Ekki nýjar fréttir

Grein í Morgunblaðinu eftir Árna Tryggvason um ófullnægjandi aðstöðu sjúklinga á geðdeild Landsspítalans hefur sett  vefmiðla, fjölmiðla og ýmsa bloggara á hvolf.

Það er þó ekkert nýtt að menn, að sjúklingum meðtöldum, gagnrýni aðbúnað sjúklinga á geðdeildum. Það hefur verið gert í nokkra áratugi. Það hefur bara enginn hlustað. 

En núna, af því að það er þekktur leikari, Árni Tryggvason, með allri virðingu fyrir honum, er eins og menn séu að heyra einhver spáný tíðindi.

Ekkert sýnir betur áhugaleysi þjóðarinnar á aðbúnaði geðsjúkra en einmitt þetta. Þegar einhver frægur talar fer allt á stað þó menn hafi fullkomlega hundsað allar raddir um það sama þangað til.

Sannleikurinn er sá að Íslendingar líta niður á geðsjúklinga og hafa alltaf gert. En fjölmiðlar og fleiri eru veikir fyrir fræga fólkinu og því sem það segir.

Þetta segir allt sem segja þarf um hug þjóðarinnar til þeirra sem þjást af geðsjúkdómum.

Athugasemdir

[Sigurður Þór Guðjónsson, 18.4.2008 kl. 19:57]

Þú grípur ekki það sem ég er að segja.

[Lára Hanna Einarsdóttir, 18.4.2008 kl. 20:08]

Ég held að þetta sé rétt hjá þér. Það fór allt af stað á svipaðan hátt og merkingar voru bættar á Reykjanesbrautinni um daginn eftir að Björgvin Halldórsson tjáði sig um málið eftir að dóttir hans lenti þar í slysi? Við gætum talið upp fleiri dæmi um slíkt.

Og ég held líka að þú hafir rétt fyrir þér með að litið sé niður á geðsjúklinga - en hefur það hugarástand ekkert skánað samt?

[Guðmundur Brynjólfsson (IP-tala skráð) 18.4.2008 kl. 20:34]

Ég held að fordómar gegn geðsjúkum hafi ekkert skánað. Menn eru bara orðnir flinkari í því að kjafta innantómt og hræsna og láta aðra halda að þeir séu að springa úr umhyggju. Þetta er því mun auðveldara nú á dögum því engir nenna að hlusta - og/eða kunna það ekki.

[Marta B Helgadóttir, 19.4.2008 kl. 00:28]

Orð í tíma töluð Sigurður.

[Hólmdís Hjartardóttir, 19.4.2008 kl. 02:37]

Þú hefur rétt fyrir þer Sigurður. En er ekki einmitt gott að þjóðþekktur maður bendi á þetta???

[Jenný Anna Baldursdóttir, 19.4.2008 kl. 09:48]

Íslendingar (og örugglega aðrar þjóðir líka) eru sökkerar fyrir fræga fólkinu.  Hef sjálf legið á geðdeild og hef fundið á eigin skinni fordómana og skilningsleysið.  En.. ef Árni fær einhverju breytt, þá tek ég ofan fyrir honum.  Karlinn er flottur.

Aðdáandinn.

[Sigurður Þór Guðjónsson, 19.4.2008 kl. 11:27]

Börnin góð: Svo ég leggi línuna: Þið eigið að hneykslast rosalega á því að það þurfi frægan til að menn fari að hlusta. Það er hið voðalega hneykslunarefni, ekki vor minnsti bróðir ellegar mannréttindi eða svoleiðis. Efast um að orð Árna breyti nokkru nema þá á yfirborðinu í skamman tíma. Fólk hefur reyndar verið saman í stofu, allt upp í fjóra áratugum saman. Halda menn að þeir fái allt í einu einsmannssvítur. Og öllu hefur verið hrært saman, mikið og minna veiku fólki, í jafn langan tíma. Halda menn að á því verði raunveruleg breyting? En bráðum fer ríka fólkið að reisa auðmannageðveikrahæli þar sem allir sem klikkast fá margra herbergja svítur og golfvöll en brjálaður pöpullinn verður eftir sem áður að veltast um hverja aðra á yfirfullum deildum. Þetta er framtíðin góðir hálsar!

[Ásgeir Kristinn Lárusson, 19.4.2008 kl. 11:57]

Kannski kæmi e-ð gott útúr sameiginlegri árshátíð geðlækna og bifvélavirkja ;)

[Þorsteinn Briem, 19.4.2008 kl. 15:01]

Siggi er fyndnasti bloggarinn, ekki nokkur spurning! Ef ég man rétt var skrifuð heil bók um Árna Tryggvason fyrir margt löngu og hans veiki alla.

Og Mogginn hefur verið dáldið duglegur við að halda á lofti merkilegheitum geðveikinnar sökum náinna tengsla sinna við hana. En það er barist um peningana og að sjálfsögðu berjast allar stofnanir við að ná í klikkaðasta fólkið, til að mynda Landspítalinn og Seðlabankinn, Siggi minn. Eins manns svítur og ókeypis eftirmiðdagskaffi á báðum stöðum.

[Marta B Helgadóttir, 22.4.2008 kl. 22:18]

...ég er í kasti hérna, ...geðveikislegu hláturskasti þú ert svo fyndinn

[Marta B Helgadóttir, 22.4.2008 kl. 22:21]

"brjálaður pöpullinn verður eftir sem áður að veltast um hverja aðra"