Hvað varð af mæligögnum sjálfvirkra stöðva?

Nú er ekki hægt að komast inn á mæligögn sjálfvirkra stöðva í töfluformi  á vef Veðurstofunnar og hefur svo verið í nokkra  daga. Hægt hefur verið að skoða þetta fjóra daga aftur í tímann. Þetta veldur því að ekki er hægt að fylgjast með þróun mála á þessum stöðvum hvað varðar t.d. hámarks-og lágmarkshita, vindhraða , úrkomuferill og fleira og er það vægast sagt bagalegt. Enn eru uppi línuritin. En töflurnar eru nákvæmari.

Þetta hlýtur að vera eitthvað tímabundið. Ég trúi því alls ekki að búið sé að loka aðgangi að þessu fyrir almenning. 

Í morgun kl. 9 var hámarkshiti Reykjavíkur skráður 17,5 stig á kvikasilfursmæli og á að vera frá kl. 9-9. Í gær frá kl. 9-18 var mesti hiti 15,7 stig og voru 13,4 kl. 18 og 12,9 kl. 21. Ekki er nú hægt að tékka á sjálfvirku stöðvunum. En það gengur hreinlega ekki upp að þessi hámarkshiti , 17, 5 stig, hafi mælst frá kl. 18 í gærkvöldi til kl. 9 í morgun. 

Í júní voru einnig fáein dæmi um það að hámarkshiti lesinn kl. 9 að morgni væri óeðlilega hár og ekki í samræmi við hámarkshita sem lesin var kl. 18 daginn áður og gang hitans um kvöldið og nóttina til næsta morgun. Fleiri hafa bent á þetta en ég. Þetta virðist aðeins gilda um morgunálesturinn.

Það er eitthvað bogið við þetta. 

Síðasta hefti Veðráttunnar sem birst hefur er fyrir maí 2005. Hún hefur dregist meira aftur úr en þegar verst var á fyrstu árum Veðurstofunnar. Ekki hefur komið ársyfirlit í ein tíu ár.

Það er þó mikil bót í máli að ýmislegt hefur verið sett á vef Veðurstofunnar um niðurstöður hvers mánaðar fyrir mannaðar stöðvar eftir maí 2005.

Frá og með 2001 hóf Veðráttan að birta mánaðarniðurstöður fyrir vissa þætti fyrir sjálfvirkar stöðvar. En ekkert slíkt hefur verið sett á vef Veðurstofunnar. Engar upplýsingar er því nokkurs staðar að hafa um mánaðarniðurstöður sjálfvirkar stöðva frá því vorið 2005. 

Það væri  nú ágætt ef þær yrðu settar á vefinn. 

Að svo mæltu sláum við þessu bara öllu upp í kæruleysi og skoðum hið staðfasta fylgiskjal fyrir þennan júlí sem nú er að líða.

 

Skrár tengdar þessari bloggfærslu:

• akrv_2011_42_0.xls

Athugasemdir

[Trausti Jónsson, 8.7.2011 kl. 11:47]

Verið er að flytja tölvur Veðurstofunnar milli húsa. Meðan á því stendur má búast við að einkennilegar truflanir á aðgengi gagna komi upp. Gögn sjálfvirku stöðvanna eru nú sem stendur aðgengileg á síðunni:

http://andvari.vedur.is/athuganir/sjalfvirkar/index_st.html

Þessi tafla endurnýjast aðeins seinna (20 til 25 mín eftir heila tímann) en sú sem á að vera á aðalvefnum. Það kemur sjaldan að sök.

Hámarksmisferlið er í rannsókn.

[Sigurður Þór Guðjónsson, 8.7.2011 kl. 13:45]

Takk fyrir þetta. Sauður er ég að hafa ekki munað eftir þessari síðu.

[Hilmar Þór Hafsteinsson (IP-tala skráð) 8.7.2011 kl. 21:45]

Eru Trausti og hinir kolefniskirkjutrúboðarnir bara ekki að reyna að vega upp á móti hnattkólnuninni?