Veðurfarið árið 2013 að sögn völvunnar

Árið 2013 heilsar okkur með heldur aðgerðalitlu veðri, og verður þannig sennilega allan janúarmánuð, en þá breytir um og margar krappar lægðir eiga eftir að lenda hjá okkur í febrúar og mars.

Það verður sem sagt umhleypingasamt í febrúar og mars en fremur hlýtt hér sunnanlands. Í öðrum landshlutum verður mikill snjór enda norðlægar áttir ríkjandi meirihluta vetrar.

Snjóflóð

Ég er hrædd um að snjóflóð verði sem tekur mannslíf, mér sýnist það vera á Vestfjörðum norðanverðum. Þar sem veður verða rysjótt verður einnig erfitt fyrir sjómennina að stunda sína vinnu...

Hlýtt sumar

Tíðarfar sumarsins verður misjafnt en sumarið í heild sinni verður hlýtt, en kemur seint á Norðurlandi og Vestfjörðum. Vestan- og sunnanlands verður rakt og hlýtt vor, en sólin skín má segja í allt sumar og fá Sunnlendingar sannkallað sumar, hlýtt en mætti vera meiri væta á köflum. Fyrir norðan og vestan verða júlí og ágúst sólríkir og nokkuð hlýir en júní kaldur og þurr. Á Austurlandi verður einnig gott um miðbik sumarsins, en ansi mikil úrkoma og þungbúið veður yfir stóran hluta sumars.

Árið endar með miklum veðurhvelli, það verður bæði hvasst og mikil ofankoma. Mér sýnist mannvirki vera þar í hættu og eitthvað verður um rafmagnsleysi yfir áramótin. -

Ég skal segja ykkur það! 

Skrár tengdar þessari bloggfærslu:

• akrv_2012_75_0.xls

Athugasemdir

[Sigurður Þór Guðjónsson, 22.12.2012 kl. 19:43]

Hlakka til þessa sólarsumars!

[Emil Hannes Valgeirsson, 22.12.2012 kl. 21:21]

Er þetta ekki bara nokkuð svipað síðustu sumrum?

[Sveinn Atli Gunnarsson, 22.12.2012 kl. 21:30]

Það verður væntanlega hægt að kenna hnattrænni hlýnun um veðurfarið á árinu 2013 líka - þar með talið kulda, hlýindi, rok, logn, rigningu og sól, svo ekki sé minnst á aflabrögð sjómanna! Og hana nú!

[Sigurður Þór Guðjónsson, 22.12.2012 kl. 22:31]

Minnstu ekki á það Svatli! Allt ykkur kolefnisklerkunum að kenna! Gleðileg jól til ykkrar allra! Og hana nú!

[Sveinn Atli Gunnarsson, 23.12.2012 kl. 00:00]

Ætli skattbyrðin verði ekki okkur að kenna líka - með nýjum ofur kolefnissköttum - ég spái því!

Jólaveðja,

Jólakolefnisklerkurinn

[Ágúst H Bjarnason, 23.12.2012 kl. 09:54]

Svo spáði hin eina sanna Völva:

    Sól tér sortna,
    sígur fold í mar,
    hverfa af himni
    heiðar stjörnur.
    Geisar eimi
    við aldurnara,
    leikur hár hiti
    við himin sjálfan.

[DoctorE (IP-tala skráð) 24.12.2012 kl. 12:22]

Maður er alveg gáttaður á þessu völvu bulli. Þetta fólk hefur líðandi stund og svona sem viðmiðun en annars er þetta eins og að kasta tening að fá spádóma.
Lögreglan fór að hlusta á þetta lið/miðla í sambandi við strokufangann, sagðist hlusta á allt, HALLÓ lögga hættið að hlusta á og fara eftir ruglukollum :)

[Skákfélag Akureyrar, 31.12.2012 kl. 17:33]

Eg er óforbetranlegur Norðlendingur og samþykki enga spá sem ekki gerir ráð fyrir sólasumri Norðanlands. Langt síðan við höfum fengið slíkt og nú reynir á Drottin allsherjar að sýna fram á að hann er ekki síðri landsbyggðarmaður er Gísli Einarsson!