Kuldamet fyrir norðan

Í nótt fór frostið á Grímsstöðum á Fjöllum niður í 8,0 stig. Það er mesta frost sem mælst hefur þennan dag og á þessum árstíma á mannaðri veðurstöð.

Meðalhiti mánaðarins er nú minna en eitt stig yfir meðallagi í Reykjavík en er hálft stig yfir því á Akureyri. Enginn alvöru hlýindi eru boðuð framundan og þó hlýni sums staðar í einn eða tvo daga virðist sem aftur sæki í kuldafar út mánuðinn. Kannski lafir þó mánuðurinn í hitameðallaginu að lokun.

Mest snjódýpt í morgun var 8 cm á rafstöðinni við Skeiðsfoss í Fjótum. Jörð er ekki talin alhvít þar sem mest hefur snjóað á norðausturlandi. Snjóinn tekur hratt upp. Í dag var talið alautt í Neskaupstað en í gærmorgun var þar alhvítt og sjódýpt 12 cm.

Á einhverjum netfréttamiðli las ég að í gær hafi snjódýptin verið 60 cm á Egilsstöðum. Ekki fylgdu frekari skýringar. Á þessum slóðum eru ekki neinar snjódýptarmælingar sem koma inn á vef Veðurstofunnar.

Á vef Veðurstofunnar koma upplýsingar frá ýmsum mönnuðum úrkomustöðvum, en þar eru líka gerðar snjódýptarmælingar, afar óreglulega og sumar stöðvar mega heita nánast dauðar og engar eða fáar hafa verið alveg samfelldar t.d. í þessum mánuði á vefnum. Allra verst er Stafafell í Lóni.

Nú efast ég ekki um að athugunarmenn geri athuganir og skrái þær. En þeir hirða ekki um að koma athugununum til Veðurstofunnar. Þeir fá samt greitt fyrir að gera athuganir og þeir hljóta að gera sér ljóst að athuganirnar eru hluti af almannatengslum stofnunarinnar sem þeir eru að starfa fyrir - ekki einkamál milli þeirra og hennar- og birtast almenningi á vef Veðurstofunnar þegar þær berast þangað. Að koma skráningunni áleiðis hlýtur því að vera ein af þeim skyldum sem athugunarmenn gangast undir þegar þeir taka athuganir að sér - fyrir borgun. 

Og ég segi því bara þó það hljómi kannski harkalega: Þegar athugunarmenn senda ekki upplýsingar sem birtast þá ekki á vef Veðurstofunnar eru þeir einfaldega að bregðast skyldum sínum við almenning. 

Annars virðist líka vera einhver óregla á ýmsum mönnuðum veðurathugunarstöðvum öðrum en úrkomustöðvum. Það eru alltaf að koma þar eyður en slíkar eyður voru sjaldgæfar hér áður fyrr. 

Höfn í Hornafirði er sérlega slæm.

Jafnvel Stórhöfði, sem var lengst af ein af öruggustu veðurathugunarstöðvunum, er stundum að klikka. En aldrei klikkar nú Dalatanginn! Gaman af heimsókninni þangað í Landanum.

Reykir í Hrútafirði og Miðfjarðarnes eru stundum stopular og í minna mæli Hjarðarland og jafnvel Hæll i Hreppum og stundum Eyrarbakki. Upp á síðastastið hafa Bolungarvík og Æðey  verið að hlaupa út undan sér. Í dag Bergsstaðir.

Ég undra mig svo á því hvers vegna Þverfjall er aldrei inni í yfirliti um köldustu fjallastöðvar þó þar sé einmitt alloft mesti kuldinn, ekki síst síðustu daga. Er þetta eitthvað afbrigðileg stöð? 

Það mætti fara að endurnýja töflurnar fyrir mönnuðu stöðvarnar sem sumar eru reyndar hættar. Þar er greint frá hámarks og lágmarkshita og úrkomumagni frá klukkan 9-9 og frá kl 18 til 18. Mér finnst að úrkoman mætti alltaf vera frá klukkan 9-9 en aldrei hámarks og lágmarkshitinn. Hann ætti að vera frá kl. 9-18 og svo aftur á morgnana frá kl. 18-9. Það er alveg út í hött fyrir almenning og beinlínis villandi að hafa þessar tölur frá kl. 9-9 og frá 18-18. Úrkoman mætti gjarnan líka koma frá kl. 9-18.

Þetta er nú annars meira nöldrið og skal verða langt  til annars slíks!

 

 

Skrár tengdar þessari bloggfærslu:

• akrv_2011_29_0.xls

Athugasemdir

[S i g u r ð u r S i g u r ð a r s o n, 25.5.2011 kl. 14:42]

Þú getur borið hitastig á Þverárfjalli við opinberar tölur á Blönduósi og einnig sjálfvirka stöð á Skagaströnd;

http://vedur.mogt.is/harbor/?action=Stations&harborid=7

Þó hún sé ekki opinber má ugglaust draga einhvern lærdóm af tölum sem þar fást, ekki síst í samanburði.

[Sigurður Þór Guðjónsson, 25.5.2011 kl. 14:56]

Ég er ekki að tala um Þverárfjall á Skaga heldur Þverfjall á Vestfjörðum milli Önundarfjarðar og Skutuslfjarðar. Upplýsingar þaðan má sjá bæði á kortum og á sérstökum lista, frá klukkustund til klukkustundar eins og aðrar sjálfvirar stöðvar á vegum VÍ. En hún er hins vegar aldrei tekin með á öðrum sérlista sem Veðurstofan birtir um mesta kulda sem mælst hefur á fjallastöðvum, þar koma tölur sem eiga að vera mesti kuldi á fjöllum frá öðrum fjallastöðvum þó þær séu lægri en mælst hefur á Þverfjalli sem alltaf er bara sleppt. En stundum mælist þar mesta frost á öllu landinu en kemur ekki fram á dagshitametalista Veðurstofunnar.

[S i g u r ð u r S i g u r ð a r s o n, 25.5.2011 kl. 15:00]

Svona getur maður nú hlaupið á sig. Þverárnar eru svo margar sem og dalirnir og fjöllin sem við þær eru kennd.

[Sigurður Þór Guðjónsson, 25.5.2011 kl. 15:03]

Ég er alltaf að hlaupa á mig og bulla!

[Trausti Jónsson, 25.5.2011 kl. 17:37]

Dægurkuldamet voru einnig slegin á sjálfvirkum stöðvum. Í gær (24.) sló Brúarjökull með -12,7 stig út eldra met (-7,7) frá Gagnheiði 2005 og í dag sló sama stöð út sig sjálfa frá 2006 (-10,5),með -13,8 stigum.

Þverfjall er meðal fáeinna stöðva sem sleppt er í listum vegna þess að þar var fullmikið af trufluðum tölum þegar farið var að birta listann reglulega, Straumnesviti er einnig í þessum sama flokki og fáeinar fleiri.

[Sigurður Þór Guðjónsson, 25.5.2011 kl. 18:17]

Datt eitthvað svona svo sem í hug með Þverfjall. Trufluð og verulega afbrigðileg stöð!

[Pálmi Freyr Óskarsson, 27.5.2011 kl. 02:43]

Sæll Sigurður Þór

Takk fyrir fróðleikan hér blogginu þínu. Ég og faðir minn förum mjög reglulega hér inn.

Sé að þú ert að gagnrýna réttilega okkur Veðurathugunarmenn um óreglu í sendingu veðurskeyta.

Mín skýring á óreglu hér á Stórhöfða er sú að faðir minn fór fyrir nokkrum árum  á eftirlaun. Og ég hef síðan verið einn með veðurathugarnir á Stórhöfða. Og það tekur ansi á andlega hliðina að vera í þessu starfi einn. Og ég er bara ekki að neina þessu lengur. Enda er ég að hugsa alvarlega um veru mína í þessu starfi. Svo eru launin líka ekki uppá marga fiska. Það sem heldur mér gangandi er metnaður og þrjóska.

Ég viðurkenni óreglu hjá mér á veðurskeyti frá Stórhöfða núorðið. Enn þau berast flest öll til höfuðstöðvarirnar þótt seint sé.

Kveðja, Pálmi Freyr