Ef Halldór Laxness hefði farist 1926

Í Ævisögu Halldórs Laxness eftir Halldór Guðmundsson segir frá því að í desember 1926 hafi Halldór átt pantað far frá Akureyri suður með norska skipinu Balholm en missti af skipinu af einhverjum ástæðum en það fórst í ferðinni fyrir vestan land með allri áhöfn.

Íslensk menningarsaga hefði orðið öðru vísi og stórum fátækari hefði Halldór Laxness farist með skipinu. Hann var þá nýbúinn að skrifa Vefarann mikla frá Kasmír en bókin var enn ekki komin út.

Líklegt er að Gunnar Gunnarsson hefði verið talið helsta skáld þjóðarinnar ef Halldór hefði verið úr leik og skrifaði hann þó á erlendu máli sem hefði verið vandræðalegt. Þórbergur hefði aldrei verið talinn helsta skáldið af því að hann lagði stund á svo óhefðbundnar bókmenntagreinar.

Það má öruggt teljast að Íslendingar hefðu ekki enn eignast neitt nóbelsskáld.

Þegar Halldór er tekinn úr bókmenntum 20. aldar er augljóst að engin stórskáld á heimsmælikvarða voru önnur á þeim tíma.

Sjálfvitund okkar sem þjóðar væri bara allt öðru vísi ef Halldór Laxness hefði ekki misst af skipinu í desember 1926.

Það er stutt milli lífs og dauða og örlög manna og þjóða eru oft tilviljunum háð.  

Í ársyfirliti Veðráttunnar 1926 segir svo um vestanóveður sem gekk yfir landið 7. desember 1926: "Sjógangur var mikill þennan dag og stórflóð á Suðvestur -og Vesturl. ... Í þessu veðri fórst norska gufuskipið Balholm með 23 mönnum útifyrir Mýrum, fór frá Akureyri þ. 2., ætlaði til Hafnarfjarðar."

Fyrir neðan má sjá þrýstikort frá hádegi 7. desember 1926. Lægð undir 975 hPa er á norðvestur Grænlandshafi og hæð suður í höfum og veldur þetta  mikilli suðvestan- eða vestanátt.

 

Athugasemdir

[Gulli litli, 29.10.2007 kl. 14:42]

Fyrir mér stendur þórbergur alveg jafnfætis Halldóri og ég held að einhverju leiti hafi Halldór tekið þórberg sér til fyrirmyndar í skrifum sínum....en þetta er bara smekksatriði...ég einfaldlega verð að ná í ævisögu nóbelskáldsins...

[gerður rósa gunnarsdóttir, 29.10.2007 kl. 15:20]

Heyrðu mig nú! Ég var einmitt nákvæmlega að hugsa um það í gær eða fyrradag hver sjálfsmynd Íslendinga væri ef við hefðum ekki átt Halldór Laxness sem nóbelsverðlaunaskáld!
Furðuleg tilviljun.
Ég hafði samt ekki hugmynd um þessa skipaferð sem hann missti af.

[Sigurður Þór Guðjónsson, 29.10.2007 kl. 16:11]

Öll missum við af einhverju. En við tvö missum aldrei af telepatíunni.