Bloggfærslur mánaðarins, júní 2009

Þakkarávarp

Innilega hrærður frá innstu hjartarótum vill undirritaður þakka öllum fjær og nær er sendu honum kærleikskveðjur og heillaóskir á afmælinu hans. 

Guð launi ykkur öllum nema honum Doksa - skrattinn missi hann bara!

Monsjör  Mali. 


Mali tveggja ára

Mali the malicious er tveggja ára í dag.

Þeir sem vildu gleðja hann á þessum miklu tímamótum í lífi hans eru beðnir um að senda honum kveðju í athugasemdadálkunum en haga sér samt að öllu leyti skikkanlega.

Afmælisbarnið verður að heiman í dag. 

pict2872a.jpg


Tekinn yfir

afrit_af_pict2608_860772.jpg

Hvar voru mótmælendurnir

Sagt er að þúsund manns hafi verið á Austurvelli þegar mest var til að mótmæla icesavesamningunum.  En kringum 14 þúsund hafa víst mótmælt þeim á feisbúkk. Hvar var allt þetta fólk? Af hverju mótmælti það ekki á Austurvelli? Ég bara spyr.

Ég kom tvisvar á Austurvöll meðan mótmælin stóðu yfir. Ekki þó til að taka þátt í þeim. Ég átti einfaldlega leið framhjá. Fyrst kom ég rétt um þrjúleytið. Þá voru þarna nokkur hundruð manns og örfáir börðu á pottlok. Allt var samt mjög friðsamlegt.

Í fréttum Ríkisútvarpsins klukkan fjögur kom fram að meiri harka væri hlaupin í leikinn. Ég átti aftur erindi í bæinn nokkrum mínútum seinna og kom auðvitað við á Austurvelli. Þá var þar  enn færra fólk en þegar ég var þar í fyrra skiptið. En mótórhjólamenn voru að fremja ægilegan hávaða fyrir framan húsið. Þeir fóru þó fljótlega. Annars var allt með friði. Hávær mótorhljól eru reyndar orðin algjör plága í íbúðarhverfum. En það er nú önnur saga. 

Það er nokkuð ljóst að þeir víbrar eru ekki í þjóðfélaginu að skapist fjölmenn útimótmæli vegna þessa máls. 


Fjársvik og flugvélabrak

Ég hef í rauninni aldrei bloggað neitt um hrunið. Ég fylgist með fréttum og umræðum manna. Mér finnst þetta flókið mál og það eru áreiðanlega fáir sem skilja það í smáatriðum. Fyrir venjulegt fólk var Silfur Egils notadrýgst til skilnings fyrir almenning, ásamt nokkrum blaðgreinum góðra manna og einstaka bloggum, eins og hjá Láru vinkonu. Ég var að kaupa bókina Hrunið eftir Guðna Th. Jóhannesson sem mér hefur reyndar alltaf fundist nokkuð hvatvíst og hægri sinnaður sagnfræðingur.

Auðvitað vonar maður að þessi mál upplýsist og þeir sem ábyrgð bera á saknæmum efnum, ef einhver finnast, verði látnir sæta ábyrgð. En ég er ekki sérlega bjartsýnn. Aðdragandinn hingað til hefur allur verið eins og með hangandi hendi. 

En lítið skemmtilegar eru þessa endalausu umræður um peningamál og pólitík. Lífið er auðugt aðf heillandi viðfangsefnum sem taka þessum málefnum fram þó þau séu að vísu mikilvæg. En fyrr má nú rota en dauðrota.

 

Búið er að finna brak og lík úr flugvélinni sem fórst yfir Atlantshafi í byrjun mánaðarins.  Rannsókn á líkunum er talin geta svarað ýmsum spurningum um slysið. En erfitt verður að upplýsa það sem gerðist ef svarti kassinn finnst ekki.

Fordæmi eru fyrir því að flugvél hverfi sporlaust yfir hafsæði. Ein fórst árið 1962 yfir vestanverðu Kyrrhafi og fannst aldrei neitt brak úr henni eða nokkrar vísbendingar um eitt né neitt. Er það slys talið það dularfyllsta af öllum flugslysum. 

Þetta nýja slys er líka einstaklega leyndardómsfullt.

 

 


mbl.is Stærsta svikamál frá stríðinu
Tilkynna um óviðeigandi tengingu við frétt

Nú er sumar, gleðjist gumar

Gaman er í dag! Sól og blíða. Ég var í gönguferð um vesturbæinn. Við Pétursbúð á Ægisgötu var búið að setja upp borð og fólk fékk pylsur og gos. Ekkert tilefni. Bara sólskinsskap og lífsgleði.

Mali er fjúkandi vondur yfir icesave-reikningunum og segist ekki borga neitt. En ég nenni ekkert að hlusta á hvæsið í honum og vera reiður honum til samlætis. Er þetta ekki bara óhjákvæmilegt? Hvað á að gera? 

Í dag ætla ég bara að vera glaður og kátur og horfa á þegar næstbesta fótboltalið í heimi skíttapar fyrir 92. besta liði í heimi.


Veðrið í háloftunum þegar þotan fórst yfir Atlantshafi

Í gær bloggaði ég um frétt um það þegar farþegaþotan fórst yfir  miðju Atlantshafi.  Kvartaði ég yfir því að hafa hvergi séð veðurfræðilegar skýringar. Í athugasemdum við færsluna bentu veðurfræðingar á vef þar sem  veðurfræðingur gefur ýtarlegar skýringar á því veðri sem var þar sem  vélin fórst.

Þessar skýringar má finna hér og hér

Vegna þess hve margir hafa sýnt þessu einkennilega slysi mikinn áhuga sé ég ástæðu til að vekja athygli á þessum veðurfræðilegu skýringum í sérstakri færslu, af því að þetta var falið inni í athugasemdunum, til þess að þær fari ekki framhjá neinum sem les þessa bloggsíðu og áhuga hafa.

 


Vantar í fréttina

Flugvélin flaug inn í svartan  skýjabakka og kerfi hennar fóru að bila. Sagt er í fréttinni að sé þetta rétt bendi það til þess að vélin hafi liðast í sundur á flugi.

En það vantar allt orsakasamhengi. Afhverju fara kerfin til dæmis að bila þó vélin fljúgi inn í svart ský sem eflaust gerist oft á þessari flugleið.

Ýmislegt fleira hefur mér fundist einkennilegt í fréttum af þessum atburði. Það hefur til að mynda ítrekað verið sagt að ólíklegt sé að einhver hafi komist lífs af þó allir viti að það sé alveg fullkomlega víst að allir hafi farist. 

Ég sakna þess að hvergi hef ég séð gerða grein fyrir veðurskilyrðunum sem voru á  þessu svæði. Samt er jörðin vöktuð af veðurtunglamyndum.

Þessi atburður vekur athygli fólks og óhug. Sérstaklega er það óhugnanlegt að vélin farist á fullum hraða og í hæstu flughæð. Maður hefur alltaf talið sér trú um að flug við slíkar aðstæður bjóði upp á fáar hættur. Þær séu mestar við flugtak og lendingu.

Flugslys er ein af mínum litlu þráhyggjum. Fréttirnar af þessu slysi ollu því að í nótt vakti ég til klukkan hálf fjögur við að horfa á Air ChrasInvestigate á netinu.

Þetta slys finnst mér samt slá allt út í dularfullum hryllingi. Það minnir líka á þátt tilviljana. Einn Íslendingur fórst með vélinni. Á hverjum degi eru þúsundir millilandaferða með flugi. Líkurnar á að Íslendingur sé með vél sem ferst í fjarlægum heimslutum eru mjög litlar. Samt gerðist það.

 

 


mbl.is Líklegt að vélin hafi brotnað í lofti
Tilkynna um óviðeigandi tengingu við frétt

Ég fór á Dalai Lama

En ég ætla samt ekki neitt að mæra ''þennan tækifærissinna með póstkortafílosófúna''. Enda var tilefnið ''kærkomið fyrir sjálfhverfa vesturlandabúa til að slá sig helgi og sjálfsþjónkandi réttlætisslepju''. 

Dali Lama er víst bara ''hræsnari og til þess gerður út að valda óeiningu, enda mun CIA greiða stóran hluta af reikningum hans.''

Það eru bara ''rétttrúnaðarfasistar'' sem nenna að hlusta á hann. 

Þetta segja mér þeir spöku og einstaklega hógværu og í hjarta lítillátu menn sem virkilega hafa kynnt sér málin og fara aldrei með opinbert fleipur.

Dalai Lama er víst eftir allt saman bara í algjöru lamasessi.

Það held ég nú.

Það er nú líkast til. 


Ekki fisjað saman

Kristnum ofsatrúarmönnum er ekki fisjað saman. Dalai Lama, friðarverðlaunahafi Nóbels, er nú staddur hér á landi og hefur ýmislegt verið um hann bloggað og flest vinsamlegt eða að minnsta kosti kurteislegt . Þessi athugasemd kom þó frá kristnum trúarbloggara inn á bloggsíðu Jóns Vals Jenssonar sem sjálfur hefur bloggað vinsamlega um Dalai Lama:

''Jón minn DL og speki hans er ekki að ofan heldur að neðan, jarðnesk og djöfulleg!!'

Það er undrunarefni að Jón Valur skuli leyfa þessari athugasemd  að standa, þessu dæmalausa  persónuníði um einhvern virtasta mann heimsins sem þekktur er fyrir vinsemd í garð allra stóru trúarbragðanna, því samkvæmt klausu á  bloggsíðu hans er tekið fram að dónalegar og óheflaðar persónuárásir séu ekki leyfðar í athugasemdum og guðlasti verði útrýmt.

Skyldu þessi orð hafa fengið að standa á síðu Jóns Vals ef þau hefðu verið um páfann?

Það er hins vegar sífellt umhugsunarefni hvers vegna Morgunblaðið amast aldrei við   trúarofsasíðum sem eru á bloggvef þess en er hins vegar að gera athugasemdir við ýmsar aðrar síður og jafnvel setja þær í bann.

Kristnum ofsatrúarmönnum er ekki fisjað saman. Og Morgunblaðið er þeim skjól fyrir  ofstæki þeirra. 


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband