Bloggfærslur mánaðarins, febrúar 2014

Fjórði þurrasti febrúar í Reykjavík

Þessi febrúar reyndist vera sá fjórði þurrasti sem mælst hefur í Reykjavík frá 1885. Úrkoman var 13,6, mm en var minnst 1966 4,9 mm, 9,0 mm í þeim ískalda febrúar 1885, og 10,0 mm árið 1900. Árið 1838 mældi Jón Þorsteinsson 8 mm í Reykjavík en þær mælingar eru kannski ekki alveg sambæirlegar við síðari mælingar. Úrkomudagar voru núna fimm en frá stofnun Veðurstofunnar 1920 hafa þeir fæstir verið þrír í febrúar 1947, þeim sólríkasta sem mælst hefur og fimm í febrúar 1977. Árið 1966, í úrkomuminnsta febrúar, voru þeir hins vegar 7. 

Úrkomuminnsti febrúar sem mælst hefur á landinu í heild er talin vera árið 1900 en næstur kemur frá þeim tíma 1977, 1901 og 1966. Þess má geta að febrúar árið 2010 er talinn sá 11. þurrasti frá 1900 á landinu. Allir búir að gleyma honum!

Sá febrúar sem nú er að líða kemst varla mjög hátt á þurrkalista alls landsins því sums staðar hefur verið veruleg útkoma. En nokkur þurrkamet einstakra stöðva sem allengi hafa athugað veit ég um: Í Stafholtsey í Borgarfirði hefur alls engin úrkoma mælst (stöðin er um 25 ára). Í febrúar 1977 mældust 0,2 mm í Síðumúla í Hvítársíðu. Í Stykkishólmi er þetta næst þurrasti febrúar, alveg frá 1857 en minnst var árið 1977. Á Bergsstöðum í Skagafirði hefur ekki mælst minni febrúarúrkoma eða í nokkrum mánuði, 0,4 mm, frá 1979.  Á Þingvöllum, þar sem er sjálfvirk úrkomustöð en var lengi mpönnuð, hefur líklega ekki mælst minni úrkoma í febrúar.  Kannski minnir þessi mánuður núna nokkuð á  febrúar 1977. Þá var þrálát  austanátt eins og nú og meturrkar, í alveg bókstaflegum skilningi, á vesturlandi og mjög þurrt var á norðvestanverðu landinu. En okkar mánuður er miklu mildari en 1977.

Hiti mánaðarins er hár miðað við febrúar eins og sjá má i fylgiskjalinu.     

Búið er að setja þennan mánuð inn í úrkomutöfluna í færslunni  Úrkoma í Reykjavík.  

Vona að ég móðgi engan þó mér finnst þessi febrúar hafa verið góður fyrir Reykvikinga og reyndar allur veturinn sem af er. Ekki hversdagslegt t.d. að hiti komist í 8 stig í glaða sólskini síðasta daginn  í febrúar.


Skrár tengdar þessari bloggfærslu:

Uppfærðar veðurskrár

Nú hef ég uppfært nokkrar veðurskrár sem hér hafa verið á blogginu. Þær eru: 

Íslandsmetin í veðrinu. Veðurmet hvers mánaðar fyrir landið í heild.

Hámarks-og lágmarkshiti hvers mánaðar á landinu í heild.  Tölur frá sjálfvirkum stöðum koma líka inn frá 1995 en fram að þeim tíma voru eingöngu mælingar á kvikasilfursmæla.

Veðurmet hvers mánaðar á íslenskum veðurstöðum. Hiti, úrkoma og snjódýpt fyrir einstakar stöðvar. 

Sólskin á Íslandi. Mánaðartölur hvers mánaðar fyrir allar stöðvar sem mælt hafa sólskin.

Veðurmet í Reykjavík. 

Hámarks- og lágmarkshiti hvers mánaðar í Reykjavík frá 1871.

Sólarstundir í Reykjavík frá 1911. 

Úrkoma í Reykjavík.

Snjóalög i Reykjavík.

Fyrstu og síðustu frost og snjóar í Reykjavík.

Mesti og minnsti hiti á  Akureyri frá 1882, sólskinsstundir og úrkoma. 

Efnisyfirlit un veður á þessari síðu má sjá hér. Og það er líka vísað á yfirlitið á forsíðu þessarar bloggsíðu. 

Villur geta verið á sveimi í þessum skrám.  


Hvað með íbúa í nágrenninu

Fyrir íbúa í grennd við Höfðatorg hefur verið sífellt ónæði með hléum frá Höfðatorgsreitnum frá 2006. Það hefur ekki bara verið frá sprengingum heldur ekki síður frá höggfleygum sem halda áfram klukkustundum saman. Og glamri frá stórgrýti og vélum og dyn frá þungum flutningabílum. 

Ekki hefur verið hægt að hafa opna glugga í húsum í nágrenninu meðan verið er að vinna. Erfitt er að hlusta á útvarp eða sjónvarp eða á tónlist, jafnvel í heyrnartólum því hljóðin þröngva sér alls staðar inn. Ekki er með góðu móti hægt að taka á móti gestum því það er varla hægt að tala  saman. Auk þess hefur svo mikið ryk safnast á glugga að stórverk verður að þrífa þá. En kannski að verktakinn gangi nú í það að leikslokum! Svona hefur þetta verið meira og minna árum saman með hléum. Þegar turninn alræmdi var í byggingu og engar rúður voru í honum en bara plast í heilan vetur ýlfraði og gólaði allan sólarhringinn í eyrun á fólki sem bjó í nágrenninu. Sagan mun kannski endurtaka sig með þá turna sem nú á að byggja. Þegar fleygurinn er í gangi er ekki eins og hávaðinn berist utan að heldur er eins og verið sé að berja veggina í húsunum að innan. Fyrir jólin barst bréf í húsin frá verktakanum þar sem gefin voru fyrirheit um að vinnu við fleyg lyki fyrir jólin. En hann er enn að með hléum og stundum aldrei verið verrri.

Reyndar eru þetta ekki einu framkvæmdirnar í nágrenninu og ekki alltaf auðvelt að greina á milli þeirra hvað ónæði varðar. Um tíma voru framkvæmdir á þremur stöðum í einu í fárra metra fjarlægð frá hver öðrum. Það vekur upp umhugsun um það hvað þeir eru að hugsa sem gefa leyfi fyrir svona framkvæmdum milli fjölmennra íbúðarhúsa á sama tíma á nánast sama bletti. Tilfinningaleysið fyrir íbúum sem hafa ekki að öðru að hverfa en heimilum sinum virðist vera algjört.

Þetta tilfinningaleysi fyrir íbúum kemur lika fram í þessri frétt. Hvergi er minnst á íbúða í íbúðarhúsum þó fjölmargar blokkir séu alveg við í Bríetartúni og í Ásholti auk smærri húsa í  Túnunum. Hins vegar er talað um þá sem vinna í nærliggjandi húsum.

Í fréttinni segir að fólk hafi tekið þesum framkvæmdum vel. Ég efast um að svo sé. Ég held að þetta leggist einmitt mjög þungt á íbúa en kannski mismikið eins og gengur. Þetta byggi ég á samtökum við íbúa. Alveg í eldlínunni er sambýli fyrir geðfatlaða á vegum Reykjavíkurborgar. (Lóðin þar hefur reyndar fyllst af byggingarvörum frá annarri húsbyggingu við Laugaveg, hinum megin við! Verktakar valta yfir allt). En fólk veit að það þýðir ekkert að kvarta. Það breytir engu. Framkvæmdirnar halda bara áfram eins og ekkert hafi ískorist. Það er sá veruleiki sem íbúar borgarinanr búa við hvort sem er við Höfðatorg, Hampiðjureitinn eða Lýsisreitinn. Þeir eru að öllu leyti varnarlausir og réttlausir gagnvart risaframkvæmdum svo að segja inni í görðunum hjá þeim.

Heyrst hefur að þegar byggt verður enn nær íbúðarblokkunum en hótelið þó er verði atgangurinn svo mikill að flytja þurfi burtu fólk í þeim húsum sem næst liggja. Þetta sagði starfsmaður á svæðinu í mín eyru í sumar. Ekki veit ég hvað hann hefur fyrir sér í þessu. En þetta er hrolvekjandi ef rétt reynist. Það verða þá nauðingarflutningar. Og hvar á þá fólkið að búa og hver á að sjá um flutningana? Og flutningar reyna mikið á fólk. Vonandi er þetta einfaldlega ekki rétt. En við þessar aðstæður ætti að upplýsa íbúa í grennd við framkvæmdirnar í tíma nákvæmlega um það sem þeir geti átt von á svo þeir lifi ekki í ugg og kvíða. En geðslegar verða hamfarirnar fyrir íbúana þó þeir  verði áfram ef framkvædirnar færast enn nær og svo að segja inn í stofu hjá fólki.    

Í fréttinni er boðað að Morgunblaðið muni fylgjast áfram með framkvæmdunum á Höfatorgi eins og það hefur gert um hríð. 

En hvernig væri að blaðið fylgdist líka með íbúunum í nágrenninu? Koma þegar atgangurin er mestur og beina athyglinni að þeim  sem neyddir eru til að búa við hann með hléum í heilan áratug.

Framkvæmdir hófust við langa húsið við Höfðatorg með tilheyrandi neðanjarðargöngum kringum árið 2006 en verklok á reitnum eru áætluð 2016.

Í sannleika sagt hafa framkvæmdirnar við Höfðatorg breytt þessu áður friðsæla svæði í langdregna martröð fyrir íbúana.  

Skiptir fólk á heimilum sínum engan neinu máli í þessari borg? Eru það bara verktakar og hótel sem máli skipta?

 


mbl.is Lítið má út af bregða á Höfðatorgi
Tilkynna um óviðeigandi tengingu við frétt
Skrár tengdar þessari bloggfærslu:

Ólympíuleikar kúgunnar

''Að sögn Amnesty International eru aðgerðir stjórnvalda svívirðilegar. Samtökunum berast fregnir af daglegum handtökum aðgerðasinna í Sotjsí og á svæðinu í grennd við ólympíuleikana. Fólk er handtekið fyrir það eitt að tjá hug sinn friðsamlega.''

Þetta eru ólympíuleikarnir sem íslenski íþróttamálaráðherrann kenndi við frið í umræðum á Alþingi! 

Kannski er þetta friðarhugjsón Illuga Gunnarssonar ráðherrra sem ekki þorði að láta bera mikið á treflinum sínum á leikunum. Með réttu hefur óttast svona meðferð.  

 


mbl.is Meðlimum Pussy Riot sleppt úr haldi
Tilkynna um óviðeigandi tengingu við frétt

Metkuldar

Í nótt mældist mikið frost á landinu. Á Neslandatanga við Mývatn fór það niður í -28,2 stig. Það mun vera dægurmet fyrir kulda fyrir 18. febrúar á landinu! Gamla metið var aðeins -20,2 stig og var mælt í Reykjahlíð við Mývatn árið 1966. Dagurinn stóð óneitanlega vel við höggi með sitt hæsta dagslágmark fyrir allan mánuðinn! Mesti kuldi sem mælst hefur í öllum febrúar á landinu er -30,7 stig hinn 4. árið 1980 í Möðrudal.  

Í Möðrudal mældist í nótt -26,1 stig, -25,6 í Svartárkoti, -21,8 á Brú á Jökuldal og -20,8 á Staðarhóli í Aðaldal.

Kaldast varð í byggð en ekki á fjöllum. Kaldast á fjöllum var -27,6 stig á Brúarjökli, -27,3 stig við Kárahnjúka og -26,9 við Upptyppinga.

Allt eru þetta sjálfvirkar stöðvar.  Ekki hafa enn komið upplýsingar frá mönnuðu stöðvunum en það er eitt af framafaraskrefum Veðurstofunnar að taka hitaupplýsingar frá þeim út af almenna vef sínum en þó eru opnar leynileiðir þangað daginn eftir viðkomandi dag. Á sjálfvirku stöðinni á Grímsstöðum á Fjöllum, þar sem líka er kuldavænasta mannaða stöðin, varð frostið reyndar ''aðeins'' -17,1 stig. 

Viðbót 19.2.: Í nótt bættu kuldarnir um betur. Frostið fór í -28,9 stig í Svartárkoti. Það er líka dagshitamet í kulda á landinu fyrir 19. febrúar. Gamla metið var -24,0 stig á Grímsstöðum 1911. 

 


Öfugmæli

Veðufréttamaðurinn í sjóvarpinu í kvöld tönnlaðist á veðurblíðu sem spáð er sunnanlands á morgun. Samt verður frost allan sólarhringinn. Í gær var glaðasólskin og 3-5 stiga hiti í Reykjavik. Það má hiklaust kalla blíðu en var ekki kölluð það í veðurfréttum. 

Í dag var bjart en frost mátti heita allan daginn í Reykjavík, hámkarskhitinn varð +0.1 stig. Það kalla ég hins vegar ekki neina blíðu. Frostið bítur en strýkur ekki blíðlega um vanga. Á morgun verður líklega frost allan daginn. 

Bjart veður með frosti þó um vetur sé finnst mér ekki vera nein veðurblíða. Það er bara öfugmæli. En það má kalla það fagurt veður ef menn vilja.

Að geti komi raunverulega blítt veður um hávetur í glaða sólskini sýna sumir síðustu dagar svo ekki verður um villst, ekki bara gærdagurinn heldur líka 8. og 9. febrúar sem voru sólríkir og nær frotlaustir allan sólarhringinn og með þriggja til fimm stiga síðdegishita. En enginn hefur haft fyrir því að nefna veðurblíðu um þessa daga.  Það er þó alveg himinn og haf hvað blíðleika varðar milli þeirra og þess sen spáð er fyrir morgundaginn. En svo þegar kemur bjart veður með frosti - köldustu dagar ársins á suðurlandi - þá er allt í einu komin veðurblíða!

Skil nú bara satt að segja ekki svona tilfinningaleysi fyrir verðurlagi og fyrir merkingu orða.

 


Skrár tengdar þessari bloggfærslu:

Það fréttnæmasta um nýliðin janúar

Það er ekki sérlega fréttnæmt að alhvítt hafi verið á Akureyri allan mánuðinn eins og segir þarna í fyrirsögn fréttarinnar. Það gerist næstum því fjórða hvern janúar. Fréttnæmara er að þetta mun vera tíundi hlýjasti janúar á landinu en sá næst hlýjasti við Berufjörð á austfjörðum þar sem mælt hefur verið frá 1873. En allra fréttnæmast er þó það, miðað við óvenjuleika, að þetta er eini janúar síðan mælingar hófust þar sem ekki hefur mælst frost á íslenskri veðurstöð. Á Vattarnesi fór hiti aldrei lægra en í 0,4 stig og 0,0 stig í Seley.

Ýmislegt er reyndar óvenjulegt við þennan janúarmánuð eins og hér má lesa. 

Af sérstökum ástæðum hef ég ekki getað sinnt fylgiskjalinu um tíma. En nú er það komið. Það birtir ýmsar veður upplýsingar hvers dags fyrir Reykjavík (blað1) , Akureyri (blað 2) og landið (blað 1) . Hægt er að sjá janúar með því að skrolla upp skjalið. 

 


mbl.is Alhvít jörð á Akureyri allan janúar
Tilkynna um óviðeigandi tengingu við frétt
Skrár tengdar þessari bloggfærslu:

Sotsjí

Meðalhitinn í Sotsjí í febrúar er 6 stig. Gangur daglegs hita er að meðaltali 3-10 stig. Mesti hiti sem nokkru sinni hefur mælst í mánuðinum er 24 stig en mestur kuldi -14 stig. Mánaðarúrkoman er um 125 mm og úrkomudagar eru 14 að meðaltali.

Hér er hægt að sjá töflu nokkurra daglegra veðurþátta fyrir Sotsjí eftir því sem febrúar 2014 líður.

Lengst til vinstri er dagsetningin, þá lágmarkshiti (blátt), meðalhiti sólarhringsins (grænt), hámarkshiti (rautt), þá vik hitans frá dagsmeðaltal og loks lengst til hægri sólarhringsúrkoman í millimetrum. Neðst á síðunni er línurit sem sýnir daglegan lágmarkshita, meðalhita og hámarkshita en deplarnir fyrir ofan og neðan sýna mesta og minnsta hita sem mælst hefur á staðnum viðkomandi dag.

Dálkurinn til hægri sem tölusettur er 1-29 sýnir hver mestur hiti hefur mælst viðkomandi dag og hvaða ár. Ef svo er smellt á bláa dökka flötinn fyrir ofan dagsetningarnar kemur á sama hátt upp lægsti hiti sem mælst hefur viðkomandi dag og hvaða ár það hefur verið. 

Hér sést febrúarveðurfar í Sotsjí. Og hér ásamt daglegu veðri.   

Daglegt veður í Sotsjí er víða hægt að sjá, til dæmis á  Wunderground (með gerfinhattamynd)WeatherOnline, Weather Channel, Weather Network,  Weather City, AccuWeather, BBC Weather (með korti)

Hér er líka Rússlandskort yfir hita og skýjafar. 

Þetta er svo síða ólympíuleikana í Sotsjí.

 

     

 

 

 


Innskráning

Ath. Vinsamlegast kveikið á Javascript til að hefja innskráningu.

Hafðu samband