Rauð jól eða hvít

Um daginn sagði Einar Sveinbjörnsson að helmingslíkur væru á hvítum jólum en tók spurninguna hæfilega alvarlega svo löngu fyrir jólin. Í Fréttablaðinu var Siggi stormur að spá rauðum jólum og stökk ekki bros. 

En Siggi sanasól, hverju spáir hann um jólin?

Hann spáir hvítum jólum. Á aðfangadagskvöld verður blindöskubylur og vestanfárviðri eins og var árið 1957. Verður þá engum manni fært út úr húsi. Á jóladag verður kolófært um allan bæ, bæði mönnum og bílum, og rafmagnslaust alls staðar.

Já, er það ekki þetta sem fólk vill? Hvít jól.

Það er sem sagt ekki gefið ef snjóar að það verði bara í "fallegum" jólakortastíl.

Mér finnst annars stór undarleg þessi árátta manna fyrir hver jól að spyrja eins og rellnir krakkar: Verða jólin hvít eða rauð? Og þá er allaf undirliggjandi frekja um það að jólin verði drifhvít.  

Afhverju vilja menn það endilega? Á það að vera hátíðlegra? Jólalegra? Eftir hvaða staðli? Jólakortakitschstaðli eða Hollywood white christmasvaðli?

Menn eru að tala um að gróðurhúsaáhrifin valdi nú alltaf rauðum jólum. En það er samt ekki lengra en í fyrra að jörð var alhvít í Reykjavík á jóladagsmorgun - reyndar öllum að óvörum. Það var auð jörð á aðfangadagskvöld og snjórinn var aftur horfinn á jóladag og autt var líka á öðrum í jólum.

Síðustu almennilegu hvítu jól í Reykjavík voru árið 2003. Það er sem sagt ekki ár og öld síðan.

Jólin 2000 og 2001 voru eldrauð. Árið 1999 var gamall klaki og skaflar en 1998 voru hvít jól. Þar á undan voru rauð jól í tvö ár en öll jólin frá 1990-1995 voru mjallahvít.  Það var víst gullöld jólanna í hugum margra. Allt glimmerhvítt og steindautt eins og á lágkúrulegasta jólakorti!

Talandi um gróurhúsaáhrifin. Ekki er alveg ljóst hvaða jól voru hvít og hver rauð á fjórða og fimmta áratugnum en örgugglega voru þá a.m.k. tólf jól eldrauð. Þá var árgæska í landi og engum datt í hug að óska eftir hvítum jólum. Enda White Crhistmas ekki enn orðið alheims húsgangur.

Nú, en gott fólk og vont fólk , takið gleði ykkar óstjórnlega. Hann Siggi sanasól spáir aftaka stórhríð og manndrápsveðri á aðfangadag og svo miklu fannfergi á jóladag að elstu menn og vel það muna ekki annað eins. Þá verða allir að hanga heima yfir sínu hangikjeti og það verður bara gott á þá.

Hvít jól ofar öllu. 

 

 

Athugasemdir

[Auður H Ingólfsdóttir (IP-tala skráð) 11.12.2007 kl. 19:10]

En á Akureyri, verður líka brjálað veður þar...

Mér er svo sem slétt sama hvort jólin verða rauð eða hvít, svo framarlega sem verður flugfært dagana fyrir jól og ég komist á leiðarenda...

Annars fékk ég svona flass back þegar ég las færsluna og upp rifjuðust ljúfar bernskuminningar tengdar sanasól......hvað varð eiginlega um þennan ágæta sykurlöðrandi vítamíndrykk, er hann til ennþá?

[Ásta Björk Solis, 11.12.2007 kl. 19:19]

Her thar sem eg by hefur aldrey snjoad a jolunum,svo eg hef ekki sed jolasnjo sidan eg bjo i Alaska og Ohio fyrir 15-18,arum sem er nu i lagi min vegna.Thad er bara gaman thegar snjoar her sem er ekki oft en yngri krakkarnir serstaklega sonurinn hefur gaman af thvi.

[Sigurður Þór Guðjónsson, 11.12.2007 kl. 19:41]

Ég hef líka mikinn áhuga á þessari sanasól sem Tóta pönk hefur klínt á mig sem viðurnefni, áreiðanlega vegna þess að ég er jafn dísætur og sanasólin var!

[Lára Hanna Einarsdóttir, 11.12.2007 kl. 20:11]

Ef spá Sigga sanasól gengur eftir veit ég um mann sem verður alsæll. Fyrir löngu lýsti hann því yfir að hann upplifði enga jólastemmningu betri en þá, að þurfa að klofa snjóskafla, hálkuspóla og berjast gegn stórhríðinni þegar hann færi um að dreifa jólagjöfunum á aðfangadag.

En hann er kannski löngu búinn að skipta um skoðun.

[Sigurður Þór Guðjónsson, 11.12.2007 kl. 20:14]

Hvaða helvítis hálfviti getur þetta hafa verið?

[Lára Hanna Einarsdóttir, 11.12.2007 kl. 20:23]

Segi það ekki, en það varst ekki þú. 

[Emil Hannes Valgeirsson, 11.12.2007 kl. 22:45]

Köld jól og hvít kæmu mér ekki á óvart. Fannfergi og stórhríð er annars ágætis jólaveður, allavega skárra en rigning ofaná klaka.

[Brjánn Guðjónsson, 12.12.2007 kl. 00:19]

Jólin í stofunni minni verða jafn rauð og alltaf. Vonandi að þau verði eins úti fyrir.

Snjórinn er uppfinning andskotans, tel ég.

[Sigurður Þór Guðjónsson, 12.12.2007 kl. 00:22]

Ja, hvur skollinn!

[Svava frá Strandbergi , 12.12.2007 kl. 00:46]

Helst af öllu vildi ég halda jól ein með köttunum mínum í kofa upp til fjalla fjarri mannabyggðum. Þar myndi ég óska þess að kæmi svo mikill bylur að ekki sæi út úr augunum og að ég snjóaði þar bókstaflega inni á bólakaf. Enginn maður myndi geta komist til mín nema á sérútbúnum snjóbílum. Ekkert sjónvarp mætti vera þar, en útvarp vildi ég hafa og arinn og svo auðvitað heitt kakó.

[Sigurður Þór Guðjónsson, 12.12.2007 kl. 00:53]

Æ, mig langar allt í einu svo í heitt kakó!

[Sigurður Þór Guðjónsson, 12.12.2007 kl. 15:11]

Ég hef alltaf kunnað þetta og komiði bara hve nær sem er!