Mesti febrúarhiti í Reykjavík 1935

Þennan dag, 8. febrúar 1935, mældist mesti hiti sem mælst hefur í Reykjavík í febrúar, 10,1 stig. Veðurstöðin var þá á þaki Landsímahússins við Austurvöll. Hlýindi voru um þetta leyti í nokkra daga. Þau  byrjuðu þann 6. með asahláku um land allt. Þá var djúpð lægð yfir Grænlandi. Þennan dag fór hitinn í 14,0 stig í Fagradal í Vopnafirði. Næsta dag komst hitinn á Akureyri í 13,2 stig sem þá var mesti hiti sem þar hafði mælst í febrúar en metið var slegið 1980 og tvisvar eftir það.

Þann 8. fór djúp og kröpp lægð norðaustur um landið og fylgdi henni sunnanofsaveður með rigningu. Veðrið skall á af suðaustri á sjöunda tímanum síðdegis. Loftvægi fór niður í 957,1 hPa um kvöldið í Stykkishólmi. Vindur var talinn 12 vindstig í Reykjavík og 10 sums staðar annars staðar á landinu. Enskur togari strandaði við Sléttanes við Dýrafjörð og fórust allir sem um borð voru. Kirkjan í Úthlíð í Biskupstungum fauk út í buskann og sums staðar fuku skúrar og útihús. Mjög víða fuku húsþök og er sagt að þakplötum hafi rignt yfir Reykjavík. Loftnet útvarpsstöðvarinnar á Vatnsenda slitnaði. Í  þessum látum mældist sem sé methitinn í Reykjavík. Í Vík í Mýrdal fór hitinn þá í 9,5 stig. Næsta morgun mældist úrkoman á Vattarnesi 52,3 mm og 46,9 á Teigarhorni en 13,0 í Reykjavík.

Eftir að lægðin fór yfir landið kom fyrst snöggt norðanáhlaup en svo útsynningur með éljum vestanlands. 

Í febrúar 1942 mældist einnig 10,1 stig í Reykjavík og var það þann 16. Þá var ekkert illviðri.

Skrár tengdar þessari bloggfærslu:

• akrv_2013_10_0.xls

Athugasemdir

[Ómar Ragnarsson, 8.2.2013 kl. 19:42]

Stórmerkilegt að þetta skuli gerast á sama tíma sem hópur bloggara talar í sibylju um "meinta hlýnun."

[Gunnar Th. Gunnarsson, 12.2.2013 kl. 02:06]

Það talar engin um "meinta hlýnun" Ómar. Menn gjalda hins vegar varhug við móðursýkislegum aðgerðum gegn henni og sömuleiðis við ofurtrú á að hún sé öll manninum að kenna.

[Sigurður Þór Guðjónsson, 12.2.2013 kl. 12:41]

Þessi hiti mældist árið 1935 löngu fyrir daga bloggsins og ég skil ekki almennilega hvernig þetta kemur bloggurum nútímans við. 

[Birnuson, 12.2.2013 kl. 15:15]

Fáum við færslu með fyrirsögninni „Vor í febrúar“ ef dvergliljurnar springa út fyrir lok mánaðarins?

[Sigurður Þór Guðjónsson, 12.2.2013 kl. 16:40]

Hafísavorið mikla 2013 er eftir. Þá verða frost svo mikil að orðin frjósa á vörum frambjóðenda á kosningafundum.