Skýringar á bloggáhuga þjóðarinnar

Víkverji á Mogganum er í dag að fjargviðrast yfir bloggi:

"Sumt blogg hefur frétta- og upplýsingagildi, það hefur sýnt sig, þegar upplýstir vel tengdir menn eiga í hlut. Slíkt blogg er ágætt aðhald fyrir fjölmiðlana í landinu. Víkverji botnar aftur á móti ekkert í öllu þessu persónulega bloggi. Hvaða erindi á það við almenning? Það er sök sér ef menn eru staddir erlendis eða á afskekktum fjörðum að þeir vilji blogga um ævintýri sín fyrir sína nánustu en Víkverji skilur ekki fyrir sitt litla líf hvers vegna vandalausir hafa áhuga á kynlífsraunum vinkvenna Ellýjar Ármannsdóttir sjónvarpsþulu.

Hann virðist þó vera þar í miklum minnihluta en samkvæmt könnunum liggur íslenska þjóðin yfir þessu og öðru persónulegu bloggi daginn út og daginn inn. "

Ég held að menn bloggi og lesi blogg af því að þeir hafa gaman af því. Blogg er svo skrambi   fjölbreyttur heimur, nánast eins og bloggararnir eru margir. Það er mjög þröngur skilningur á blogginu að líta á það sem eins konar framhald af hefðbundnum fjölmiðlum sem dreifa aðallega fréttum og upplýsingum. Bloggið er ekki heldur bara skoðanir einhverra "álitsgjafa" á opinberum málefnum. Allt er þetta þó  gott og gagnlegt.

Blogg er líka leikur, skáldskapur, skemmtun. Allir skilja nema Víkverji að sögurnar um vinkonur Ellýjar Ármannsdóttur eru til dæmis hvergi til nema í hennar eigin hugskoti. 

Eitt af því skemmtilegasta við bloggið er einmitt það hvað skilin milli ímyndunar og raunveruleika, gamans og alvöru, eru þar óglögg. Það gefur fantasíunni undir fótinn. Þess vegna reka margir upp stór augu þegar opinberar persónur, vanalega svaka streit og stífar, reynast vera hinar skemmtilegustu og vingjarnlegustu persónur þegar þær fara að blogga. Þá kemur manneskjan í ljós.

Maður er manns gaman. Það er svo sannarlega í lagi að menn séu persónulegir í blogginu sinu og öðrum langi til að lesa þá alveg eins og menn litu inn hjá kunningjum sínum þegar voru aðrir tímarnir.  Það reynir þó alltaf á smekkvísi og velsæmi í bloggi eins og annars staðar í lífinu. Og veldur hver á heldur. Sumir gera allt skemmtilegt sem þeir blogga um. Aðrir gera allt leiðinlegt. 

Eitt vil ég sérstaklega nefna um bloggið og tel það jákvætt mjög. 

Það er að drepa aðsendar greinar í Morgunblaðinu.

Hvers vegna? Vegna þess að í þeim greinum hafa það verið óskráð lög að menn séu í sérstökum stellingum sem taldar eru hæfa prentuðu opinberu máli. Þær stellingar eru formlegar, stirðar og leiðinlegar. Moggagreinastíllinn er orðinn algjörlega úreltur. Allir skemmtilegustu pennarnir eru löngu farnir að blogga og þar geta þeir verið miklu frjálsari og beinskeytari en hægt er að vera í blaðagreinum.

Þjóðin liggur í blogginu fyrst og fremst af því að Mogginn er orðinn svo fjandi leiðinlegur!  

 

Athugasemdir

[Marta B Helgadóttir, 5.6.2007 kl. 19:48]

Tek undir þetta að öllu leyti.

[Eva Þorsteinsdóttir, 5.6.2007 kl. 19:50]

Algerlega 100% sammála.

[Júlíus Valsson, 5.6.2007 kl. 20:17]

Alveg sammála þér Sigurður! Því má við bæta, að maður getur alltaf strokað bloggið út!

[Viðar Eggertsson, 5.6.2007 kl. 21:29]

... en Velvakandi situr uppi með bullið sitt um aldur og ævi!

Getur ekki látið það hverfa sem einu sinni er komið á prent, hversu arfavitlaust sem það er - eins og t.d. þessi pistill hans um bloggheima.

[Jens Guð, 5.6.2007 kl. 23:05]

  Þetta er góð færsla.  Bloggið hefur fjölda kosta umfram aðra fjölmiðla.  Einn kosturinn er að allir geta strax gert athugasemdir.  Það er oft gaman að lesa fróðleiksmola á eitthverju blogginu og sjá síðan hvernig meiri fróðleikur bætist við í athugasemdunum.

  Ég sá eða heyrði einhverja konu kvarta undan því sem Víkverji hrósar við blogg.  Hún kvartaði undan því að menn væru farnir að gleyma því að blogg hafi upphaflega verið rafræn dagbók.  Þannig vill hún að blogg sé í staðinn fyrir að fólk sé að skrifa um allt annað sem eigi ekkert skilt við dagbókarfærslur.

[Ragga (IP-tala skráð) 6.6.2007 kl. 08:00]

Góður pistill.

Fyndið að einhver einn telji sig geta ákveðið hvernig blogg eigi að vera, fréttapistlar eða dagbókarfærslur.  Leyfum fólki að gera það sem það vill. 

[Svava frá Strandbergi , 6.6.2007 kl. 09:00]

Sammála Ragga.

[Árni Steingrímur Sigurðsson, 6.6.2007 kl. 12:54]

Er hann ekki eins og önnur dýr náttúrunnar, næmur fyrir breytingu á umhverfi sem ógna tilvist lífverunnar?

[Heimir Lárusson Fjeldsted, 6.6.2007 kl. 13:53]

Sammála, ekki bara síðasta ritara heldur öllum og Víkverja líka.

[Sigurður Þór Guðjónsson, 6.6.2007 kl. 13:58]

En nú get ég ekki á mér setið að verða ósammála. Ég þoli ekki þegar allir eru sammála!

[Rannveig Bjarnfinnsdóttir, 6.6.2007 kl. 15:34]

Já það er merkilegt að vera bæði sammála víkverja og öllum hér  

En ég er fullkomlega hlynnt bloggi og fólk ræður auðvitað hvað það les og hvað ekki í bloggheimum (sem og annarsstaðar).  Ég sjálf byrjaði einmitt að blogga um mitt líf þegar ég greindist með krabbamein aðeins þrítug að aldri.  Ég leyfði mínu fólki að fylgjast með líðan minni í gegnum meðferðina; geisla, lyf og skurðaðgerð og ég hefði algjörlega sturlast ef ég hefði þurft að taka við jafn mörgum símtölum og heimsóknum og ég fékk á blogginu mínu.  Þetta létti mjög á álaginu og ég náði að skrifa mig heilmikið frá erfiðleikunum.  Fólkið mitt fékk þá líka fréttir af mér bara beint í æð.

Nú þegar ég er öll orðin hressari er eins og ég geti ekki hætt.  Hef virkilega spáð í því fyrir alvöru en margir hafa hvatt mig til að hætta ekki og það er eins og maður verði háður því að blogga

[Sigurður Þór Guðjónsson, 6.6.2007 kl. 16:05]

Þetta er nú aldeilis merkilegt framlag við athugasemdirnar.

[Hrannar Baldursson, 6.6.2007 kl. 18:38]

Ég neyðist til að vera sammála þeim sem hlynntir eru frjálslegu bloggi, en ósammála þeim sem eru það ekki (hvar eru þeir?).

Athugasemd Rannveigar er ekkert annað en mögnuð. 

[gerður rósa gunnarsdóttir, 6.6.2007 kl. 19:56]

Ég segi pass ... eða spaða. (Sumu nennir maður bara ekki að svara.)

[Sigurður Þór Guðjónsson, 6.6.2007 kl. 20:08]

Þú ert nú samt alltaf stóra trompið á þessari athugasemdasíðu!