Guðsmennirnir eru bara farnir að vitna í mig!

Á sunnudögum er í Morgunblaðinu fastur dálkur með kristilegri hugvekju. Í dag er þar vitnað heilmikið í færslu mína um Jesúauglýsingu Símans. 

Á dauða mínum áti ég von en því að ætti fyrir mér að leggja að vitnað væri í mig með velþóknun í slíkum dálki. En skrif mín voru sanngjörn og skynsamleg og sóma sér bara vel á þessum stað sem lokaorð.

Ég átti kannski ekki von á því að rata í kristilegan dálk vegna þess að ferill minn hefur ekki beinlínis verið til þess líklegur. Ég hef oft gagnrýnt kirkjuna, ekki síst á fyrri árum. (Afstaða mín til trúarinnar sjálfrar hefur reyndar tekið miklum breytingum með árunum).

Og ég kærði einu sinni Sigurbjörn Einarsson biskup fyrir siðanefnd presta fyrir ummæli hans sem mér fannst gera lítið úr geðsjúku fólki. Ég skar ekki úr um málið, það gerði siðanefndin, en mér var látið skiljast af ýmsum að bara kæran sem slík væri árás á persónu biskupsins. Siðanefnin taldi að biskupinn hefði ekki brotið siðareglur presta en setti samt ofan í við hann fyrir ýmisleg ummæli. 

Ég þoli bara ekki þegar menn gera lítið úr geðsjúku fólki. Alveg sama hver er. Nei annars, ekki sama hver er, því meiri virðingar sem þeir njóta í samfélaginu því betur eiga þeir að gæta orða sinna að þessu leyti.

Það fór heldur ekki framhjá mér að margir fóru að skrifa lofræður um biskupinn meðan á þessu stóð. 

Enginn skrifaði lofræður um mig! 

En Matthías Moggaritsjjóri setti ofan í mig í leiðara án þess þó að nefna mig með nafni. Þegar blaðið skýrði svo frá niðurstöðu Siðanefndar lét það þess getið, og það kom eins og skrattinn úr sauðarleggnum, að kærandinn hefði átt við geðræn vandamál að stríða. Það er reyndar orðið æði langt síðan og hann skrifaði um það fræga bók. Tilgangur Moggans með þessari athugasemd sem kom málinu ekkert við er svo augljós að það þarf varla að benda á hann:

Sigurður er brjálaður. 

Þetta lét Mogginn sig hafa að gera. Og svo er blaðið alltaf að skrifa væmna leiðara um fordóma gegn geðsjúkum!

Mikið held ég að það sé gott á þrengingartímum að hafa her manns og þar með talið voldugar stofnanir  eins og kirkjuna og Morgunblaðið til að styðja sig eins og biskupinn hafði. Slíku fólki þarf ekki að vorkenna mikið.

Ég hef staðið í ýmsu um dagana; dómsmálum, viðkvæmum uppljóstrunum og opinberunum, en yfirleitt aldrei fengið neinn stuðning frá neinum, að minnsta kosti ekki opinberlega (og það er í fínu lagi). Jú, reyndar gerði Lára Magnúsardóttir sagnfræðingur, sem skrifað hefur ritgerð um bannfæringu kirkjunnar, sitt besta til að kynna minn málstað í biskupsmálinu í Ríkisútvarpinu. Og það af svo miklum krafti að vakti undrun mína.

Í ljósi ofanritaðs er kannski ekki að furða að mjög setti mig hljóðan þegar ég las mín eigin orð í kristilegri hugvekju dagsins í Morgunblaðinu.

En mikið andskoti eru þau elegant, skýr og skynsamleg! 

Þau myndu sóma sér vel sem leiðari í Morgunblaðinu.

Athugasemdir

[halkatla, 9.9.2007 kl. 14:57]

þetta var líka rosaleg grein hjá þér - þú ert flottastur

[María Kristjánsdóttir, 9.9.2007 kl. 14:57]

Satt segirðu- og það endar auðvitað með því að  þín skýru og skemmtilegu orð verða að leiðara.

[Jón Steinar Ragnarsson, 9.9.2007 kl. 19:53]

Jah...mikill er andskotinn.  Annars finnst mér þú Sigurður gera skynsaman greinarmun á Dogmatík og andlegri rækt...mannrækt.  Það segir mér að þú sér hugsandi maður og viljir lífinu vel. (Þótt sumum dyljist það stundum)

Einnig er ég sammála þér um fordóma hins opinbera og oft kirkjunnnar manna á geðsjúkum.  Fáfræði vafalaust og tæplega illa meint en þessi Freudean slip eru ansi algeng. Einnig hvað varðar langt gengna alkohólista, sem litið er á sem smánarblett og sjónmengun hér í bæ.  Jafnvel fyrrverandi stjórnarformaður SÁÁ og borgastjóri hefur ekki kyngt sjúkdómshugtakinu þar.

Úrræðin eru svo hverju öðru vitlausari eins og að taka bjórkæli úr sambandi og handtaka fólk fyrir að pissa utan í hús. Ætli það uppræti vandann? Ég held að Sáá sé alveg að spila rassgatið úr buxunum núna.  Þeir hljóta að vera á einhverju.  Ég legg til að þeir hætti spilakassarekstri og fái leyfi til að selja áfengisauglysingar sér til framfærslu.

[Sigurður Þór Guðjónsson, 10.9.2007 kl. 00:13]

Hvað dylst sumum annars: að ég sé "hugsandi maður" eða "vilji lífinu vel"?  

[Marta B Helgadóttir, 10.9.2007 kl. 01:11]

Þetta var mjög góð grein Sigurður.

[Jón Steinar Ragnarsson, 10.9.2007 kl. 03:24]

Fyrirgefðu klaufaskapinn svona átti þetta ekki að koma út. Góð meining, sem fór hjá garði í flumbrugangi á lyklaborðinu.  Ég átti við að fólk hafi talið þig trúleysingja.  Fyrir mér ertu það ekki.  Allavega ekki á svo breiðum grunni sem slíkur sleggjudómur gefur í skyn.  Kirkjuna hefur þú sett ofan í við, sem og ég sjálfur, enda af nógu að taka. 

[Svavar Alfreð Jónsson, 10.9.2007 kl. 09:11]

Kæri Sigurður! Mér þykir leitt hafi ég sært þig með ummælum um þetta mál og bið þig að fyrirgefa mér þau. Menn eiga að gæta orða sinna eins og þú bendir á og þeir mest sem stærsta munninn hafa. 

Haldið svo endilega áfram að krítísera kirkjuna. Hún hefur ekki nema gott af gagnrýni - ekki síst frá hugsandi og vel meinandi mönnum.

Ég er ekkert hissa á nafna þínum Ægissyni að hafa notað þessa færslu þína í hugvekjuna því hún var frábærlega skrifuð.

[Sigurður Þór Guðjónsson, 10.9.2007 kl. 10:14]

Gjörast menn nú mjög iðrunarfullir! En spurning mín hér að ofan var nú svo sem ekki alvarlega meint í neinni móðgun, bara gerð vegna þess að ég var dálítið áttavilltur. Hins vegar eiga orðhákar alltaf að gæta tungu sinnar. Þeir eiga bara að steinhalda kjafti!

[Jón Steinar Ragnarsson, 10.9.2007 kl. 22:14]

Zarathustra hefur talað

[Svava frá Strandbergi , 10.9.2007 kl. 22:45]

Kæri brósi. ég er montin af þér.

[Þorkell Sigurjónsson, 11.9.2007 kl. 00:48]

Þegar þú Sigurður minn ert farinn að sjá sjálfan þig sem leiðarahöfund Moggans, þá tel ég þig kominn út á hálan ís. En andskoti ertu  vel skrifandi,  það verður ekki af þér skafið. 

[Sigurður Þór Guðjónsson, 11.9.2007 kl. 03:57]

En á Mogganum eru þeir alls ekki skrifandi!

[Þorkell Sigurjónsson, 11.9.2007 kl. 11:56]

Honum frænda mínum( ekki þú Sigurður) skildist tiltölulega snemma, að kirkjan sat yfir frjálsri hugsun, og auðstéttin sem sat yfir hlut alþýðu og leituðu traust og halds hjá hvor annarri. Vonandi verður þú Siggi minn aldrei málsvari þeirra.

[Sigurður Þór Guðjónsson, 11.9.2007 kl. 12:11]

Jesús minn Keli! Ég er nú bara farinn að upplifa mig sem Júdas.