Hámarkshiti á landinu um verslunarmannahelgina frá 1949 og veðrið í Reykjavík

Tölum áfram um veðrið!

Í tilefni af nokkuð veðragóðri verslunarmannahelgi má hér á fylgiskjali sjá hámarkshita á landinu alla daga verslunarmannahelgarinnar frá 1949 og auk þess hita, úrkomu og sól í Reykjavík sem gefa vísbendingu um veðurlag um þessa helgi á suðurlandsundirlendi og suðvesturlandi þar sem flest fólk er oftast um verslunarmannahelgina. Gaman hefði verið að koma með norðlenskt veður og verður kannski gert alveg á næstunni. 

Þetta eru allt mælingar á forláta kvikasilfursmæla á mönnuðum veðurstöðvum þar  til 1996 en þá fara að koma mælingar frá sjálfvirkum veðurathuganastöðvum sem stundum eru með meiri hita en nokkur mönnuð stöð. Þau tilvik eru hér auðkennt með því að nafn veðurstöðvarinnar er með skáletri. 

Aldrei hefur verslunarmannahelgin lent í miðri hitabylgju,  en föstudagurinn 1980 lenti í endanum á einni og sömuleiðis föstudagurinn í fyrra og eiginlega voru líka fyrstu dagar verslunarmannahelgarinnar 1991 í endanum á lítilli hitabylgju. Mesti hiti sem mælst hefur á landinu um verslunarmannahelgina frá 1949 er 26,8 stig, á laugardeginum árið 1991 í Reykjahlíð við Mývatn.

Minnsti hámarkshiti á landinu sem mælst hefur nokkurn dag um verslunarmannahelgi frá 1949 var á frídag verslunarmanna árið 1973, aðeins 12,7 stig á Fagurhólsmýri og gerist hámarkshiti á landinu á þessum árstíma ekki öllu lægri. Næst kaldasti dagurinn var föstudgurinn 1965, 13,9 stig á Loftssölum, skammt frá Dyrhólaey. Þennan dag hófst eitthvert mesta kuldakast um hásumar sem komið hefur á landinu og stóð alla verslunarmannahelgina.

Mesti hiti sem komið hefur í Reykjavík um verslunaarmannahelgi var á föstudeginum í fyrra 23,6  stig og á föstudeginum árið 2003, 20,3 stig. Fyrri dagurinn hefur hæsta sólarhringsmeðatal  allra dagana, 17,5 stig. Allra  lægsti hámarkshiti um verslunarmannahelgi var þar á föstudeginum 1975 aðeins 8,4 stig og hann er líka sá kaldasti að sólarhringsmeðaltali, 7,1 stig. Hlýjasta verslunarmannahelgin í heild að meðalhita í Reykjavík er 14,4 stig árið 2003 og meðaltal hámarkshita 17,5 stig en sú kaldasta að meðalhita var 1965, 8,6 stig og meðaltal hámarshita 8,6 stig, enginn dagur náði 10 stig stiga hita. Samt var þetta sólrík helgi og ekki kom dropi úr lofti

Meðalhiti verslunarmannahelgar í Reykjavík er 10,9 stig, meðaltal úrkomu sem fellur samtals er 5,9 mm og meðaltal heildaarsólsknsstunda er aðeins 5,5 klukkustundir þó þetta séu fjórir dagar. Allra mest skein sólin nokkurn dag um verslunarmannahelgi  á fridegi verslunarmanna árið 1962, 16,0 klukkustundir.   

Sólríkasta helgin í heild var sú sem nú var að líða, 13,3, klst að jafnaði á dag hina fjóra daga en sú sólarminnsta var 0,1 klst árið 1998. Úrkomusamasta verslunarmannahelgina í Reykjavík var  alls 31,4 mm frá frá föstdagsmorgni til þriðjudagsmorguns eftir verslunarmannahelgi en ekki féll dropi úr lofti árin 1965, 1993 og núna 2009.   

Meðaltal hámarkshita alla þessa daga á landinu er svo sem ekki hátt, ekki nema 18,5 stig. En það mun vera nærri meðallgi hvaða daga er vera skal um hásumarið ef tekin eru 60 ár. Ísland er ekki hlýrra en þetta.  

Aðeins fimm helgar hefur tuttugu stiga hiti eða meira mælst alla dagana einhvers staðar á landinu;  1968, 1984, 1999, 2002 og 2003.

Á fylgiskjali 2,''verslo'', má sá hármarks-og lágmarkshita, meðalhita, sól og úrkomu fyrir alla daga verslunarmannahelgar frá 1949 í Reykjavík en skjali ''verslo492'' mesta hita á landinu alla þessa daga.

 

 

 

Skrár tengdar þessari bloggfærslu:

• verslo_492_0.xls
• verslo.xls