Tökum nú upp léttara hjal

Í dag lét ég klippa mig hjá sama rakaranum og ég hef  farið til í ein tuttugu ár. Hann er frábær. Ég kemst alltaf á hörkusjens i viku eftir að hann hefur klippt mig. Ég gekk heim frá honum alveg vestast úr vesturbænum og til móts við Norðurmýrina. Það var gaman að ganga þessar gamalgrónu vesturbæjargötur. Hjarn var á jörðu og jólaljós við hvert hús. Oft mátti sjá inn um glugga á bækur og gömul húsgögn. Saga í hverju skoti. Gamli bærinn er eiginlega tímalaus.

Mikil gersemi er diskurinn hennar Ingibjargar Þorbergs. Lagið hennar Hin fyrstu jól er eitthvert besta jólalagið. Það nær alveg blænum sem var yfir kyrrlátum vesturbænum um jólin þegar ég var að alast þar upp. Veturinn 1957 til 1958 kenndi Ingibjörg mér söng í Miðbæjarskólanum. Ég fékk að syngja Óla rokkara hjá henni í tíma. Þið hefðuð átt að sjá mig þá! Ég var rosalega töff!

Það var bernskujólalegt að ganga niður á Vesturgötuna og sjá Raforkujólabjölluna birtast fyrir enda götunnar. Þarna hefur hún verið á sínum stað um jólin frá því ég man eftir mér. Okkur krökkunum fannst alltaf vera komin alvöru jólastemning þegar bjallan var sett upp. 

Í Eymundsson gekk ég fram á vin minn Trausta Jónsson sem kom nálægt útgáfu disksins hennar Ingibjargar. Hann spáir í veðrið fram í tímann. Ég spái hins vegar í veðrið aftur í tímann og er bara nokkuð glúrinn í  því.

Jú, jú, jólin eru kristin hátíð. Menn eru að segja að saga okkar og menning sé samofin kristnum sið. En ekki hvað. Við höfum ekki haft neitt val um annað. Þetta er bara það sem við meðtökum með móðurmjólkinni. En er þetta nokkuð betri siður en annar siður? Kannski bara ósiður? Það sem okkur finnst  mest um vert í menningu vesturlanda, frelsið og mannréttindin, vísindin og velmegunin, hefur að vísu sprottið fram í kristnum löndum en á sér mjög veraldlegar forsendur, jafnvel efnahagslegar, er ýttu undir breytingar í hugsun sem oft voru  í fyrstu bornar fram af frjálshuga einstaklingum í andstöðu við alla trúarlærdóma eða að minnsta kosti ótengt þeim.  

Annars leiðist mér ekkert eins mikið og deilur um trúmál. Þær eru hreinlega að drepa bloggið. Ekki veit ég til að nokkrum manni, til eða frá, hafi verið talið hughvarf um  trú sína í öllu því ólukkans tuði.

Bloggum frekar um eitthvað  skemmtilegt.    

 

Athugasemdir

[Ásta Björk Solis, 13.12.2007 kl. 19:46]

You sexy thing,eru konurnar komnar i radir fyrir utan husid hja ther?

[halkatla, 13.12.2007 kl. 19:51]

við erum sammála um að deilur um trúmál séu leiðinlegar (reyndar ekki alltaf en mjög oft) 

þú verður eiginlega að heimsækja mig og sýna mér nýju klippinguna... taktu endilega Mala með!

[halkatla, 13.12.2007 kl. 19:52]

við erum allavega í röðum á blogginu, damn, ég vildi vera með fyrsta komment

[María Kristjánsdóttir, 13.12.2007 kl. 19:57]

Ég fór líka í klippingu í dag en ekki með sjálfan mig heldur einn tveggja ára. Hann sat andaktugur líkt og í kirkju meðan athöfnin átti sér stað og sagði svo: "Konan duglegur."

[Lára Hanna Einarsdóttir, 13.12.2007 kl. 21:36]

Kvenfólkið umkringir þig núna. 

Mér heyrist þú hafa verið á rakarastofu Harðar og Ragnars. Er Raggi tekinn við lubbanum á þér? Af hverju leistu ekki inn hjá mér fyrst þú áttir leið fram hjá? 

[Sigurður Þór Guðjónsson, 13.12.2007 kl. 21:53]

Ég var ekki á þessari rakarastofu sem þú nefnir Lára. En ég gekk framhjá þér og leit á dyrabjölluna. Ég ólst upp í húsinu beint á móti. En ég er kurteis maður og trana mér ekki inn á fólk óforvendis. En gæti gert það næst! Þetta er uppáhalds gönguhverfið mitt.

[Jón Bragi Sigurðsson, 13.12.2007 kl. 22:24]

Hvur andskotinn!

Ertu hættur við að drepast? Ég sem ætlaði að fylgjast með dauðastríði þínu hér á blogginu. Fá svona aldeilis ókeypis "raunveruleikaþátt".

Sýnir enn og aftur að maður á aldrei að hlakka til neins...

[Ásgeir Kristinn Lárusson, 13.12.2007 kl. 22:31]

Í den var farið í klippingu á rakarastofuna í Eimskipafélagshúsinu. Fyrir jólin og svo á vorin, þegar manni var sleppt lausum á sumarbeitina. Í seinni tíð hef ég farið æ sjaldnar til hárskera; er þó með hárprúðari mönnum. Í nóvemberbyrjun var það hún móðir mín , sem særði hár mitt eilítið, en hún og Ingibjörg Þorbergs eru systradætur og hananú...

[Sigurður Þór Guðjónsson, 13.12.2007 kl. 22:37]

Ég held bara að ég ætli að lifa dauðastríðið af. En höfuðið á mér er ansi þungt. 

[Vilhjálmur Örn Vilhjálmsson, 14.12.2007 kl. 00:30]

Þessari umræðu ætla ég ekki að blanda mér í, enda kæri ég mig kollóttan um hár, trúarbrögð og brillkrem, eins sjá má á portrettinu. Síðast þegar einhver hrósaði hárgreisðlu minni svo ég muni eftir, var þegar ég var sendisveinn hjá RÚV á fyrri hluta 8. áratug 20. aldar og þula þar á bæ potaði inn í slöngulokkana þegar við vorum ein í lyftunni, og spurði mig með rödd sem hún hafði ekki í beinni útsendingu: "hvar fær maður svona permanent?". Það fór hrollur um mig og ég fór fljótlega að missa hárið upp úr því.

[Sigurður Þór Guðjónsson, 14.12.2007 kl. 00:57]

Það er þó skárra að missa hárið en missa vitið.

[Lára Hanna Einarsdóttir, 14.12.2007 kl. 00:59]

Nú stendur strókurinn upp úr hausnum á mér... er að reyna að muna eftir annarri rakarastofu svona vestarlega...

[Greta Björg Úlfsdóttir, 14.12.2007 kl. 01:06]

Sigurður,

Mikið er ég sammála þér um Ingibjörgu og jólaskreytingarnar í miðbænum. Vonandi dettur engum í hug að breyta þeim, það er að segja skreytingunum, svo lengi sem hægt er að halda þeim í lagi og "gangandi".

[Vilhjálmur Örn Vilhjálmsson, 14.12.2007 kl. 01:09]

Það sagði Ómar Ragnarsson líka, Sigurður, og ég held líka að Ómar noti enn rakarastofu sem er mjög vestarlega. Þeir eru nefnilega góðir að skipta í miðju Westast í vesturbænum.

[Greta Björg Úlfsdóttir, 14.12.2007 kl. 01:10]

Ég held að trúmálaumræður bloggara, í það minnsta sumra hverra, sé teknar að færast á aðeins siðlegra plan, hvort sem það er nú kristilegt eður ei, enda er ég hætt að taka þátt í þeim.

[Greta Björg Úlfsdóttir, 14.12.2007 kl. 01:12]

Ég held að þið misskiljið mig rétt.

[Greta Björg Úlfsdóttir, 14.12.2007 kl. 01:13]

Vildi bara láta ykkur vita af þessu - enda veit ég ekkert um rakarastofur.

[Sigurður Þór Guðjónsson, 14.12.2007 kl. 01:23]

Ég veit ekkert í minn haus hvað verið er að tala um.

[Vilhjálmur Örn Vilhjálmsson, 14.12.2007 kl. 08:19]

Ég held bara að það sé þjóðþrifamál að fjölga íslenskum geitum eins og rætt hefur verið um. Villi geit væri mjög góður til undaneldis.