Fáfengileg veðurtölfræði fyrir 17. júní

Nú hafa liðið 70 þjóðhátíðardagar en dagurinn í dag er sá 71.

Meðalhiti þessa dags á lýðveldistímanum í höfuðborginni er 9,6 stig en 10,5 á þessari öld. Hæsti meðalhiti var 13,1 stig árið 2005 en lægstur 4,8 árið 1959, þann illræmdasta 17. júní hvað veðrið snertir.

Meðaltal hámarkshita þennan dag síðustu 70 árin er 12,2 stig. Hlýjast varð 17,4 stig árið 2005 og minnsti hámarkshiti var 7,3 stig 1959.

Meðaltal lágmarkshita er 7,1 stig en lægst 2,3 stig 1959 en mestur hefur lágmarkshitinn verið 9,5 stig árið 1955. 

Engin úrkoma hefur mælst í Reykjavík að morgni 18. júní, sem mælir þá úrkomu frá kl. 9 á þjóðhátíðardaginn og áfram fram á næsta morgun í 33 skipti af 70 eða í 47% daga. Það hefur því ekki alltaf verið "rok og rigning". Úrkoma meiri en 1 mm hefur mælst í 21 dag.  Mest mældist 13,7 mm árið 1988.

Meðaltal sólskinsstunda á þjóðhátíðardaginn er 5,1 klukkustund í borginni. Mest sól var árið 2004, 18,3 stundir en 11 sinnum hefur alls engin sól mælst, síðast 1988. Sól hefur skinið meira en tíu klukkustundir í 13 daga. Nokkuð ber á því að sautjándinn sé sólríkur í Reykjavík nokkur skipti í röð eða þá rigningarsamur og þungbúinn nokkur skipti í röð.

Mesti hámarkshiti á Akureyri á lýðveldistímanum er 23,5 stig árið 1969 sem er jafnframt mesti hiti sem mælst hefur á þjóðhátíðardaginn á öllu landinu en sami hiti mældist 1977 í Reykjahlíð við Mývatn. Minnsti lágmarkshiti á Akureyri er 0,4 stig árið 1959. Tölur fyrir meðalhita á Akureyri liggja ekki fyrir nema frá og með 1949 en síðan þá er meðalhiti mestur á 17. júní 15,1 stig árið 1969 en kaldast 1,5 stig 1959.

Hlýjasti þjóðhátíðardagurinn að meðaltali frá 1949 á öllu landinu var 1966 11,2 stig á skeytastöðvum en sá kaldasti var 1959, 1,8 stig.  Minnsti hámarkshiti á landinu á sautjándanum alveg frá 1944 er 10,6 stig þann hræðilega dag 1959. Hér verður ekki farið út í illvirði á 17. júní en 1959 myndi þar áreiðanlega verða ofarlega á blaði. Mesti kuldi sem mælst hefur á þjóðhátíðardaginn á landinu er -4,8 stig á Skálafelli árið 2010 en í byggð -2,9 stig á Staðarhóli í Aðaldal árið 1981.

Sólríkasti 17. júní á landinu er örugglega 1991 þegar sólin mældist 15-18 stundir á öllum mælingastöðum nema á Melrakkasléttu þar sem voru 10 stundir af sól. Þetta er sólríkasti 17. júní á Akureyri með 18 klukkustunda sólskin. 

Mest úrkoma að morgni 18. júní á landinu hefur mælst 167,1 mm á Gilsá í Breiðdal árið 2002. 

Dagurinn í dag er mjög hlýr fyrir norðan og austan og hefur hitinn þegar allvíða þar farið yfir tuttugu stig, mest 22,7 á Húsavík. 

Á fylgiskjali má sjá kort af veðrinu á Íslandi kl. 17 (kl. 18 að núverandi hætti) 17. júní árið 1944. Kortið stækkar ef smellt er á það.  

 

 

Skrár tengdar þessari bloggfærslu:

• akrv_2014_13_0.xlsx
• 1944_0617.png