fylgiskjalinu má sjá hita, úrkomu og sól hvern dag í þessum mánuðum. Meðalhitinn er eftir þeim stað þar sem mælt var, fyrstu tveir á þaki Landssímahússins við Austurvöll en sá síðasti á Reykjavíkurflugvelli. Sérstaklega er tekið fram að hér er úrkoman frá því kl. 9 þann dag sem tilgreindur er til kl. 9 næsta dag.

Athuganirnar á fyrstu tveimur  mánuðunum voru gerðar eftir íslenskum meðaltíma og nokkuð óreglulegum eftir nútíma venju en í hinum síðasta á heimstíma sem er sá tími sem við notum nú. 

Og hér er náttúrlega okkar september. 

Látum ekki deigan síga við að hvetja hann til dáða. Áfram september!

 

 

Skrár tengdar þessari bloggfærslu:

• hlysept_rv.xls

Athugasemdir

[Sveinn Atli Gunnarsson, 12.9.2010 kl. 17:42]

Smá spurning, af því að þú ræddir um sumrin 1939, 1941 og 1958 sem verandi hlý í heild. Hvernig voru vetrarnir á eftir þessi 3 ár? Hvað getum við lært af sögunni, er hugsanlega hlýr vetur í kortunum eða hvernig leit þetta út þá?

[Sigurður Þór Guðjónsson, 12.9.2010 kl. 17:55]

Ég spái ekki veðri fram í tímann nema í gamni. Veturnir 1939-1942 voru allir fremur hlýir og líka veturinn 1959 (nema janúar) en 1958 var í kaldara lagi. Þegar hlýndi eða kuldaskeið ríkja um einhver ár nær það yfirleitt bæði til sumra og vetra. Kaldir vetur - svöl sumur, mildir vetur- hlý sumur. En einhver tilbrigði eru á þessu. Þetta held ég að sé reynslan. Kemur afar vel fram síðasta áratug. 

[Sveinn Atli Gunnarsson, 12.9.2010 kl. 18:08]

Takk, ég var nú mest að spá í fortíðina, þ.e. þróunina þessa 3 vetur sem um er rætt. En eins og Storm P. sagði á sínum tíma, "Det er svært at spå...Især om fremtiden..."