Köldustu júlímánuðir á Íslandi

Fáeinir júlímánuðir skera sig úr á landinu fyrir kulda. Þeir voru langflestir á 19. öld þegar afar fáar veðurstöðvar voru starfandi. Flestir hlýjustu júlímánuðir voru aftur á móti á 20. öld þegar veðurstöðvar voru orðnar margar. Af þessum sökum er ekki hægt að beita sömu aðferð til að finna köldustu júlímánuði og ég notaði til að finna þá hlýjustu. 

Frá 1873 voru fjórar stöðvar sem mældu hita: Reykjavík, Stykkishólmur, Grímsey og  Teigarhorn. Meðalhiti þeirra 1961-1990 er 9,2 stig. Ef miðað er við þessar fjórar stöðvar eru þetta köldustu júlímánuðir: 1887, 1882, 1888, 1915, 1892 og 1970. Mælingar hófust í Vestmannaeyjum 1878, í Hreppunum 1880 og á Akureyri 1882. Ef þeim stöðvum er bætt við kemur í ljós að frá og með 1882, eftir að allir köldustu mánuðirnir komu, breytist innbyrðis röð þessara mánaða fyrir sjö stöðvar miðað við fjórar á þann hátt að 1892 er þriðji kaldasti mánuðurinn, 1970 sá fjórði, 1888 sá fimmti og 1915 sá sjötti. Við tökum meira mark á sjö stöðvum en fjórum og segjum því að köldustu júlímánuðir frá 1873 séu í þessari röð: 1887, 1882, 1892, 1970, 1888, 1885, 1915. Eflaust mun þessi röð breytast ef annað viðmið væri notað, en hvað um það, við teljum að hér séu komnir nokkrir af  köldustu júlímánuðum á landinu frá 1873.

Fyrir þann tíma voru gerðar athuganir í Reykjavík, nokkuð ábótavant, frá 1823-1853 og í Stykkishólmi fyrsta flokks athuganir frá 1846. Á þessu tímabili virðast reyndar hafa komið allra köldustu júlímánuðirnir.

Árið 1826 var meðalhitinn í Reykjavík, eða Nesi á Seltjarnarnesi öllu heldur, talinn 7,9 stig og er ekki hægt að finna þar lægri tölu fyrir nokkurn júlí. Brandsstaðaannáll, sem skrifaður var í Húnavatnssýslu, segir um sumarið 1826: "Með júlí fóru lestir suður, fengu ófærð og óveður til þrautar. 5.-6. júlí mesta vestanóveður, svo ær króknuðu sumstaðar, enn fremur 7.-8., 11. og 16. miklar rigningar, þar eftir kuldar og blástur. Sláttur fyrst 19. júlí. Kom þá þurrviðri og varð góð nýting á töðu og hirt 3. ágúst."

Kaldasti júlí í Stykkishólmi var árið 1862, 7,5 stig. Mikill grasbrestur var það sumar. Þorvaldur Thoroddsen segir í Árferði á Íslandi í þúsund ár að fram í miðjan mánuðinn hafi varla komið eðlilega hlýr eða lygn dagur og varla hafi komið sú nótt að ekki hafi verið frost til fjalla. Í Borgarfirði hafi verið svo mikil næturfrost í byrjun mánaðarins að mýrar voru mannheldar fyrir sólaruppkomu. Meðaltal hámarkshita í Stykkishólmi var aðeins 9,7 stig en lágmarksins 1,6 og það voru tvær frostnætur. Meðaltal morgunhita var þar 6,8 stig, nákvæmlega einu stigi lægra en í júlí 1882  og var aldrei hærri  en 9,4 stig en lægst 3,5. Áttin var yfirgnæfandi milli norðurs og austurs. Úrkoma var 34 mm á fjórum dögum og tvo dagana rigndi mikið, 18 og 10 mm.   

Árið 1812 var hitinn áætlaður svipaður fyrir Stykkishólm eða lægri en árið 1862 eftir athugunum sem gerðar voru á Akureyri. Ís var þá fyrir norður og austurlandi allt fram í ágúst. Svo segir Þorvaldur: "Þá var júlí harður með kuldum og hríðum sem á vetri fyrir norðan og hið mesta grasleysi og bjargarleysi hvarvetna."   

Í Reykjavík  mældist meðalhitinn í júlí árið 1874 8,4 stig sem er lægsti meðalhiti sem þekkist þar í mánuðinum eftir að athuganir voru teknar upp aftur árið 1871. Í Stykkishólmi var þá 0,9 stigum hlýrra sem er vægast sagt óvenjulegt og vekur kannski spurningu um trúverðugleika mælinganna í Reykjavík. Þessi mánuður var hvergi með þeim allra köldustu nema í Reykjavík en reyndar var aðeins mælt á þremur öðrum stöðum. Í Árferði á Íslandi í þúsund ár segir að framan af mánuðinum hafi verið kuldahret við og við nyrðra, vestra og eystra með krapaskúrum og jafnvel snjó niður í byggð. Dagana 8.-9. snjóaði víða.  

Allir þessir júlímánuður, nema 1874, eru kaldari í Stykkishólmi en nokkrir aðrir mánuðir og eru þetta líklega köldustu júlímánuðir á landinu sem einhverjar hitatölur finnast um. Og þó! Allir mánuðirnir frá júní til september árið 1782, eftir ófullkomnum mælingum á Bessastöðum að dæma, virðast hafa verið kaldari en nokkrir aðrir þessara þriggja sumarmánaða hafa síðar orðið. Það var víst alveg sérlega heppilegt fyrir síðasta sumarið fyrir Skaftárelda! Djáknaannálar segja svo: "Hret kom um Jónsmessu og annað stærra 7da og 8da Júlii; snjóaði þá ofan í byggð svo kýr og fé var hýst í 2 nætur fyrir norðan."Höskuldsstaðaannáll segir: "Sumarið var þurrt og kalt, sérdeilis þá á leið. (Hret um Jónsmessu og aftur eftir þingmaríumessu). Stórmikill grasbrestur yfir allt norðan lands, þó næsta misjafnt á bæjum í sveitunum." Þorvaldur Thoroddsen skrifar: "Á harðlendi varð mesti grasbrestur, og í Þingeyjarþingi var gras svo lítið sprottið, að á  bæjum á Langanesi urðu ekki hærð tún. Hafísar hindruðu kaupskip frá að hafna sig og nokkrir menn gengu frá heimilum sínum." Hafís var fyrir norðan og austan og reyndar allt til Eyrarbakka.

Víkjum nú að hinum köldu júlímánuðum frá og með 1873. Fremst er meðaltal hinna sjö stöðva en meðaltalið 1961-1990 var 9,65 stig. Hér má sjá hitann þessi ár í töfluformi.                               

                    1887    1882    1892    1970    1888    1885    1915    61-90

Reykjavík        8,7       10,2     9,1       9,4       9,4       8,6       10,4    10,6

Stykkish.          8,1       8,0       8,6       8,3       9,3       8,8       8,9      9,9

Akureyri           7,4       6,1       9,2       7,4       8,5       9,6       6,5      10,6

Grímsey           3,7       3,8       5,2       5,6       4,5       6,2       3,7      7,5

Teigarhorn       6,3       6,6       7,0       7,7       5,4       7,7       7,1      8,8

Hæll                9,5       10,9     7,9       9,3       10,7     8,6       11,0    10,6    

Stórhöfði        9,3       10,2     9,1       9,0       8,8       8,4       10,7     9,6      

Meðaltal          7,6       8,0       8,05     8,09     8,25     8,26     8,32    9,7

Meðaltal úrkomu 1961-1990 í mm, til glöggvunar við lesturinn: Reykjavík, 52, Stykkishólmur 42, Teigarhorn 84, Grímsey 43 (1931-1960), Stórhöfði í Vestmannaeyjum 75, Eyrarbakki 87.   

Það er eftirtektarvert að þrír af sex köldustu mánuðunum komu svo að segja í röð, 1885, 1887 og 1888 og árin 1882 og 1892 voru ekki langt undan. Á þrettán árum, 1882-1892, komu fimm af sex köldustu júlímánuðum eftir 1873. Það er ekki að furða þó flóttinn til vesturheims hafi þá verið í hámarki.  

1887 (7,7). Suðurnesjaannáll segir svo um sumarið: "Tíðarfar mátti heita hið bezta yfir allt suðurland, grasvöxtur með betra móti og nýting ágæt, svo hey náðist óhrakið." Árbók Reykjavíkur: "Sumarveðrátta var hin hagstæðasta, grasvöxtur ágætur og nýting í bezta lagi um alt Suðurland." Þorvaldur Thoroddsen skrifar: "Sumarveðrátta var þó yfir höfuð góð og framúrskarandi góð á Suðurlandi og Austurlandi." Hann segir líka að veðráttan hafi verið "óvenjulega hlý og þurr um mestallt land enda áttin sjaldan af norðri". Þetta er síður en svo eina dæmið um það að tíðarfar sem mælingar segja að sé með mestu frávikum í óhagstæða átt sé talið ágætt þegar menn lýsa því huglægt með orðum. Þessi júlí er sá kaldasti á landinu frá 1873 samkvæmt mælingum. Á undan honum fór kaldur júní og á eftir honum ískaldur ágúst og líka september. Hins vegar virðist hafa verið sólríkt og mikið þurrviðri. Heyskapur hefur því gengið vel og það ræður líklega úrlistum um lýsingar manna á tíðarfarinu. Úrkoma var aðeins 22 mm í Reykjavik, minna en helmingur þess sem nú er venjulegast. Annars staðar á landinu var líka lítil úrkoma,  23 mm í Stykkishólmi, 31 á Teigarhorni, 49 í Vestmannaeyjum og 61 á Eyrarbakka. En kuldarnir voru miklir. Í Grímsey mældist mesta frost sem þar hefur nokkurn tíma mælst í júlí, -3,0 stig, þ. 4. Í Reykjavík komu fimm dagar í röð frá þ. 22. þar sem hitinn komst aldrei í tíu stig sem mun hreinlega vera einsdæmi og ekki kom þá deigur dropi úr lofti. Frostdagar í Grímsey voru 14, þar af á hverjum degi 24.-30. en síðdegishiti var þá svona tvö stig og snjóaði oft. Meðaltal lágmarkshita mánaðarins í Grímsey var 0,5 stig. Fyrstu fimm daganna var kafskýjað þar en 5.-10.  var talið heiðskírt en seinni hluta mánaðarins mátti kalla alskýjað alla daga. Í Stykkishólmi var talið heiðskírt á öllum athugunartímum 3.-9. Síðdegishitinn þá daga var þar alveg þokkalegur, 11-14 stig. Þarna koma þá líklega blíðviðrin hans Þorvaldar! Á Raufarhöfn var mælt þennan mánuð og þar fór frostið í 1,6 stig og hefur þar heldur aldrei orðið eins kalt í júlí.  Hlýjast í mánuðinum varð 19,5 stig á Teigarhorni.     

1882 (8,0). Þetta er alræmdasti og kaldasti júlí sem nokkurn tíma hefur komið á norðurlandi síðan mælingar hófust og ekki bætti úr skák að sömu sögu  er að segja um júní og ágúst. Hafís var fyrir öllu norðurlandi fram á höfuðdag og fylgdu honum kuldasvækjur og úrkoma. Vetrarís var ekki leystur af Ólafsfjarðarvatni 6. júlí og sýnir það kuldann. Hafísinn fór af austfjörðum í byrjun mánaðarins en jafnan var þar votviðrasamt og kalt. Lítið sást til sólar fyrir  norðan. Í Grímsey var aldrei talið minna en hálfskýjað og lang oftast alskýjað. Meðaltal skýjahulu á athugunartímum var 9,3 af tíunduhlutum. Seinustu dagana létti  þó loks upp fyrir norðan að sögn Þorvaldar Thoroddsen en þó varla í Grímsey samkvæmt athugunum. Sérlega kalt var við Húnaflóa að tiltölu. Meðalhitinn á Skagaströnd var aðeins 3,5 stig, lægri en í Grímsey þó júlí sé að jafnaði talsvert hlýrri á svæðinu kringum Skagaströnd en í Grímsey. Minnsti hiti mánaðarins á landinu mældist á Skagaströnd, -1,0 og finnst manni það vel sloppið, en þess ber að gæta að fyrir norðan var oftast kafskýjað og litlar hitabreytingar milli dags og nætur. Á Akureyri var meðalhitinn, 6,1 stig, sá lægsti sem þar hefur mælst, en á Hrísum, langt inni í Eyjafjarðardal, var meðalhitinn 7,2 stig  og sýnir þetta hvað hafísísinn hefur haldið hitanum á Akureyri meira niðri en innar í sveitinni. Mesti hiti mánaðarins mældist á Hrísum, 20,7 stig. Það hefur þá komið a.m.k. einn hlýr dagur, en þó víst ekki meira en það! Á Grímsstöðum á Fjöllum var mælt þennan mánuð og þar náði  meðalhitinn 7,4 stigum. Á Valþjófsstað í Fljótsdal var meðalhitinn enn hærri en á Hrísum, 9,0 stig og hafa þrír júlímánuðir á 20. öld á Hallormsstað, skammt frá, verið kaldari (1938, 1967, 1970, áreiðanlega líka 1993 en þá var hætt að mæla). Á suðurlandi var skárra tíðarfar en annars staðar, "allgóð hlýindi og sunnanvætur, þó stöku sinnum hlypi á norðan, varð aldrei neitt úr því", segir Þorvaldur Thoroddsen. Í Vestmannaeyjum var meðalhitinn ofan við meðallagið 1961-1990 og enn meira yfir því á Eyrarbakka. Andstæður milli landshluta um hásumarið hvað hita varðar hafa líklega aldrei verið meiri en í þessum mjög svo óvenjulega júlímánuði. Miðað við núverandi meðallag var úrkoman nokkuð fyrir neðan meðallag í Stykkishólmi, 22 mm, Vestmannaeyjum, 60 mm, og Eyrarbakka, 65 mm, en nokkuð fyrir ofan það í Grímsey, 48 mm, en hins vegar aðeins um helmingur meðalúrkomu á Teigarhorni, 44 mm.

1892 (8,05) Sagt var að sumarið kæmi ekki  þetta árið fyrr en um miðjan júlí. Ákaft hret kom 7.-9. og snjóaði ofan í sjó á norðurlandi. Og hvarf snjórinn ekki að fullu úr byggðum í viku. Í Hreppunum hefur aldrei mælst kaldari júlí, aðeins 7,9 stig á Hrepphólum sem er reyndar ótrúlega lág tala. Mánuðurinn var votviðrasamur um allt land. Í Reykjavík féllu 92 mm, 42 í Stykkishólmi, 85 í Grímsey, 150 í Vestmannaeyjum, 145 á Eyrarbakka, en 91 mm á Teigarhorni og þar af féllu 50,1 mm á einum degi, þ. 3. Í Reykjavík voru miklar úrkomur frá því um miðjan mánuð. Hlýjast í mánuðinum varð 22,8 stig í Möðrudal en kaldast -1,5 á Raufarhöfn.

1970 (8,09) Tíðarfarið var með afbrigðum kalt og sláttur hófst ekki fyrr en síðari hluta mánaðarins. Sums staðar var jafnvel ekki byrjað að slá í mánaðarlok. Á Akureyri var þetta næst kaldasti júlí en á Grímsstöðum, þar sem athuganir hófust árið 1907, hefur aldrei mælst eins kaldur júlí, 4,7 stig, ásamt júlí 1993. Góð heyskapartíð var sunnanlands og vestan. Heyfengur var víðast hvar lítill vegna kulda og óvenju mikils kals í túnum. Sunnanlands var sérlega sólríkt. Í Reykjavík var þetta næst sólríkasti júlímánuðurinn, 286,1 klukkustund. Norðanlands og austan var úrkomusamt. Á Fljótsdalshéraði var tvöföld eða þreföld meðalúrkoma og jafnvel enn meiri sums staðar á norðurlandi. Mikið norðankast kom þ. 9. og snjóaði þá sums staðar á norðurlandi svo jörð varð alhvít einn dag á Mýri í Bárðardal, Grímsstöðum á Fjöllum og Brú á Jökuldal, en tvo daga á Hveravöllum. Á Þingvöllum snjóaði niður undir byggð aðfararnótt þ. 10. í norðan hvassviðri, en ekki festi þann snjó. Annað norðanhret kom þ. 17. og snjóaði þá á Ísafirði og ær króknuðu í Önundarfirði. Á Hjaltabakka við Blönduós mældist frost þ. 24, -0,6 stig. Yfir allt landið er þetta kaldasti júlí sem núlifandi fólk hefur lifað en ekki eftir einstökum landshlutum.  Mesti hiti varð 22,4 stig á Vopnafirði en minnsti -3,3 á Grímsstöðum.     

1888 (8,25) Suðurnesjaannáll segir: "Tíðarfar yfir sumarið hér hið æskilegasta. Grasvöxtur í góðu meðallagi og nýting hin besta." Í Árferði á Íslandi er skrifað: "Sumarið var víðast um land mjög þurrviðrasamt."Sagt var að hefðu verið sífelld  góðviðri, sólskin og þurrkar. Mánuðurinn var sérstaklega kaldur á útskögum á norður og austurlandi, t.d. í Grímsey og Teigarhorni (sá kaldasti þar)  og þessir staðir draga meðaltalið mikið niður en þetta var ekki meðal  allra köldustu júlímánaða annars staðar. Eigi að síður er erfitt að skilja eftir hitatölum hina góðu einkunn sem Þorvaldur gefur sumrinu og hinir sumarmánuðirnir voru enn kaldari en 1887. Í þessum mánuði mældist reyndar minnsti júlíhiti nokkru sinni í Hreppunum, 0,7 stig á Hrepphólum. Hlýjast varð 24,2 stig á Núpufelli í Eyjafjarðardal en kaldast - 2,8 í Grímsey. Sólfar hefur þó eflaust verið  mikið og þetta er talinn þurrasti júlímánuður sem um getur á landinu. Í Stykkishólmi var úrkoman 5 mm, 16 í Grímsey og 11 á Eyrarbakka. Og bæði í Vestmannaeyjum, 10 mm, og á Teigarhorni var minni úrkoma en í nokkrum öðrum júlí, á síðar nefnda staðnum aðeins 0,7 mm. Sem sagt kalt og þurrt.     

1885 (8,26)  Suðurnesjaannáll segir svo: "Sumarið svo kalt, að engir menn muna, að annað eins hafi átt sér stað og fóru tún hér sunnan lands ekki að spretta fyrr en eftir Jónsmessu, enda leit svo víða út, að ekki mundu vera ljáberandi. Þó var sláttur byrjaður hér um pláss seinast í júlí, því þá var veðurátta snúin í votviðri, svo rekja fékkst meðan sláttur stóð yfir, sem ekki var lengi." Þorvaldur Thoroddsen skrifar: "Fyrri hluta júlímánaðar var allvíða enn þá ekki leyst af túnum á Austurlandi og frost og snjóar öðru hvoru allt til þess tíma og eins í Þingeyjarsýslu og víðar nyrðra. Á Vesturlandi kól tún víða jafnóðum og af þeim leysti, og í júlíbyrjun var víða varla fært yfir fjallvegi öðru vísi en skaflajárnað og stundum ókleyft fyrir snjónum og frosthríðum. Í lok júlímánaðar kom loksins alls staðar hagstæð sumartíð ... ." Tún spruttu svo illa að varla fékkst af þeim helmingur miðað við það sem vant var.

Mánuðurinn var einn af allra köldustu júlímánuðum á suður-og suðvesturlandi eftir 1873, næst kaldastur í Reykjavík, Hreppunum, Vestmannaeyjum og Eyrarbakka. Í þessum kalda mánuði mældist í Stykkishólmi mesta frost sem þar hefur mælst í júlí, -1,8. stig þ. 15.

Þetta er úrkomusamasti júlí sem mælst hefur í Reykjavík, en þar var úrkoman 127 mm og féll á 14 dögum. Í Stykkishólmi var úrkoman meira en helmingi meiri en núverandi meðaltal, 90 mm. Sömu sögu er að segja um Grímsey, 67 mm, og Teigarhorni, 181 mm, og Eyrarbakka, 170 mm, en úrkoman var hins vegar nærri meðallaginu í Vestmannaeyjum, 75 mm. Það fór ekki að rigna að ráði fyrr en upp úr þ. 20. en eftir það voru miklar úrkomur um allt land. Mestur hiti varð 20,2 stig á Teigarhorni en lægstur -1,2 á Raufarhöfn.

1915 (8,32)  Þessi júlí var sá næst kaldasti sem mælst hefur á Akureyri, 6,5 stig, og þar mældist líka mesta frost sem þar hefur mælst í mánuðinum -1,0 stig þ. 12. Hafís var talsverður á Eyjafirði og víðar fyrir norðan allan mánuðinn og hefur ekki síst valdið kuldunum. Á Grímsstöðum var þetta fjórði kaldasti júlí frá 1907. Kaldara var þar 1918, 1970 og 1993. Víða snjóaði nyrðra  kringum þ. 10. Mjög þurrviðrasamt var á suður og vesturlandi. Á Vífilsstöðum við Reykjavík var úrkoman aðeins 12 mm og féll á þremur dögum, þar af var helmingur hennar mældur að morgni þ. 1. Sólarstundir á Vífilstöðum voru 243 klukkustundir sem er langt yfir núverandi meðallagi fyrir Reykjavik. Í Stykkishólmi var úrkoman einungis 6 mm og 28 í Vestmannaeyjum. Fyrir norðan rigndi meira. Á  Möðruvöllum í Hörgárdal mældist úrkoman 28 mm sem er samt í minna lagi og sömu sögu er að segja um Teigarhorn þar sem úrkoman mældist 50 mm.  Á Möðruvöllum mældist frostið -2,0, þ. 12. Á suðurlandi var bara nokkuð hlýtt þennan mánuð, vel yfir  núverandi meðallagi á Stóranúpi og í Vestmannaeyjum. Mesti hiti mánaðarins mældist í Vestmannaeyjum, 20,6 stig þ. 4. en sá minnsti -3,0 á Grímsstöðum.

Tveggja mánaða verður að geta hér þó þeir teljist ekki meðal allra köldustu júlímánaða á landinu í heild, en hins vegar í einstökum landshlutum.

Júlí 1983 mældist á þessum hinum sjö stöðvum 8,6 stig, en þetta er kaldasti júlí sem mælst hefur  í Reykjavík, Vestmannaeyjum og á Eyrarbakka eftir 1875. Í  Reykjavik  var meðalhitinn 8,5 stig, 8,0 á Stórhöfða í Vestmannaeyjum og 9,0 á Eyrarbaka. Meðaltal hámarkshita í Reykjavík var aðeins 10,4 stig og hefur aldrei verið lægra. Það var líka úrkomusamt og með afbrigðum sólarlítið. Sólskinsstundir voru aðeins 89 í Reykjavík eða um helmingur meðaltalsins 1931-1990. Allra mesti hitinn sem mældist í borginni er sá lægsti í nokkrum júlí, 13,8 stig. Á Reykjanesvita fór hitinn aldrei hærra en í 11,5 stig. Á Hólmi, rétt við Rauðhóla hjá Reykjavík mældist frost -1,7 stig þ. 18. Úrkoman var 74 mm í Reykjavík og úrkomudagar 24.  Kuldarnir voru mestir að tilölu á suðvesturlandi og upp í Borgarfjörð og vestanvert Snæfellsnes. Fyrir norðan var hiti aðeins lítið undir meðallagi og reyndar fyrir ofan það á Vopnafirði. Á Héraði var sólríkt og sól var yfir meðallagi á Akureyri. Hitinn á Vopnafirði komst einn daginn í 24,7 stig en frostið eina nótt í -2,5 stig á Staðarhóli í Aðaldal. 

Júlí 1993 (8,5) var eindreginn norðanáttamánuður. Fyrir norðan var úrkomusamt og mjög kalt, allt að fjórum stigum undir meðalhitanum 1931-1960 inn til landsins á norðausturlandi. Aldrei hefur orðið kaldara á Grímsstöðum frá 1907 og ekki heldur Möðrudal og ekki á Úthéraði frá 1898. Mikið norðanveður gerði 27.-28 og komst vindhæð í 12 vindstig í Æðey í Ísafjarðardjúpi. Það er þó mesta furða að aldrei festi snjó í þessum kalda mánuði. Ekki kom heldur frost í byggð, minnsti hiti mældist 0,1 stig í Möðrudal. Mánuðurinn var ótrúlega þungbúinn fyrir norðan og austan. Á Vopnafirði voru allir dagar taldir alskýjaðir. Sólskinsstundir á Akureyri voru 58 og aldrei verið færri í júlí en 26 við Raufarhöfn og 40 við Mývatn. Á suðurlandi var hitinn aðeins kringum eitt stig undir meðallagi og sólskinsstundir vel yfir meðallagi í Reykjavík. Enginn júlí eftir að 19. öld sleppti hefur boðið upp á jafn lágan hámarkshita á öllu landinu og þessi (ásamt júlí 1961), 20,6 stig á Norðurhjáleigu.

Heimildir: Veðráttan, Meterologiske Ǻrbog, Suðurnesjannáll, Árferði á Íslandi í þúsund ár, Veður á Íslandi í 100 ár, nokkrar veðurstofutöflur. 

Athugasemdir

[DoctorE (IP-tala skráð) 27.7.2008 kl. 01:03]

Alltaf gott að geta kælt bloggið niður með veðurfréttum Siggi minn :)

[Helga (IP-tala skráð) 27.7.2008 kl. 01:31]

Vona bara að öll þessi kæling hleypi ekki illu blóði í hann Mala!

[Sigurður Þór Guðjónsson, 27.7.2008 kl. 01:51]

Af hverju fer þú ekki að blogga Helga? Það kynni Mali að meta sem nú er að mala í fanginu  á mér eftir hasarderaðan dag.

[Helga (IP-tala skráð) 27.7.2008 kl. 02:14]

Af því að ég er svo feimin og spéhrædd!

[Sigurður Þór Guðjónsson, 27.7.2008 kl. 11:58]

Það er hægt að nota dulnefni, t.d. Helga Malaaðdándi!

[Helga (IP-tala skráð) 27.7.2008 kl. 13:09]

Ég pæli í þessu!

[Sigurður Þór Guðjónsson, 27.7.2008 kl. 18:40]

Nú veit ég um dulnefni: Malína!

[Malína (IP-tala skráð) 27.7.2008 kl. 19:23]

 Malína er flott nafn!  Takk fyrir það - ég mun pottþétt nota það!

Hvenær sem það nú verður...

[Björn Jónsson (IP-tala skráð) 27.7.2008 kl. 21:02]

Þessar samantektir um hlýjustu/köldustu mánuði eru einstaklega fróðlegar, köldustu sumur á 19. öld virðast í fljótu bragði ekki hafa verið ósvipuð fyrir norðan og nú er yfirleitt á Jan Mayen (ef ekki kaldari).

Mér sýnist hinsvegar júlíhitinn 1970 fyrir Reykjavík í töflunni yfir köldustu júlímánuði vera um 1°C of lágur.

Hafa endurskoðaðar meðalhitatölur eins og hér eru notaðar annars verið gefnar út einhversstaðar? Veðráttuna eins og hún leggur sig er auðvitað að finna á timarit.is en hitatölurnar þar fyrir fyrstu áratugi 20. aldar eru ekki fyllilega sambærilegar við "nútímann" eins og margoft hefur komið fram hjá þér.

[Sigurður Þór Guðjónsson, 27.7.2008 kl. 22:09]

Þakka þér fyrir ábendinguna um júlíhitann 1970 Björn. Þetta var ásláttarvilla frá frumskjalinu á minni tölvu inn á bloggið og ótrúlegt hvað manni getur yfirsést. Hins vegar var meðaltalið rétt. Þetta hef ég nú leiðrétt. Þessar meðalhitatölur sem ég reikna út frá hafa ekki verið prentaðar.