Bloggfærslur mánaðarins, október 2015

Hlýjasti dagur mánaðarins var í gær

Í gær var hlýjasti dagur mánaðarins. Landsmeðalhiti var 8,7 stig.

Í Reykjavík var sólarhringsmeðaltalið það hæsta síðan a.m.k. 1948 eða 9,4 stig og hámarkshitinn, 12,1 stig, var einnig sá mesti á sama tíma. Og sólin skein í hálfa þriðju klukkustund.

Ekki að furða þó David Cameroon hafi verið með flakandi um hálsinn í sjónvarpsviðtali niður við gömlu Reykjavíkurhöfn!

Meðalhiti mánaðarins er nú orðinn meiri í Reykjavík en á Akureyri en lengi framan af var því öfugt farið. Enn er þó hlýjast á austurlandi.

Og mánaðarhitinn ætlar að verða vel yfir meðallagi á landinu, gömlum jafnt sem nýjum.


Skrár tengdar þessari bloggfærslu:

Fyrsta haustfrost í Reykjavík

Í gærkvöldi um áttaleytið fór að frjósa í Reykjavík og varð frostið i nótt mest -3,8 stig. Ef við dagsetjum frostið í dag, 26. október, til sæmræmis við mælihætti Veðurstofuunnar hefur frostlausi tíminn verið 166 dagar en meðaltalið á þessari öld er 149 dagar. Síðast fraus í vor 12. maí í Reykjavik.

Meðalhitinn á Akureyri í gær var undir frostmarki, -1,1, stig, i fyrsta sinn síðan 8. maí. Dagurinn í dag mun einnig verða undir frostmarki að meðalhita í Reykjavík en það gerðist síðast þar 27. apríl. 

Meðalhitnn á landinu fellur auðvitað þessa köldu daga en góðum hlýindum er spáð á miðvikudaginn og svo áfram alveg sæmilegt til mánaðarloka. Oktober mun því standa sig nokkuð vel hvað hitann varðar.  

 


Skrár tengdar þessari bloggfærslu:

Fyrsti snjór á Akureyri og víðar

Fyrsti snjórinn í haust á Akureyri var í morgun. Þar var alhvítt en snjódýpt 1 cm. Víða við Eyjafjörð var alhvit jörð, allt upp í 7 cm á Þverá í Dalsmynni.

Alhvítt var einnig í morgun á nokkrum öðrum stöðum víðs vegar um landið, þar með talið 2 cm á Keflavíkurflugvelli og 4 cm á Vogsósum. Mestur er snjórinn þó eins og síðustu daga í Svartárkoti 27 cm og á Mýri í Bárðardal, 15 cm. 

Hér og hvar á landinu var jörð flekkótt af snjó, eins t.d. í Reykjavík.

Alautt er svo víða við Breiðafjörð nema í Dölum,á Vestfjörðum, norðvesturlandi og suðausturlandi. Á suðurlandi er flekkótt við ströndina en snjólaust inn til landsins. E

Enn hefur ekki mælst frost í Reykjavík. 


Skrár tengdar þessari bloggfærslu:

Úrkomumusamur október það sem af er en víða hlýr

Úrkoman í Reykjavík það sem af er mánaðar er nú komin í 137 mm. Það er einfaldlega meiri úrkoma en áður hefur mælst þar fyrsta 21 dag októbermánaðar frá því Veðurstofan var stofnuð 1920 og einnig þau ár sem októberúrkoma var mæld í bænum á vegum dönsku veðurstofunnar, árin 1886-1906. Úrkoma hefur fallið hvern einasta dag. Næst mesta úrkoma þessa daga var 130,6 mm árið 1936. Október það ár þegar han var allur er reyndar úrkomusamasti október sem mælst hefur í höfuðborginni, 180,8 mm. Minnst úrkoma i Reykjavik þessa daga er 10,8 mm í október 1966 sem þegar upp var staðið var sólríkasti október sem þar hefur mælst en ansi kaldur.

Enn eru 10 dagar eftir af mánuðinum og þarf úrkoman að verða 51 mm til að jafna úrkomuna árið 1936. 

Mest hefur úrkoman verið á vestanverðu landinu og syðst á því.Í Drangshlíðardal undir Eyjafjöllum er úrkoamn komin yfir 400 mm. Á Akureyri er úrkoman hins vegar aðeins 21 mm.

Meðalhitin fyrstu 20 dagana í mánuðinum er 5,7 í Reykjavík sem er ekki nema 0,9 yfir meðallaginu 1961 til 1990 en 0,2 stig UNDIR meðallaginu á þessari öld. 

Öðru máli gegnir um norður og austurland. Á Akureyri er meðalhitinn heil 3 stig yfir meðallaginu 1961-1990. Þar er meðalhitinn 6,3 stig. Dalatangi bætir um betur með meðalhita upp á 7,45 stig, Neskaupstaður með 7,2 en Seyðisfjörður með um 7,5 stig. Á síðast talda staðnum er meðaltal daglegs hámarkshita 11,5 stig. Það væri þolanlegt sumarástand á þeim bæ.

Tiltölulega hlýjast er hins vegar í innsveitum á norðausturlandi og helst til fjalla, allt upp í þrjú stig yfir meðalhita síðustu tíu ára hvað þá annarra ára. Reykjavík er þarna mjög neðarlega á blaði tiltölulega en Mýrdalurinn allra neðst ásamt sveitunum undir Eyjafjöllum.

Menn á netsíðum hefur verið að lofa mjög haustið í Reykjavík þó það sé svona úrkomusamt og hitinn svo sem ekkkrt til að hrópa sérstakt húrra fyrir. En hvorki hefur enn frosið ne snjóað. Og fólk finnur fyrir því. Sjö af októbermánuðum þessarar aldar hafa verið hlýrri fyrstu 20 dagana í Reykjavik og um 28 á árunum 1920 til 2000.Allra hlýjastur þessa daga var október 1959 með 9,5 stig (júníhiti), 1946 með 8,6, 2010 með 8,4 og 1965 með 8,2 stig. Hlýjasti október allur, 1915, var líklega með um 8,4 stig fyrstu 20 dagana en endaði í 7,9 stigum.     

Og nú fer ekki aðeins að kólna heldur er í uppsiglingu eitt af mestu kuldaköstum í október - ef spár ganga eftir. 


Skrár tengdar þessari bloggfærslu:

Haust

Nú er hiti á láglendi svona 4-9 stig. Hann er nærri meðallagi árstímans. Hitinn um hádaginn  er nær alls staðar undir tíu stigum og hvergi er nærri því að vera frost. Við þetta hitastig á þessum árstíma gæti auðvitað verið rigning og hvassviðri þó svo sé ekki nú.

En það er þetta hitaástand sem kortin sýna sem mér finnst að sé alveg dæmigert  haustveður. Enginn sumarhiti en veturinn samt víðs fjærri. Breytti engu þó hitinn væri tveimur til þremur stigum lægri.

Og haustveðrið í dag sýnir hvílíkt fjarstæða það er að byrja að tala um að komið sé haust í byrjun september eða um miðjan ágúst eða jafnvel upp úr verslunarmannahelgi eins og margir eru þó að segja á hverju einasta ári þó fari að rigna eða hvessa síðsumars með hita víðast hvar vel yfir tíu stigum og kannski hátt upp í tuttugu á stöku stað.

Takið nú vel eftir hvernig haustið hagar sér! 

Það hefur hvorki á sér sumar né vetrarblæ.


Skrár tengdar þessari bloggfærslu:

Meira en meðal mánaðarúrkoma þegar fallin í Reykjavík

Þegar aðeins 9 dagar eru liðnir af mánuðinum er úrkoman í Reykjavík 99,3 mm. Það er meira en meðalúrkoma alls októbermánaðar 1961-1990, hið venjubundna viðmiðunartímabil, svo munar 14 mm en 25 mm yfir meðalúrkomu alls mánaðarins á þessari öld. (Einnig hvort tveggja yfir meðaltölunum 1971-2000).

Strax í fyrrdag var úrkoman kominn upp í meðalúrkomu alls októbermánaðar. Og þetta er reyndar mesta úrkoma sem fallið hefur í mælingasögunni þessa fyrstu níu októberdaga í Reykjavík og er hvorki meira né minna en um eða yfir fjórföld meðalúrkoma þessara daga ef miðað er bæði við þessa öld og tímabilin 1961-1990 og 1971-1900.

Úrkoman er þessa fáu daga einnig komin upp fyrir mánaðarmeðallag á nokkrum fleirum stöðvum.

Á Akureyri er úrkoman það sem af er hins vegar aðeins 12,3 mm. Og er lítil um miðbik norðurlands og víðar. 

Snjólaust er á landinu á veðurathugunarstöðvum.

 


Skrár tengdar þessari bloggfærslu:

Fyrsti haustsnjór í byggð á veðurstöðvum

Í morgun var jörð alhvít á Augastöðum í Borgarfirði og snjódýpt var 4 cm. Einnig var alhvítt á Ísafirði. Í Bolungarvík var gefin upp 5 cm snjódýpt þó ekki væri þar talin alhvít jörð. Flekkótt var einnig talið á Korpu, Nesjavöllum, sunnanverðu Snællsnesi og á fáeinum stöðvum á vesturandi og við Ísafjarðardjúp.

Í gærmorgun var Esjan hvít ofan til en i morgun alveg niður í fjallsrætur.

Ekki hefur enn komið næturfrost í Reykjvík.


Skrár tengdar þessari bloggfærslu:

Sjötta martröð fyrir íbúa við Höfðatorg

Íbúum við Höfðatorg hefur verið tilkynnt að sjötti áfangi framkvæmda við torgið sé að hefjast með tilheyrandi sprengingum og borvinnu. Borvinnan er verst en hún stendur oft frá morgni til kvölds og er algjörlega óþolandi en sprengingar eru fáar á dag en eru samt mjög óþægilegar. Ekki er tekið fram i tilkynningu til íbúa hvað þetta tekur langan tima.

Já, þetta er í sjötta sinn sem íbúar verða að lifa þessa martröð sem staðið hefur með nokkrum hléum árum saman. Hægt er að ætlast til að fólk sýni "skilning" á "nauðsynlegum" framkvæmdum sem taka nokkurn tíma og lýkur svo. En það gegnir öðru máli um framkvæmdir sem byrja aftur og aftur og aftur, ár eftir ár, og virðast aldrei ætla að taka enda.

Enginn takmörk virðast fyrir því í hvað langan tíma borgaryfirvöld leyfa mikið rask i fjölmennri íbúðabyggð. Hagsmunir verktaka ráða öllu í borginni. 

Morgunblaðið hefur fylgst með framkvæmdunum á Höfðatorgsreitnum og skrifað um þær reglulegar lofrollur. Hva, ætlar blaðið á ekki að fara að taka við sér með sjötta áfangann?! Á kvartanir íbúa vegna endalauss ónæðis hefur blaðið drepið á í algjöru framhjáhlaupi en hefur aldrei fjallað um það að neinu marki. 

Fréttablaðið gerði það þó einu sinni og það á forsíðu.

Þá var talað við Dofra Eysteinsson verkstjóra  jarðvinnunar sem er á vegum Suðurverks og ósköpunum veldur fyrir íbúana. "Það fylgir sögunni að gera þetta svona og það fer ekki framhjá neinum." Í þessu hranalega orðalagi verksjórans, sem sýndi íbúum nákvæmlega engan skilning þó hann færi fram á skilnig frá þeim, gneistaði af honum fyrirlitningin og pirringurinn í garð íbúa sem voru að kvarta. Og þetta er einmitt mentalitetið hjá þeim sem að framkvæmdum standa og ekki síður hjá þeim sem leyfa þær í heilan áratug innan um þétta íbúðabyggð: Við gerum þetta bara eins og okkur sýnist og þið íbúarnr getið bara étið það sem úti frýs og ættu að halda ykkur saman.

Þetta eru hugarfarslegir ávextir hamfarastefnunar "þétting byggðar" fyrir þá sem búa miðsvæðis í borginni. Höfðatorgsreiturinn er bara einn af mögum hávaðasvæðum í miðborgunni þó framkævmdir þar séu áreiðanlega þær allra langvinnustu.  

Í áróðri og auglýsingum þeirra sem standa að byggingunum á Höfðatorgi er fullyrt að það verði með glæsilegustu hverfum borgarinnar. Um það eru þó verulega skiptar skoðanir. Ítrekað hefur komið fram hér og hvar að mörgum finnst þetta svæði algjörlega misheppnað með sínum andstyggilegu turnum sem hafa til dæmis breytt vindafari til hins verra og varanlega á stóru svæði umhverfis. 

Kemur svo ekki að þvi að verktakar vilji alveg ólmir, með hjálp Reykjavikurborgar, ryðja eldri íbúabyggð í grenndinni í burtu og reisa í staðinn fleiri turnaófreskjur?

Er það ekki bara tímaspursmál?

 


Sumri lokið

Nú er sumri lokið en Veðurstofan hefur alla tíð talið sumarið vera frá júní til september.

Meðalhitinn í september í Reykjavík var 9,14 stig, 1,8 stig yfir meðallaginu 1961-1990,  en á Akureyri 9,55 eða 3,20 stig yfir meðallaginu. Í Reykjavík er hitinn 0,44 stig yfir meðallaginu það sem af er þessarar aldar en 1,49 stig á Akureyri. Þetta er þá eini sumarmánuðurinn sem er fyrir ofan það meðallag og jafnframt eini sumarmánuðurinn sem  er hlýrri á Akureyri en í Reykjavík. 

Meðalhiti sumarsins er þá 10,12 stig í Reykjavík eða 0,48 stig undir meðallagi þessarar aldar. Kaldara var 2013 (9,53) og 2005 (9,75). Meðalhitinn er sjónarmun hærri en hlýja langtímameðallagið 1931-1960 en 0,9 stigum hærra en á kalda meðallaginu 1961-1990.

Á Akureyri er meðalhiti sumarsins 9,18 stig sem er 0,9 stig undir meðallagi þessarar aldar en 0,1 stig YFIR meðallaginu 1961-1990 (munar mest um september) sem reyndar er enn í gildi sem viðmiðunartímabil en 0,4 stig undir hlýja meðaltalinu 1931-1960.

Úrkoman í Reykjavik var um 76% af meðalúrkomu sumranna á þessari öld og allir sumarmánuðrnir nema ágúst voru undir úrkomumeðallaginu. 

Á Akureyri má segja að sumarúrkoman hafi verið nákvæmlega í meðallagi aldararinnar. Úrkomunni var þó mjög misskipt milli mánaða, sú fjórða minnsta í júní en fjórða mesta í ágúst.

Júlí var sérstaklega hraklegur á Akureyri. Hann var sá þriðji sólarminnsti (frá 1926)  og sjöundi kaldasti (frá 1882, kaldasti frá 1993).

Ágúst var hlýjasti sumarmánuðurinn á landinu en september líklega næst hlýjastur, greinilega hlýrri en júní og virðist vera sjónarmun hlýrri en júlí. Þetta er óvenjulegt. Árin 1901, 1941, 1993 og 1996 var september líka næst hlýjasti mánuður ársins. En september 1958 gerði sér lítið fyrir og varð hlýjasti mánuður ársins á landinu!  

Sólskinsstundir í Reykjavík voru 699 eða 8 stundum færri en meðaltal þessarar aldar en fleiri en að meðaltali bæði árin 1931-1960 og 1961-1990.

Reykvíkingar mega sæmilega una við þetta sumar en það verður ekki sagt um flesta aðra landsmenn. Þó var september alls staðar góður og ágúst var líka alveg þokkalegur. 

En það var júlí sem brást illilega og fyrri hluti júnímánaðar.   


Skrár tengdar þessari bloggfærslu:

Innskráning

Ath. Vinsamlegast kveikið á Javascript til að hefja innskráningu.

Hafðu samband