Löng snjóhulutímabil í Reykjavík

Alhvít jörð hefur nú verið í Reykjavík frá 26. nóvember eða í 22 daga samfellt og jörð var flekkótt tvo næstu dagana þar á undan.

Þau gögn sem ég hef aðgang að um daglega snjóhulu í borginni ná því miður aðeins til haustins 1985. Í þeim er snjóhula tilgreind og hvort alhvítt er eða flekkótt jörð. Alltaf er snjódýptin með þegar alhvítt er en stundum er hún líka tilgreind í gögnunum, jafnvel heilmikill, þó jörð sé talin aðeins flekkótt. Satt að segja átta ég mig ekki alveg á þessu en í töflunum í fylgiskjalinu við bloggfærsluna hef ég sleppt snjódýptartölum þegar jörð er ekki talin alhvít en bara þá sett orðið ''flekkótt''. Á stöku stað verður þetta dálítið skondið, heilmikil snjódýpt fyrir og eftir en svo flekkótt á milli! En ég nennti ekki að útbúa sérstakan dálk fyrir snjóhulu sem alltaf er hvort sem er algjör í þessum töflum nema þegar flekkótt er.  

Lítill snjór hefur verið síðustu ár. Og snjóhulan núna er lengsta tímabil með alhvítri jörð í Reykjavík síðan um áramótin 2004 til 2005. Seint á árunum 2000 og 1999 komu þó lengri tímabil og sérstaklega var snjóasælt árin 1989, 1990 og 1992 og komu þá miklu lengri tímabil með alhvítri jörð. Þetta er samt ekki nákvæmt yfirlit. Ýmis önnur tímabil geta hugsanlega komist upp á dekk. En þetta er svona það sem virðist stinga mest í augu.

Í öðru fylgiskjalinu má sjá þessi tímabil (hitt er það hefðbunda um veðurlag mánaðarins). Þar er árið í svörtum dálki, síðan viðkomandi mánuður ársins með númeri mánaðarins, dagsetning og loks snjódýptin sjálf í lituðum dálkum. Þetta ætti að vera auðskilið og kannski hafa einhverjir snjófíklar gaman af.

Verði alhvítt framyfir jól fer þetta að nálgast alvöru snjóaskeið. 

 

 

 

 

Miklar líkur á hvítum jólum

Skrár tengdar þessari bloggfærslu:

• snjorrv.xls
• akrv_2011_75_0.xls

Athugasemdir

[Hilmar Þór Hafsteinsson (IP-tala skráð) 18.12.2011 kl. 00:14]

Þakka áhugann og eljuna Sigurður. Já, það fer sannarlega að nálgast alvöru snjóaskeið.

[Sigurður Þór Guðjónsson, 18.12.2011 kl. 00:32]

Hef á tilfinningunni að þennan snjó leysi ekki fyrr en um Seljumannamessu!

[Emil Hannes Valgeirsson, 18.12.2011 kl. 00:36]

Snjórinn dugar sennilega ekki fram á hásumar, en nógu athyglisvert væri að fá alhvítann desember. Hvenær ætli það hafi gerst síðast?

[Sigurður Þór Guðjónsson, 18.12.2011 kl. 00:43]

Það hefur bara aldrei gerst í Reykjavík síðan farið var að fylgjast með því upp úr 1920. 1982 voru 27 alhvítir dagar. En snjólagsprósentan var mest 85% 1999 og sá desember sést þarna. Reykajvík er ekki mikil snjóakista.

[Sigurður Þór Guðjónsson, 18.12.2011 kl. 00:44]

Kannski að þessi desember slái snjóamet. Það væri gott á - ég veit ekki hverja!

[Sigurður Þór Guðjónsson, 18.12.2011 kl. 10:42]

Ekki var þetta nú alveg rétt hjá mér um snjóinn í Reykajvík. Flestir alhvítir dagar voru aðeins 24, árin 1954, 1957, 1993 og 1999. En sjólagstala mest 85% árin 1954 og 1999. Árin 1952, 1987 og 2002 var aldrei allhvítt. Enginn desember hefur verið alveg snjólaus en 1952 var alautt í 30 daga og flekkótt í einn dag.

[Sigurður Þór Guðjónsson, 22.12.2011 kl. 16:28]

Ég sé á bloggi Trausta Jónssonar í dag að flestir alhvítir dagar í desember voru 25 árin 1923 og 1936 en einmitt báða þessa mánuði (og fáeina aðra) vatnar snjódagafjölda í þeim prentuðu gögnum sem ég hef undir höndum.

[Sigurður Þór Guðjónsson, 29.12.2011 kl. 19:43]

Þetta er nú meiri snjóaþvælan! Mesta snjólagstala í desember í Reykjavík var 88% árið 1955.