Hvernig yrði lífið í landinu?

Geir Jón Þórisson yfirlögregluþjónn í Reykjavík mætti í viðtali á sjónvarpsstöðinni Omega í einkennisbúningi sínum og sagði að sögn Blaðsins í dag, „að það væri heillavænlegri lausn að senda trúboða út af örkinni til að leysa miðborgarvandann heldur en að fjölga þar lögregluþjónum." Hann vill að óeirðaseggirnir fái að „kynnast drottni".

Í 17. grein reglugerðar um einkennisbúninga og merki lögreglunnar er kveðið á um að lögreglumönnum sé óheimilt að nota einkennisfatnað  utan lögreglustarfs, nema með heimild lögreglustjóra.

Í Blaðinu segir: „Stefán Eiríksson, lögreglustjóri höfuðborgarsvæðisins, kannast  ekki við að Geir Jón hafi verið í erindum lögreglunnar í þessu viðtali á Omega."

Þetta þýðir að Geir Jón fékk ekki leyfi frá lögreglustjóra til að nota einkennisbúninginn utan lögreglustarfsins.

Hann braut því klárlega  þessa 17 grein reglugerðarinnar.

Og hann hefur játað brot sitt og segir „Það má kannski segja að það hafi verið mistök hjá mér að mæta þarna í einkennisbúningi vegna þess, ég get tekið undir þá gagnrýni á mig." 

Hvað svo?

Þegar lögreglan gómar fólk fyrir að henda rusli í miðbænum breytir engu þó það játi brot sín og gráti beisklega, það verður eigi að síður gert ábyrgt gerða sinna og sektað. Verður þá ekki að bregðast á svipaðan hátt við þeim sem opinberlega brjóta reglugerðir ríkisins?

Blaðið segir: „Stefán segist ekki hafa fengið neinar athugasemdir eða ábendingar varðandi þáttinn en ef um eitthvað athugunarvert sé að ræða af hálfu starfsmanns embættisins þá verði það mál afgreitt gagnvart honum en ekki opinberlega. Að öðru leyti vildi hann ekki tjá sig um það."

Maður spyr sig hvort brot jafn háttsetts manns í lögreglunni fyrir allra augum í sjónvarpi eigi bara að leysa í pukri bak við tjöldin. En fyrst og fremst hvort tregða lögreglustjórans til að ræða málið sé vísbending um það að hjá lögreglunni verði horft framhjá þessu broti með því að yppta bara öxlum.

Hugmynd Geirs Jóns um trúboð yfir óeirðaseggjum miðbæjarins  býður hins vegar upp á aðrar pælingar og all-glæfralegar.

Hugsum okkar að kristnir heittrúarmenn eins og Geir Jón sjálfur, Gunnar í Krossinum og Snorri í Betel, næðu á einhvern hátt völdum í þjóðfélaginu á öllum sviðum. Þeir væru í ríkisstjórn, hefðu meirihluta á alþingi og réðu lögum og lofum í öllum ríkisstofnunum og bæjarstjórnum, stýrðu menntakerfinu, heilbrigðismálunum og auðvitað Þjóðkirkjunni og hvers kyns samtökum, svo sem sem æskulýðs -og íþróttafélögum. 

Hvernig ætli lífið í landinu yrði ef þetta mundi gersast? 

 

Athugasemdir

[María Kristjánsdóttir, 12.9.2007 kl. 16:36]

Þá gætum við að minnsta kosti farið að biðja fyrir okkur!

[Yngvi Högnason, 12.9.2007 kl. 17:04]

Alltaf hefur Geir Jón haft góða nærveru og boðið af sér góðan þokka.  En mér finnst menn æ setja niður þegar þeir halda að trúartroðsla sé lausn á einhverjum vanda og bæti böl.

[Þorkell Sigurjónsson, 12.9.2007 kl. 17:34]

Það er mitt álit Sigurður, og ekki síður fyrir það að ég þekki  þessa þrjá úrvalsmenn persónulega sem þú taldir þarna upp, að ég treysti þeim öllum 100% til góðra verka í þjóðfélaginu.

[Fríða Eyland, 12.9.2007 kl. 19:18]

Við þangað aftur á miðaldir

[halkatla, 12.9.2007 kl. 19:20]

það getur allt gerst í lýðræðisríki bíddu bara, lýðræðið er ekkert endilega gott. það gerir amk sjaldan það sem ég vil

[Sigurður Þór Guðjónsson, 12.9.2007 kl. 19:38]

Þorkell:Þeir mundu örugglega byrja á því að bannfæra þig!

[Þorkell Sigurjónsson, 12.9.2007 kl. 20:23]

Það yrði hið besta mál Sigurður, því þá væri ég orðinn píslarvottur.

[Baldur Fjölnisson, 12.9.2007 kl. 20:28]

Það er náttúrlega ekki gott að prédika löghlýðni og leika sér jafnframt að því sjálfur að hunsa reglur eigin embættis þannig að maðurinn vill greinilega ekki vera tekinn alvarlega og undirstrikar það með þessum hætti. Hvers vegna þarf síðan að rannsaka enda óþolandi að yfimenn lögreglunnar starfi beinlínis að því að spilla trúverðugleika hennar.