Jóla og áramótaveðrið frá 1880

Yfirleitt er veðrið skaplegt um jólin. Þau eru ýmist mild eða frostasöm en næstum því aldrei er sama veðurlag alla þrjá jóladagana. Lítið er um fræg jólaóveður. Samt var mikið vestanveður á aðfangadagskvöld 1957 og varð þá minnisstæður stórbruni í Þingholtunum í Reykjavík. Víða var stormur á aðfangadag 1974 og að morgni  þess dags 1989 var sums staðar fárviðri. Snjókoma setti mjög svip sinn á aðfangadag árið 1960 og 1971 og lokuðust þá vegir. Einnig snjóaði árin  1977 og 1983. Árið 1988 var stormur og snjókoma um allt land á jóladag.

Einstaklega köld jól voru árin 1995, 1968 og 1965 og fyrir norðan líka árin 1980, 1988 og 1989. Jólin 1880 slá þó öll önnur út í kulda. Sérlega hlýtt var á jólunum  1948, 1940, 1934  og 1933 sem voru kannski allra hlýjustu jólin. Mjög hlýtt var fyrir norðan í fyrra. 

Á vef Veðurstofunnar má sjá veðrið kl. 18 á korti alla aðfangadaga frá 1949   Reyndar er hægur vandi að fletta upp á hvaða hátíðisdegi sem er frá 1949 á vef Veðurstofunnar.  Og það ættu menn endilega að gera fremur en liggja í þessum jólabókum alltaf hreint!

Hægt er að sjá á vef Veðurstofunnar snjólag um jólin í Reykjavík árin 1875-1920 og frá 1921. 

Um hlý og köld jól í Stykkishólmi er hægt að lesa þar líka hér.

Úrkomusömustu jól í Reykjavík voru 2005 en 1960 á Akureyri.

Kaldasti gamlársdagur í Reykjavík og á Akureyri var 1976 en 1971 sá hlýjasti í Reykjavík en fyrir norðan var  1968 sá hlýjasti. Hlýjasti nýjársdagurinn í Reykjavík var 2003 en 1973 fyrir norðan. Kaldstur nýjársdaga í Reykjavík var 1948 en á Akureyri 1977. Á töflunum á fylgiskjali er annars hægt að sjá hvaða hátíðisdgar voru hlýjastir og kaldastir bæði í Reykjavík og á Akureyri. 

Þar er hægt að sjá hita, sól og úrkomu yfir alla jóladagana (reyndar líka Þorláksmessu), gamlársdag og nýjársdag í Reykjavík frá 1880 og frá Akureyri frá 1949 en fyrir þann tíma hef ég ekki aðgang að daglegum gögnum frá þeim  stað. Hins vegar eru hér upplýsingar um hita og úrkomu á Hallormsstað frá 1937 til 1948. Veður er ekki alltaf það sama á þessum stöðum en oft er það svipað og Hallormsstaðatölurnar ættu  að gefa bendingu um ástandið á norðausturlandi og jafnvel norðurlandi á jólunum þetta tímabil.

Á blaði 3 í fylgiskjalinu er hægt að sjá út af fyrir sig  meðalhita dagana frá aðfangadegi til annars í  jólum og síðan meðalhita gamlárs-og nýjársdags og samanlagða úrkomu þessa daga.

Úrkoman er hér auðvitað í mm og sólarstundir í klukkustundum. Menn skulu athuga vel að úrkomutölur við hvern dag er úrkoma sem mældist frá kl. 9 þann dag til kl. 9 daginn eftir. Þegar úrkomudálkur er auður hefur ekki komið dropi úr lofti en núllið stendur fyrir vott af úrkomu sem ekki var þó mælanleg. Þá skal nefnt að sól á Akureyri mælist aldrei um jólin  vegna þess að fjöllin byrgja hana.

Nýjársdagurin er auðvitað alltaf  á næsta ári miðað við þá ársetningu sem er við hver jólin í töflunum.  

Dagar með hæstu og lægstu gildi eru auðkenndir og ætti því að vera auðvelt að finna þá í töflunum. 

Meðalhitinn er þarna raunverulegur meðalhiti fyrir Akureyri og Hallormsstað en í Reykjavík  frá  1935 og auk þess árin 1920-1923. Frá 1888 til 1934 er hins vegar meðaltal hámarks-og lágmarkshita viðkomandi dags en árin 1908 til 1919 er um að ræða meðaltal mesta og minnsta álesturs á hitamæli frá því snemma morguns þar til seint á kvöldi, ekki raunverulegs lágmarks-og hámarkshita. Ekki skiptir þessi munur miklu máli um háveturinn. Á blaði tvö á fyrra fylgiskjali má svo sjá mesta og minnsta  hita á landinu öllu hvern hátíðardag frá 1949 og hvar sá hiti mældist. Taflan verður uppfærð eftir hvern dag um þessi jól.   

Það sem hér er framborið er tekið eftir Íslenskri veðurfarsbók 1920-1923, Veðráttunni 1947-2005, Veðurfarsyfirliti frá 2006 og áfram og loks ýmsum öðrum gögnum frá Veðurstofunni.  

Ég óska öllum þeim sem nenna að lesa bloggsíðuna mína gleðilegra jóla. 

Athugið að hægt er að hreyfa fylgiskrána upp og niður og til hliðar.  

Viðbót 28.12. Ég hef nú bætt inn í töfuna við jóladag í fylgiksjalinu snjódýpt að morgni á Akureyri frá 1985 en  lengra aftur eru mér gögn ekki aðgengileg.  Þá kemur í ljós að jólin núna eru þau snjóþyngstu á þessu tímabili. Að morgni jóladags var snjódýptin 58 cm en 76 cm á öðrum í jólum. Alveg frá 1949 a.m.k. hefur svo aldrei falið jafn mikil úrkoma á Akureyri frá því kl. 9 að morgni aðfangadags til sama tíma að morgni þriðja í jólum.

Skrár tengdar þessari bloggfærslu:

• jolavedur_0_0.xls

Athugasemdir

[Emil Hannes Valgeirsson, 22.12.2009 kl. 23:33]

Búinn að lesa og hreyfa fylgiskrána í allar áttir. Hafðu það gott um jólin.

[Sigurður Þór Guðjónsson, 23.12.2009 kl. 00:21]

Skrolla upp og niður eins og Zoa vill kalla það!

[Brjánn Guðjónsson, 23.12.2009 kl. 19:12]

ég gleðst yfir spánni núna því mér leiðist snjór. mér er svo sem slétt sama hvernig viðrar á aðfanga- og jóladag. mér finnst mikilvægara að veður sé skaplegt um áramót, enda þau meiri hátíð í mínum huga. svo er lítið gaman að horfa á flugelda í éli, eins og var á gamlárskvöldi 1984. reyndar ekkert á að horfa. maður sá ekki neitt.

[Sveinn Atli Gunnarsson, 23.12.2009 kl. 19:55]

Gleðileg jól.

[Áskell Örn Kárason (IP-tala skráð) 23.12.2009 kl. 21:34]

Hef litlu við fyrri umsagnir að bæta. Alldeilis ómetanleg jólagjöf að fá svona sendingu heim til sín á Þollák. Megi höfundurinn eiga góð og gleðileg jól!

[ásk (IP-tala skráð) 23.12.2009 kl. 21:36]

[Þorsteinn Briem, 24.12.2009 kl. 02:27]

Gleðileg jól og áramót og allt þar á milli!

[DoctorE (IP-tala skráð) 25.12.2009 kl. 10:11]

[Kama Sutra, 26.12.2009 kl. 04:06]

[Kama Sutra, 26.12.2009 kl. 04:12]

;)