Nýjárskveðja með fylgiskjali um veðrið árið 2011

Hér birtist þá hið undurfurðulega fylgiskjal fyrir veðrið árið 2011 í sama stíl og árið 2010. Skýringar má finna hér.

Annars er ég að hugsa um að hætta alveg að blogga. Eftir að ég hætti að skrifa um annað en veðrið nennir enginn að lesa það hvort sem er. Lesturinn hefur gjörsamlega hrunið en var mikill meðan ég lét gamminn geisa um hvað eina. Fyrirbærið blogg á Íslandi er reyndar á fallanda fæti.

Ég hef bloggað í rúm þrjú ár og að því kemur að maður þreytist. Ég hreinlega nenni þessu ekki lengur. En mér finnst nokkuð gaman á facebook og er þar mjög virkur. En facebook er fyrst og fremst bara djók milli vina og kunningja. Þar kemur nú ekki veðrið mikið við sögu. 

Það stóð til að setja inn á bloggið gagngerða endurskoðun á pistlunum um hlýjustu og köldustu mánuði. Hún er alveg tilbúin að smáatriðum fráteknum og ég veit ekki hvers vegna ég kem henni ekki frá mér á síðuna en kannski koma þeir pistlar þó einhvern tíma. Líklega er almennum bloggleiða um að kenna. En kannski líka því að svo til engir nenna lengur að lesa bloggið mitt eftir það breyttist í veðurblogg nær eingöngu.  

Allt á sér sinn tíma. Og minn tími er líklega liðinn hvað blogg varðar. En þetta var ansi gaman þegar hasarinn var sem mestur. Það var árið 2008.   

En hvernig sem allt veltist mun fylgiskjalið áfram fylgjast með öllu í veðrinu eitthvað áfram. Eins og áður er Reykjavík og fleira á blaði 1 en Akureyri á blaði 2.

Ég óska öllum til hamingju með glænýja árið og gott að vera laus við það gamla og úrelta.

 

 

Skrár tengdar þessari bloggfærslu:

• akrv_2011.xls

Athugasemdir

[Sveinn Atli Gunnarsson, 2.1.2011 kl. 21:06]

Gleðilegt ár og takk fyrir það gamla, megir þú blogga sem lengst um veðrið.

[Emil Hannes Valgeirsson, 2.1.2011 kl. 21:16]

Gleðilegt ár Siggi. Það er að minnsta kosti einn sem kíkir á þessar excel-skrár hjá þér enda svona fín þjónusta ekki í boði annarstaðar. Dýrðardagar bloggsins er sennilega að baki en það eru samt ennþá blómleg veður- og vísindablogg hér í gangi. Það má eiginlega kalla þetta strákablogg, ég man t.d. sjálfur ekki hvenær kvenvera kom með athugasemd hjá mér síðast. Jú reyndar var það í lúpínudeilunni í sumar.

[Mali (IP-tala skráð) 3.1.2011 kl. 03:53]

Hver á þá að blogga um mig og hinar kisurnar? 

[Gunnar Th. Gunnarsson, 3.1.2011 kl. 11:47]

Það er alveg óþarfi með yfirlýsingar um að hætta að blogga. Við erum þó nokkrir sem fylgjumst með þegar eitthvað dettur inn hjá þér.

[Áskell Örn Kárason (IP-tala skráð) 3.1.2011 kl. 18:42]

Hættu að tuða, Siggi. Allir skynsamir veðurnördar banna þér að hætta veðurbloggi og þvílíka vísindaiðkun.

Samfélagsmálin enda hinsvegar alltaf í bulli. Höldum okkur því við veðrið! Það skiptir höfuðmáli.

[Einar Daði Reynisson (IP-tala skráð) 3.1.2011 kl. 20:28]

Gleðilegt nýtt ár, endilega haltu áfram að blogga um veðrið, mjög gaman að lesa þetta.

[Sigurður Þór Guðjónsson, 3.1.2011 kl. 21:13]

Skynsamir menn eru yfirleitt leiðinlegastir allra manna. Þá eru nú tuðararnir skárri! 

[Höskuldur Búi Jónsson, 3.1.2011 kl. 21:38]

Gáðu til veðurs með Guða
og greiðlega mun einhver tuða
um veðrið þá blogga
á blogginu mogga
uns sunnanþeyr byrjar að suða.

Gaman að þínu bloggi Sigurður..

[Marta B Helgadóttir, 11.1.2011 kl. 11:07]

Hysterískur aðdáandi kvittar fyrir innlitið.

Ég vona að þú haldir áfram að blogga.

Það eru fæstir betur skrifandi í bloggheimum.

[Ásta Björk Solis, 13.1.2011 kl. 06:43]

Thu ert flottur gaei og thad er ahugavert ad lesa thina sidu...