Kælandi áhrif sjávarins

Í dag var loftið í háloftunum yfir landinu hlýrra en það hefur verið áður í sumar. Því miður ná þessi hlýindi sér óvíða á strik vegna þoku og skýja sem koma frá hafinu. Á svæðinu kringum Þingvelli, Borgarfjörð og sunnanverðu Snæfellsnesi, ásamt hálendinu milli Hofsjökuls og Vatnajökuls hafa hlýindin skilað sér. Á Þingvöllum og Hvanneyri fór hitinn í 24 stig, 22 í Stafholtsey í Borgarfirði, 21 á Mýrunum og í Húsafelli og 20 á Bláfeldi á suður Snæfellsnesi. Og 22 stig voru svo í Veiðivatnahrauni og 20 á Setri fyrir sunnan Hofsjökul.  

Í Reykjavík komst hitinn í 15 stig sem er auðvitað ekkert til að hrópa húrra fyrir. Hins vegar var sami hiti á Skálafelli í yfir 700 metra hæð og í Bláfjöllum komst hitinn í 18 stig og 19 á Hellisheiði. Sýnir þetta vel kælandi áhrif sjávarins.

Þetta hægviðri er reyndar alveg vonlaust fyrir höfuðborgarbúa. Ekki er von um neitt skárra nema hreyfi vind af hagstæðri átt.

 

Athugasemdir

[Sigurður Þór Guðjónsson, 7.7.2008 kl. 21:54]

Mér er spurn og þó fyrr hefði verið: Afhverju gerir aldrei neinn efnislegar athugasemdir við veðurfærslur mínar þó menn kommenti eins algjörir besservisserar á allar aðrar færslur á þessari bloggsíðu?

[Lára Hanna Einarsdóttir, 7.7.2008 kl. 21:57]

Það gera sér allir grein fyrir að þú veist betur um veðrið - ég að minnsta kosti - og Emil er í Barcelóna.

Ég var útivið í dag þegar þokunni létti loksins og mikið lifandis skelfing var það gott... ylurinn var yndislegur. Mér finnst 15 stig í sól í Reykjavík bara mjög fínt, ekkert hægt að kvarta yfir því.

Býst við að þú sért búinn að sjá þokufærslu Einars Sv. Hún var athyglisverð.

[Sigurður Þór Guðjónsson, 7.7.2008 kl. 22:12]

Hugur minn er nú mjög í þoku. En gaman var að sjá fyrsta besservisserann birtast!

[Þorsteinn Briem, 7.7.2008 kl. 23:02]

Sólskin, logn, fimmtán stiga hiti og minnkandi mengun vegna hækkandi bensínverðs.

Gæti ekki betra verið.

[Lára Hanna Einarsdóttir, 7.7.2008 kl. 23:04]

Ertu búinn að breyta mér úr hysterískum aðdáanda í besservisser? Varla get ég verið hvort tveggja, það fer svo illa saman!

[Jóna Kolbrún Garðarsdóttir, 8.7.2008 kl. 03:00]

Mér finnst nú bara gott að búa út við sjóinn, það verður frekar sjaldan of heitt fyrir mig hérna.    En það hefur samt komið fyrir, ég fjárfesti í borðviftu sem bjargar mér á heitustu dögunum.

[halkatla, 10.7.2008 kl. 01:48]

hreppurinn minn kemst ekki einu sinni á blað!