Hlýindi

Það hefur víst ekki farið framhjá hinum vorþyrstu að hlýtt hefur verið á landinu í gær og í dag. Í gær komst hitinn mest í 18,1 stig í Skaftafelli en í dag 16,3 á Húsafelli. Ekki eru þetta þó dagsmet, hvað þá mánaðarmet. Hiti hefur nokkrum sinnum komist yfir 20 stig á landinu í apríl og það svo snemma sem þann þriðja.

Slkilyrði hafa verið í háloftunum fyrir um 17 stiga hita eða jafnvel meira á Reykjavíkurvæðinu og víðar en ekki hefur það skilað sér til jarðar. En þetta er sá hiti sem við bíðum eftir hér í Reykjavk að fari að koma í apríl. Mesti hiti sem mælst hefur í Reykjavík í apríl eru snautleg 15,2 stig. þ. 29. árið 1942. En talsvert meiri hiti hefur mælst víða á suður og vesturlandi. En tuttugu stiga hiti hefur aldrei mælst í apríl nema austan til á landinu á nokkrum stöðum. Í dag fór hitinn í Reykjavik í 13,1 stig og 11,1 í gær en á Akureyri komst hitinn í dag í 14, 5 stig en 13,5 í gær. Mesti hiti sem mælst hefur í Reykjavík á sumardaginn fyrsta er 13,5 stig.

Þó engin met hafi hafi verið slegin er þetta svo mikill hiti að hann mun ekki standa nema í fáa daga. Meðaltal hámarkshita í Reykjavík 23. apríl. nær ekki sjö stigum. Í Reykjavík er það ekki fyrr en um 20. maí sem hámarkshiti að staðaldri nær tíu stigum að meðaltali hvern dag og það stendur fram undir 20. september. Það er hins vegar mjög um þetta leyti, kringum sumardagin fyrsta, sem hámarkshiti á landinu að staðaldri nær 10 stigum og stendur fram í miðjan október. En auðvitað geta hlýir dagar komið og farið snemma vors og á haustin. 

Meðalhiti þessa mánaðar er  tvö stig yfir meðallagi í Reykjavík en tvö og hálft á Akureyri, miðað við 1961-1990, en rúmlega eitt stig á báðum stöðunum miðað við síðustu tíu ár. Næstu daga mun meðalhitinn enn rísa.

Snjólaust hefur verið á Akureyri í um það bil viku og víða annars staðar norðanlands er enginn snjór eða bara flekkótt jörð, jafnvel á Hólsfjöllum og við Mývatn, en alhvít jörð  er þó enn á stöku stað. 

Fylgiskjalið fylgist með. 

Skrár tengdar þessari bloggfærslu:

• akrv_2014_7_0.xlsx

Athugasemdir

[Torfi Stefánsson (IP-tala skráð) 24.4.2014 kl. 09:08]

Sæll Sigurður.

Þú segir svo frá að meðalhiti þessa mánaðar sé tveimur stigum yfir meðallagi í Reykjavík miðað við 1961-1990, en rúmlega einu stigi miðað við síðustu tíu ár.

Í fylgiskjali kemur fram að meðalhiti það sem af er apríl hafi verið 4,4 gráður hér í Rvík.

Síðan segir að meðalhiti árin ´61-´90 hafi verið 2,9 stig (sem gerir reyndar aðeins 1,5 undir meðalhitanum í apríl í ár) og 4 stig á síðustu 10 árum (sem gerir aðeins 0,4 gráður undir meðaltali þessa aprílmánaðar).

Þ.e.a.s. ef ég les rétt út úr exel-skjalinu.

Annars spái ég góðu sumri í ár.

Svo virðist sem fleiri séu að spá því þar sem þeir gera ráð fyrir að El Nino fari að láta á sér kræla núna strax í júní:

http://www.yr.no/nyheter/1.11678214

[Sigurður Þór Guðjónsson, 24.4.2014 kl. 11:57]

Þakka ábendinguna Torfi. Ég miðaði við meðalhitnn til 23. apríl en ekki allan mánuðinn. En þarna var samt smámisræmi sem stafaði að því að textinn var skrifaður um miðjan dag áður en meðalhitin þessa síðasta dags hafði verið reiknaður.  

[Sigurður Þór Guðjónsson, 24.4.2014 kl. 16:36]

Hér hefur verið tekin upp sú nýbreytni í fyrsta sinn að athugasemdir eru ekki birtar sjálfkrafa heldur eftir að síðuhaldari hefur samþykkt þær. Þetta er vissulega neyðarúrræði en er gert til að halda frá þeim sem kunna sig ekki á netinu. Og rétt áðan var að koma meinfýsin athugasemd með enga efnislega vigt sem sýnir að ekki er vanþörf á. Þeir sem iðka slíka siði verður einfaldlega haldið frá þessari síðu.