Þjóðin kemur upp um sljóa náttúruvitund sína

Þó veðurfræðingur segi að apríl hafi verið í heitari kantinum og langt sé frá að hann hafi verið sérstaklega kaldur mun það líklega engu breyta um það hvernig margir  tala um þessa vorkomu á fréttastofum, í fjölmiðladálkum, bloggi og á fasbókarsíðum. 

Þar er hreinlega látið sem ekkert bóli á vorinu og vetrarveður hafi nánast ríkt allan apríl. Fréttamenn RÚV spyrja jafnvel veðurfræðinga mjög leiðandi spuninga, svo sem ''fer nú ekki að  vora'' og þar fram eftir götunum. 

Í morgun var alauð jörð á nánast öllum mönnuðum veðurstöðvum og það var hvergi alhvítt. Minnsti hiti í Reykjavík það sem af er apríl er nærri meti. Sólskin er nálægt meðallagi í  borginni.  Meðaltal mesta dagshita á landinu er farið að slaga upp í það hæsta sem þekkist. Margt fleira mætti nefna. 

En það hefur reyndar  verið votviðra- og vindasamt.

Ekki ætlast ég til að allir hafi áhuga á veðri. En það er mjög einkennilegt að fólk sem hefur þó búið í landinu alla sína tíð og lifað marga aprílmánuði skuli ekki bara telja sér trú um að ekkert hafi vorað heldur emji beinlínis hástöfum yfir því.

Einkennilegast er þó að fólk skuli ekki sjá vorið með sínum eigin augum.

Nokkuð stór tré blasa við úr stofuglugganum mínum þar sem ég hef búið í nær  aldarfjórðung.  Fjarlægðin í þau úr glugganum er umtalsverð. Eigi að síður sést úr  glugganum mjög greinilega að trén eru farin að laufgast heilmikið og meira en oftast á þessum árstíma. Litlir runnar hér í  garðinum segja sömu sögu. Þeir eru orðin algrænir að sjá úr margra metra fjarlægð.

Samt er fólk að spyrja hvort fari ekki að vora bráðum. Það virðist  vera gersamlega blint á  teikn    náttúrunnar.  

Umhverfisást er nú mjög í tísku. Allir þykjast bera einstaka umhyggju  fyrir umhverfinu og  hafa  til dæmis voðalegar áhyggjur af veðurfarsbreytingum af mannavöldum. 

Múgsefjun þjóðarinnar gegn þessu merkilega vori sem nú lætur allt blómstra löngu fyrir tímann kemur illIlega upp um hana. Hún sýnir ekki umhverfisvitund af neinu tagi. Hún  vitnar  þvert á móti um umhverfissljóleika af hæstu gráðu.

Þjóðin sér ekki einu sinni vorið þegar það kemur með látum. Veðráttan er þó mest áberandi umhverfisþátturinn. Það má nærri geta að þeir sem skynja hana ekki skynji nú ekki sérlega mikið af öðru umhverfi til að festa ást sína á! 

Því miður geri ég ekki ráð fyrir að þessi frétt með uppljóstrun Trausta Jónssonar um nokkrar veðurstaðreyndir breyti miklu. 

Margt fólk mun halda áfram að heimta vor þangað til ísköld norðanáttin steypist yfir landið með stórhríð  fyrir norðan en skellibjörtu sólskini  fyrir sunnan og  næturkulda sem mun  drepa allan  gróður!

En þá munu fréttamenn, fjölmiðlapennar, bloggarar og fasbókarar hrópa upp yfir sig af  veðurgleði og ósvikinni náttúrverndarást: 

Loksins! Loksins! Vorið er komið! 

 

Apríl alls ekki svo kaldur

Skrár tengdar þessari bloggfærslu:

• akrv_2011_21_0.xls

Athugasemdir

[Sveinn Atli Gunnarsson, 28.4.2011 kl. 14:48]

Er þessi setning ekki dáldið stór fullyrðing:

Allir þykjast bera einstaka umhyggju  fyrir umhverfinu og  hafa  til dæmis voðalegar áhyggjur af veðurfarsbreytingum af mannavöldum. 

Er þetta nú ekki sama fullyrðingagleðin og þú ert að segja að fólk hafi almennt um vorið (ég er sammála þínu mati á vorkomunni)... Ég tel að almennt hafi fólk ekki miklar "áhyggjur" af umhverfinu eða veðurfarsbreytingum og það er alls ekki sjálfgefið að það séu þeir sömu sem almennt kvarta undan vorkomunni og þeir sem hafa almennt áhuga á náttúrunni, svo dæmi sé tekið...

Afsakið að ég nefni þetta, en mér finnst þetta nú ansi djúpt í árina tekið þarna, þó svo að stór hluti almennings hafi frekar lélegt veðurminni og ekki allir svona duglegir eins og þú að fylgjast með veðri og vindum. En ég tek undir margt sem þú segir þarna - alls ekki misskilja það

[Sigurður Þór Guðjónsson, 28.4.2011 kl. 15:19]

Það eru svo margir sem hafa tekið djúpt í árinni undanfarið um veðrið að það er bara í stíl að gera það líka í pistli sem er nú einu sinni í ádeilustíl em sjaldnast er alveg hárnákvæmur.

[Sigurður Þór Guðjónsson, 28.4.2011 kl. 15:24]

Já, og þó langflestir menn séu ekki duglegir að fylgjast með veðrinu eru þó allir með augu í hausnum og ættu að sjá vormerkin.

[Sveinn Atli Gunnarsson, 28.4.2011 kl. 15:40]

Skemmtilegur pistill allavega...hvað sem líður fullyrðingum...

Fólk sér ekki endilega vormerkin, enda virðist það bara muna eftir rokinu og rigningunni sem hefur verið ansi viðloðandi að undanförnu - hvað sem öðru líður.

En ég tek undir með þér, vorið er komið og merkin um það eru klárlega til staðar.

[Sigurður Þór Guðjónsson, 28.4.2011 kl. 15:50]

Það hefði nefnilega getað verið rólegri og þurrari apríl en miklu miklu kaldari svo gras væri ekki einu sinni farið að grænka án þess að fólk kvartaði nokkuð yfir því að ekki væri farið að vora.

[Emil Hannes Valgeirsson, 28.4.2011 kl. 16:24]

Vorvindar glaðir gletnir og hraðir.

[DoctorE (IP-tala skráð) 28.4.2011 kl. 17:25]

Áðnamaðkarnir segja líka að vorið sé komið

[Gunnar Th. Gunnarsson, 28.4.2011 kl. 18:08]

Ágæt hugvekja, Nimbus

[Sigurður Þór Guðjónsson, 28.4.2011 kl. 19:12]

Herr Doctor: Er þetta sneið til mín? Þú verður að senda kræfa kisumynd til að blíðka mig!

[DoctorE (IP-tala skráð) 28.4.2011 kl. 20:13]

Ekki sneið til þín sko.. frekar til þeirra sem átta sig ekki á að vorið sé komið fyrr en það kemur í fréttum  :)

[Sigurður Þór Guðjónsson, 28.4.2011 kl. 20:19]

Það er aldeilis orðið vorlegt á þessari bloggsíðu!

[Höskuldur Búi Jónsson, 28.4.2011 kl. 20:46]

Ætli bévítans hvassviðrið sé ekki að trufla fólk - það gerir allt svo haustlegt

[Arnar Pálsson, 30.4.2011 kl. 14:02]

Flott hjá þér Sigurður, alltaf gaman að þessum pistlum þínum.

Náttúruvitund er sannarlega ábótavant, en það er örlítið spaugilegt að við skulum lenda þeirri ályktun á tæknivæddum samskiptamiðli pikkandi á kassalaga stafi, horfandi á kassalaga lampa, innilokaðir í kössum í kassaþorpi, fjarri raunverulegri náttúru.

[Sigurður Þór Guðjónsson, 30.4.2011 kl. 14:23]

Þarf reyndar að passa mig í dag að fara ekki að heimta vor þegar ég horfi á snjókomuna! En á Egilsstöðum er reyndar 16 stig hiti.

[Höskuldur Búi Jónsson, 30.4.2011 kl. 16:35]

Ég er í Fossvoginum og þar er snjókoma - þetta er samt svona volg snjókoma, held að gróðri verði ekki meint af þessu :)

[Sigurður Þór Guðjónsson, 30.4.2011 kl. 18:23]

Það er nú aldrei gott að vera hálfvolgur. En maður spyr samt hvers vegna sé svona kalt á smábletti suðvetanlands en ekki annars staðar. Hafa máttarvöldin eitthvað á móti höfuðborgarbúum? Kannski er þetta bara byrjunin á aðal vorkuldunum! Það versta er áreiðanlega eftir.

[Sigurður Þór Guðjónsson, 30.4.2011 kl. 18:26]

Vélreiknaðar spár eru alltaf að spá þessari líka blíðunni en hún er bara alltaf í framtíðinni og hrekkur bara lengra frá alveg eins og hamingjan!

[Sigurður Þór Guðjónsson, 30.4.2011 kl. 19:21]

Ásdís veðurfræðingur var að segja að í veðrinu í dag hefði það gerst sem ekki ætti að geta gerst. Það er nú alltaf gaman þegar slíkt gerist!

[Emil Hannes Valgeirsson, 30.4.2011 kl. 20:49]

Kannski eru æðri máttarvöld hér að verki. Reykvíkingum að hefnast fyrir veðurnöldrið.

[Sigurður Þór Guðjónsson, 30.4.2011 kl. 21:05]

Svo er 18 stiga hiti á Seyðisfirði og 15 á Raufarhöfn! Hvað með byggðajafnréttið? Þessi dagur er vægast sagt ferlega niðurdrepandi.