Jóla-og áramótaveðrið aftur í tímann

Yfirleitt er veðrið skaplegt um jólin. Þau eru ýmist mild eða frostasöm en næstum því aldrei er sama veðurlag alla þrjá jóladagana. Lítið er um fræg jólaóveður. Samt var mikið vestanveður á aðfangadagskvöld 1957 og varð þá minnisstæður stórbruni í Þingholtunum. Víða var stormur á aðfangadag 1974. Að morgni aðfangadags 1989 var sums staðar fárviðri. Snjókoma setti mjög svip sinn á aðfangadag árið 1960 og 1971 og lokuðust þá vegir. Einnig snjóaði árin  1977 og 1983. Árið 1988 var stormur og snjókoma um allt land á jóladag.

Einstaklega köld jól voru árin 1995, 1968 og 1965 og fyrir norðan líka árin 1980, 1988 og 1989. Sérlega hlýtt var á jólunum  í fyrra, 1948, 1940, 1934 og 1933 sem voru allra hlýjustu jólin.  

Á vef Veðurstofunnar má sjá veðrið alla jóladaga frá 1949 og snjóhulu í Reykjavík. Reyndar er hægur vandi að fletta upp á hvaða hátíðisdegi sem er frá 1949 á vef Veðurstofunnar.  Og það ættu menn endilega að gera fremur en liggja í þessum jólabókum!

Hægt er að sjá hér snjólag um jólin í Reykjavík árin 1871-1920. 

Úrkomusömustu jól í Reykjavík voru 2005 en 1960 á Akureyri.

Kaldasti gamlársdagur í Reykjavík og á Akureyri var 1976 en 1971 sá hlýjasti í Reykjavík en fyrir norðan var  1968 sá hlýjasti. Hlýjasti nýjársdagurinn í Reykjavík var 2003 en 1973 fyrir norðan. Kaldstur nýjársdaga í Reykjavík var 1948 en á Akureyri 1977. Á töflunum á fylgiskjali er annars hægt að sjá hvaða hátíðisdgar voru hlýjastir og kaldastir bæði í Reykjavík og á Akureyri. 

Þar er hægt að sjá hita, sól og úrkomu yfir alla jóladagana (reyndar líka Þorláksmessu), gamlársdag og nýjársdag í Reykjavík frá 1880 og frá Akureyri frá 1949 en fyrir þann tíma hef ég ekki aðgang að daglegum gögnum um þann stað. Hins vegar eru hér upplýsingar um hita og úrkomu á Hallormsstað frá 1937 til 1948. Veður er ekki alltaf það sama á þessum stöðum en oft er það svipað og Hallormsstaðatölurnar ættu  að gefa bendingu um ástandið á norðausturlandi og jafnvel norðurlandi á jólunum þetta tímabil.

Á blaði 3 í fylgiskjlainu er hægt að sjá út af fyrir sig meðalhita allra jóladaganna saman og áramótana og samanlagða úrkomu.

Úrkoman er hér auðvitað í mm og sólarstundir í klukkustundum. Menn skulu athuga vel að úrkomutölur við hvern dag er úrkoma sem mældist frá kl. 9 þann dag til kl. 9 daginn eftir. Þegar úrkomudálkur er auður hefur ekki komið dropi úr lofti en núllið stendur fyrir vott af úrkomu sem ekki var þó mælanleg. Þá skal nefnt að sól á Akureyri mælist aldrei um jólin  vegna þess að fjöllin byrgja hana.

Nýjársdagurin er auðvitað alltaf  á næsta ári miðað við þá ársetningu sem er við hver jólin í töflunum.  

Dagar með hæstu og lægstu gildi eru auðkenndir og ætti því að vera auðvelt að finna þá í töflunum. 

Meðalhitinn er þarna raunverulegur meðalhiti fyrir Akureyri og Hallormsstað en í Reykjavík til ársins 1935. Frá 1888 til 1907 er hins vegar meðaltal hámarks-og lágmarkshita viðkomandi dags en árin 1908 til 1919 er um að ræða meðaltal mesta og minnsta álesturs á hitamæli frá því snemma morguns þar til seint á kvöldi, ekki raunverulegs lágmarks-og hámarkshita. 

Á blaði tvö á fyrra fylgiskjali má svo sjá mesta og minnsta  hita á landinu öllu hvern hátíðardag frá 1949 og hvar sá hiti mældist.  

Það sem hér er framborið er tekið eftir Íslenskri veðurfarsbók 1920-1923, Veðráttunni 1947-2002, Veðurfarsyfirliti frá 2003 og áfram og loks ýmsum öðrum gögnum frá Veðurstofunni.  

Ég óska öllum þeim sem nenna að lesa bloggsíðuna mína gleðilegra jóla.  

 

Skrár tengdar þessari bloggfærslu:

• c_documents_and_settings_fri_geir_my_documents_jolavedur_1_0.xls
• c_documents_and_settings_fri_geir_my_documents_jolmt_0.xls

Athugasemdir

[Einar Sveinbjörnsson, 23.12.2007 kl. 23:46]

Þakka enn eina veðurtöfluna frá þér Sigurður Þór.  Eljusemi þín er ótrúleg og til eftirbreytni.  Bestu  jólakveðjur til þín yfir hátíðina.

Einar Sveinbjörnsson 

[Þorkell Sigurjónsson, 24.12.2007 kl. 12:56]

Gleðileg jól.

[Svavar Alfreð Jónsson, 24.12.2007 kl. 16:45]

Gleðileg jól og bestu þakkir góða pistla og prýðilega bloggvináttu.

[Emil Hannes Valgeirsson, 25.12.2007 kl. 16:24]

Sæll, mér var hugsað til jólaveðurspár þinnar í skemmtigöngu sem ég tók mér í hríðinni áðan. Þótt það hafi kannski verið dálitlar ýkjur að tala um vestanfárviðri, blindöskubyl og að engum manni yrði fært út úr húsi þá er veðrið vissulega allt í þá áttina. Sjálfum mér koma köld og hvít jól ekki á óvart, eins og ég sagði í athugasemd á sínum tíma en ég óska þér gleðilegra jóla, þótt að óska jólaveðrið þitt sé ekki akkúrat núna.