Á Ríkisútvarpið að útvarpa guðþjónustum?

Á sunnudögum hefur Ríkisútvarpið útvarpað guðþjónustum frá upphafi. Gaman væri nú að vita hve margir hlusta á þessar messur. Alltaf eru messurnar kristnar og oftast frá Þjóðkirkjunni en þó kemur fyrir að fríkirkjusöfnuðir fá inni í útvarpinu og jafnvel sértrúarsöfnuðir, en ekki man ég eftir kaþólskri guðþjónustu á þessum venjulega messutíma kl. 11 á sunnudögum.

Er ekki  kominn tími til að Ríkisútvarpið taki mið af því fjölmenningarsamfélagi sem nú ríkir í landinu í trúarefnum og leyfi öðrum trúflokkum en lútherskum kristnum eða sértrúastöfnuðum að komast að með guðþjónustur sínar þó ekki væri nema stöku sinnum?

Hér er þó nokkur hópur múslima og búddista, að ekki sé minnst á kaþólska. Afhverju fá þessir trúarhópar ekki að messa yfir okkur í Ríkisútvarpinu? En svo má líka spyrja: Er ástæða til að Ríkisútvarpið sé yfirleitt að útvarpa trúarlegum samkomum?

Ætti Ríkisútvarpið kannski bara að láta það vera?

 

Athugasemdir

[Ásgeir Kristinn Lárusson, 23.9.2007 kl. 12:42]

Mín vegna mætti Rúv. (Útvarp Reykjavík - nú verða sagðar fréttir) leggja þessar messur af. Hins vegar man ég vel eftir messu, er útvarpað var frá Kaþólsku kirkjunni fyrir allmörgum árum og sá Karl heitinn Sighvatsson um orgelleik. Orgelleikur Karls var einstakur og í lok messunnar var leikur hans orðinn vel djassaður...

[Brynjar Jóhannsson, 23.9.2007 kl. 12:51]

Sigurður.. án þess að hafa nokkurn tölulegan grun um hve margir hlusta á slíkar messur þá veit ég til þess að gamalt fólk sem er inni á elliheimilum hlustar á slíkar messur. 

Afhverju eru þessar messur að angra þig ?... Er ekki til nóg af ÖÐRUVÍSI ÚTVARPSMESSUM en Kristilegum á sama tíma sem þú getur hlustað á ?  

[Sigurður Þór Guðjónsson, 23.9.2007 kl. 13:15]

Þessar messur Brynjar eru ekki að angra mig, öðru nær,ég hlusta oft á þær. En spurningarnar sem ég ber fram eru í fullu gildi. Þetta eru spurningar en ekki fullyrðingar. Hvað menn  athugi. 

[Promotor Fidei, 23.9.2007 kl. 13:23]

Þetta er mjög þörf ábending hjá þér Sigurður

Að ríkisrekið fyrirtæki, sem rukkar skyldugjöld jafnt af kristnum, heiðnum og trúlausum, skuli standa fyrir kristnu trúboði, er auðvitað fyrir neðan allar hellur.

Það ætti að leggja þessa trúarstarfsemi niður, eða þá alltént leyfa öðrum trúarhópum (og trúlausum) að komast að.

Brynjar, sem hefur áhyggjur af móralnum á elliheimiliunum: sentimentalismi um elliheimiliarómantík breytir ekki því að það misbýður gróflega trúlausum og ó

[Promotor Fidei, 23.9.2007 kl. 13:26]

(vúps: framhald) og ókristnum að vera skyldaðir til að borga brúsann fyrir trúboðið.

Nóg er af kristnum útvarpsstöðvum sem geta þá tekið útsendingarnar að sér, fyrst áhuginn er svona mikill. Eða að frjálsu útvarpsstöðvarnar geta sinnt þessu starfi, fyrst áheyrendahópurinn er svona stór. Það liggur við að ég segi að þjóðkirkjan get líka stofnað eigin útvarpsstöð til útsendingastarfsins, en það myndi reyndar enda á því að peningarnir yrðu hvort eð er teknir úr vösum óspurðra skattborgara, eins og allt annað sem þjóðkirkjan stendur fyrir

[Svava frá Strandbergi , 23.9.2007 kl. 13:41]

Ég tek undir það sem Promotor Fidei skrifar.

[Fríða Eyland, 23.9.2007 kl. 14:18]

Ég líka

[Þorkell Sigurjónsson, 23.9.2007 kl. 14:33]

Hvað myndu  knattspyrnuáhugamenn segja ef t.d. ÍBV baráttusöngurinn hljómað vikulega. Ég held ekkert, ég veit að menn yrðu ekki sáttir við það. Hitt er svo annað mál, að það plagar mig ekkert þessar útvarpsmessur, slekk einfaldlega á útvarpinu..En stundum hlusta ég eftir orgelleiknum er hrifinn af honum. Þannig er að ég hefi ávallt ímyndað mér að ég hafi verið orgelleikari í einhverju fyrra lífi mínu og það hafi verið í Austurríki. Hefi reynt mig við orgel, en útkoman hefur verið léleg. Annars er það með trúna, að sönn trú kemur að innan en ekkert sem maður er mataður af fjölmiðlum.

[Sigurður Viktor Úlfarsson, 23.9.2007 kl. 16:50]

Messur á sunnudögum er einfaldlega hluti af íslenskum raunveruleika, hafa verið það í árhundruð og eru enn.  Því er eðlilegt að þær eigi sér sess í Ríkisútvarpinu.

Um 90% Íslendinga eru kristnir því eðlilegt að kristnar messur hafi meira vægi en islam eða búddistamessur.  Hins vegar finnst mér alveg sjálfsagt að Ríkisútvarpið útvarpi öðru hverju messum annarra. 

Vegna þess að fótboltinn var notaður sem dæmi hér að ofan horfi ég t.d. aldrei á fótbolta og finnst hann afleitt sjónvarpsefni, hvað þá heldur útvarpsefni.  Ég er að greiða fyrir heilu fréttadeildirnar á fréttastofunum með afnotagjaldinu mínu til að halda utan um leiki fullorðins fólks.  Á að leggja íþróttir algerlega af í Ríkisútvarpinu vegna þess að ég horfi ekki á þær og gæti ekki verið meira sama en hvort Chelsea eða Man. United vinnur þennan leik eða hinn?

Fyrir marga skiptir messan miklu máli.  Fyrir marga skiptir boltinn miklu máli.  Fyrir marga skipta annars konar messur miklu máli.  Ríkisútvarpið á að vera þverskurður af mannlífinu í landinu.  Trú er einfaldlega hluti af því og mikilvægt að mismunandi hópar taki tillit hver til annars, hvort sem þar er um að ræða trú, íþróttir eða annað.

[Matthías Ásgeirsson, 23.9.2007 kl. 17:09]

"Messur á sunnudögum er einfaldlega hluti af íslenskum raunveruleika, hafa verið það í árhundruð og eru enn.  Því er eðlilegt að þær eigi sér sess í Ríkisútvarpinu."

Þetta er afskaplega algeng en vitlaus röksemdarfærsla.  Prófum að snúa henni upp á eitthvað annað:

"Nauðganir eru einfaldlega hluti af íslenskum raunveruleika, hafa verið það í árhundruð og eru enn.  Því er eðlilegt að þær eigi sér sess í Ríkisútvarpinu. "

Nah, röksemdarfærslan er galin.  Hefð getur aldrei verið fullnægjandi réttlæting fyrir misjöfnun.  Hefð hefur verið notuð til að mismuna konum, kynþáttum og trúarhópum í gegnum söguna. (Hefðarrökvillan)

"Um 90% Íslendinga eru kristnir"

Þetta er kolrangt.  Um 90% þjóðarinnar er skráð í kristin trúfélög (þar af 82% í Þjóðkirkjuna, talan fer lækkandi).  Aftur á móti sýna kannanir að einungis rétt rúmlega 50% þjóðarinnar skilgreina sig kristin.  Bendi á greinina Meirihlutagoðsögnin.

[Sigurður Þór Guðjónsson, 23.9.2007 kl. 17:31]

Matthías: Þú ert alltaf jafn helvíti töff og trúlaus og oftast góður. Þessi ábending um 90%-inn er ágæt. Mér dettur í hug grein sem Páll Skúlaon heimspekingur þar sem hann færði rök fyrir því að Íslendingar væru varla kristin þjóð í reynd og mig minnir að Sigurður Nordal hafi einhvern tíma skrifað í svipuðum dúr.  Ég man nú svo langgt þegar jarðarförum var útvarpað virka daga kl. 11. Hverjum dykki slík vitleysa í hug núna? En þetta var reyndar kannski vinsælasta útvarpsefnið á þeim árum. Ég vil samt ekki jafna saman nauðgunum og útvarpsmessum enda ertu kannski ekki beinlínis að því heldur benda á rökvillu, en beinir eigi að síður athyglinni að nauðgun og messum saman. Nauðgun er talin glæpur af öllum  en messur kannski bara af sumum en fleirum finnst eingöngu kristnar útvarpsmessur vera  mismunun . Ekki er þetta hitamál fyrir mér en sjálfsagt finnst mér að veita öðrum trúarhópum aðgang að ríkissúvarpinu. Það væri fróðlegt að heyra t.d. hvernig múslimsk guðþjónusta fer fram. En best væri nú að ríkissútvarp væri ekki með neinar messur. Ég efast annars um að gamla fólkið hafi mikið meiri áhuga á messum en það unga. Það er nú ekki meira mál að afnema útvarpsmessur en "veðrið kl. 18" sem hætt var með fyrir nokkrum árum.  

[H.Hafsteinsson (IP-tala skráð) 23.9.2007 kl. 19:53]

Ég hlusta stunum á sunnudagsmessuna, varðandi kaþólska..þá eru þeirra messur kl 8 að morguni ef ég man rétt..svo aftur kl 18..kannski ekki heppilegur tími að útvarpa þá.....varðandi aðra trúarhópa á Íslandi.  Á ekki líka að skipta um fána, taka í burtu krossmerkið svo skulum við lika henda okkar þjóðsöng sem er lofsöngur til guðs. Akkurru má þessi þjóð ekki vera eins og hún hefur verið..af hverjum þurfum við að kasta fyrir róða okkar fortíð og rótum þó svo að örfáir séu með aðra trú eða skoðanir.  Eigum við ekki bara aðfara keyra á vinstri akgrein þar sem það eru nokkrir Bretar búsettir hérna.

[Marta B Helgadóttir, 24.9.2007 kl. 00:54]

Ég hlusta stöku sinnum á sunnudagsmessuna í Ríkisútvarpinu og finnst það bara notalegt, kannski af því maður ólst upp við að foreldrarnir höfðu útvarpið opið og að það var nokkur virðing borin fyrir messunni.

Vil alls ekki láta hætta þessum útsendingum.

[Sigurður Þór Guðjónsson, 24.9.2007 kl. 01:21]

H. Hafsteinsson: Ég vil alveg endilega að allir verði ekki aðeins skikkaðir til að aka á vinstri akrein heldur líka aftur á bak. Ég er að verða eotthvað svo vinstri afturhaldssamur með árunum.

[Matthías Ásgeirsson, 24.9.2007 kl. 13:48]

Ætlunin var alls ekki að líkja saman messu og nauðgun heldur einungis að nota sláandi dæmi til að sýna fram á hve vond rökfærslan var.  Ég gekk helst til of langt með þessu dæmi :)

"af hverjum þurfum við að kasta fyrir róða okkar fortíð og rótum  "

Það er einfaldlega hluti af því að læra og þroskast.  Við erum sífellt að kasta fyrir róða fortíð okkar.  Veltið því fyrir ykkur hvernig aðstaða vinnufólks var hér á landi fyrir rétt rúmum hundrað árum.  

Fortíð landsins er satt að segja ósköp hörmuleg við nánari skoðun.

Ég tel alls ekkert stórmál þó messum sé útvarpað - þætti vænt um það ef trúleysingjar fengju eins og tíund af því rými sem trúmenn fá í fjölmiðlum - en það er í raun önnur umræða. 

[Jóhanna Magnúsar- og Völudóttir , 24.9.2007 kl. 16:02]

Mér finnst messurnar notalegar. Eitt af því fáa sem eftir er af sunnudögunum eins og ég man þá í gamla daga. Spariklæðnaður, sunnudagslærið, sósan, brúnuðu kartöflurnar  og ávaxtagrauturinn horfið úr hádegi sunnudagsins. Leyfum messunum að hljóma. Held það sé alveg nægilega stór prósenta þjóðarinnar sem hlustar á þær til að þær séu réttlætanlegar.

[Svava frá Strandbergi , 24.9.2007 kl. 18:55]

Ég hlusta eiginlega aldrei á ríkisútvarpið og ég er að velta því fyrir mér hvort dánarfregnum og jarðarförum sé enn útvarpað á fólk sem er að borða kvöldmatinn sinn??