Strætó

Fyrirhugaður er mikill niðurskurður á ferðum strætisvagna 1. febrúar. Sumum finnst það skjóta skökku við á þessum krepputímum.

Ekki nenni ég að leggjast djúpt í strætóspeki. En mig langar þó til að segja þetta:

Mér finnst oft óskaplega leiðinlegt að keyra einkabíl innan bæjar. Miklu þægilegra var að taka bara strætó meðan leiðakerfið var sæmilegt.

Síðustu ár hefur það hins  vegar gersamlega hrunið. Það er líka alltaf verið að breyta því svo fólk fær aldrei ráðrúm til að læra á það. 

Strætisvagnaskýlin eru líka fyrst og fremst orðin til að selja auglýsingar en ekki til að skýla fólki fyrir veðri og vindum. Það gerðu hins vegar gömlu járnskýlin.

Það getur vel verið að erfitt sé að reka strætó. En eins og málin eru núna er kerfið hreinlega orðið gagnslaust fyrir þá sem þurftu að treysta á það. Menn neyðast til að taka leigubíla. 

Ég veit að margir líta víst niður á strætó og þá sem ferðast með þeim. Það er svona flottræfilsháttur sem skapaðist í góðærisbólunni.

Nú ætti að vera lag að reyna að breyta þessu viðhorfi þannig að enginn sé talinn maður með mönnum nema hann taki strætó. En þá verður að gera einhverjar jákvæðar breytingar í stað þess að leggja stærisvagnaferðir nánast niður.

Eftirmáli: Ég lærði mjög seint á bíl enda óvenjulega seinþroska. En mér finnst alltaf svo svakalega gaman að keyra í snjó og láta bílinn skransa!

Athugasemdir

[Þórunn Hrefna (IP-tala skráð) 30.1.2009 kl. 18:49]

Kanntu að taka handbremsubeygju?

[Sigurður Þór Guðjónsson, 30.1.2009 kl. 19:03]

Ég er nú hræddur um það! Annars hélt ég að þú væri dauð Tóta pönkína!

[Margrét St Hafsteinsdóttir, 30.1.2009 kl. 20:42]

Strætókerfið er ekki gott ..........segir yngri sonur minn sem fer með strætó í skólann.

[Malína (IP-tala skráð) 30.1.2009 kl. 21:36]

Bara halda sig að mestu innan 101 svæðisins og ekki víkja þaðan spönn frá rassi - nema dauðinn og djöfullinn liggi við.

Þá getur maður líka gengið allra sinna ferða.

Er annars nokkurt líf sem orð er á gerandi annars staðar?

[Hildigunnur Rúnarsdóttir, 31.1.2009 kl. 00:49]

mér finnst gaman að keyra í snjó...

En nei, strætó'kerfið' bara versnar og versnar. Einu sinni fóru margir strætóar niður Laugaveg frá Kringlumýrarbraut niður á Hlemm og þaðan niður Hverfisgötu. Núna fer enginn þá leið. Hvers vegna var ekki hægt að láta eitt stykki leið halda áfram að fara þessa leið, þó kannski væri óþarfi að láta þá alla gera það?

[Ingibjörg Magnúsdóttir, 31.1.2009 kl. 01:29]

Sammála þér, þessi EES skýli sem voru standsett á tímum Samfylkingarinnar hjá Borginni eru hrein hörmung. Hefur þú einhvern tíma staðið og biðið eftir strætó í lágmarks-skýlinu neðst á Hverfisgötunni í norðannepju um hávetur? Það skýlir engu, hvorki manni né mús, og skilaði rauðu í bókum Samfylkingar árið 2007. Ein hliðin á því var brotin og brömluð tvisvar eftir jól í fyrra. Alltaf var gert við skýlið, en aldrei virðist vera borin virðing fyrir þeim sem bíða í þessum skýlum: þeir geta bara frosið í hel, Borgarinnar vegna.

Margir munu lenda í vandræðum eftir 1. feb. n.k. þegar ný leiðaáætlun Strætó bs. fer í gang. T.d. munu margir vagnar ekki byrja að aka fyrr en um 12 á hádegi á sunnudögum. Hvað á fólk að gera sem þarf að mæta til vinnu fyrr? Annað hvort hættir það í vinnu eða að vinnuveitandinn splæsir á taxa fyrir staffið; hvaða fyrirtæki hefur efni á slíkum aukakostnaði? Fleiri og fleiri fyrirtæki munu leggja upp laupana á næstunni, enn fleiri einstaklingar verða atvinnulausir.

Slíkt þýddi ennþá meira tap fyrir Strætó bs., eins og þó er gott að ferðast með þeim, innan ákveðinna marka.

[Eygló, 31.1.2009 kl. 02:12]

Ég hefði haldið að fleiri þyrftu að geta notað strætó á komandi tímum. Fólk hefur minni peninga milli handa, hefur ekki efni á að endurnýja bílinn en þarf að komast ýmissa ferða þótt það verði atvinnulaust.

Eina ferðin enn, sparað það sem manni virðist að síst skyldi.

[Ólafur Þórðarson, 2.2.2009 kl. 05:43]

Já það er frábært að geta notað strætó. Leiðinlegt þykir mér að keyra um á blikkbelju á Íslandi. Enn skemmtilegra að láta keyra sig svo maður geti á meðan lesið bækur, t.d. Al Gore bókina... þið vitið... æ...

 Talandi um veður og strætó, þá eru skýlin jú vita gagnslaus. Gerð þessara skýla hefur sýnt mikla afturför, kannski af því að menn halda að það muni hlýna svona mikið á Íslandi? Kannski þarf loftkælingu í skýlin ef fram fer sem horfir?

Síðast í haust var ég með unga dóttur mína. Við settumst á "bekkinn" eða silluna eða hvað á að kalla þetta sem sprettur upp á vegg og afturendinn á að fletjast á. Stelpan þaut í skyndi of nærri götunni svo ég sentist eftir henni. Í millitíðinni kom að brussa sem stal sætinu okkar. Óréttlætið er algert. Ekki einu sinni nettenging!

Og svo þetta að þurfa að kaupa leiðaráætlunarbókina! Það er nú alveg beisikk að getað fengið ókeypis leiðarkerfi á prenti. Fyrr mánú vera að erfitt sé að nota kerfið þegar menn verða að borga offé fyrir skitna leiðartöflubók með korti sem erfitt er fyrir fullorðið fólk að skilja. 

[EE (IP-tala skráð) 5.2.2009 kl. 23:35]

Get aldrei skilið hvað á að vera niðurlægjandi við að nota strætó.  Heitir það ekki bara mikilmennsku - eitthvað?  Notar venjulegt fólk ekki bara það farartæki sem getur farið með það þangað sem það þarf að komast?  En hver vill annars þurfa að eyða 2 kl.tímum í að frjósa í hel og farandi með 3 skiptivögnum í alla útjaðra bæjarins þegar hann hefði getað farið það á 5 mínútum með bíl og 30 mínútum gangandi?  Ekki erfitt reikningsdæmi. 

EE elle