Kjarni málsins um boðið á ólympíuleikana

Í Kastljósi í gær og í þættinum Í vikulokin í útvarpinu áðan var rætt um það hvort rétt sé af forsetanum og menntamálaráðherra að mæta á ólympíuleikana. Í báðum þáttunum var talað um það að þó mannréttindi væru brotin í Kína sé réttlætanlegt að hafa við það samskipti eins og við mörg önnur ríki sem brjóta mannréttindi og menn verði að vera samkvæmir sjálfum sér.

Mat manna á þessu atriði fer sem sagt eftir pólitískum skilningi á því hvers konar samskiptum beri að halda uppi við Kína en ekki sérstökum atriðum sem varða bara ólympíuleikanna. 

Lítum á! Þú færð boðskort í mikla veislu. En í boðskortinu er beinlínis tekið fram að ákveðnir gestir séu útilokaðir frá boðinu og það fer ekki framhjá þér að um er að ræða bæði fordómafulla stimplun og mismunun. Myndi ekki renna á þig tvær grímur að þiggja boðið?

Í boðsbréfum Kínverja vegna ólympíuleikana er þetta einmitt svona. Þar er sérstaklega tekið fram að sumt fólk, t.d. geðfatlaðir, fólk með eyðni og fátækt fólk sé ekki velkomið í veisluna. Enginn nefnir þetta með geðsjúka í umræðum hér á landi og ég hef á tilfinningunni að fólk sem vill láta taka sig alvarlega, eins og það sem var í Kastljósi og Í vikulokin, hreinlega skammist sín fyrir að gera það. Það er ekki nógu fínt.  

Þessi atriði með mismunum í boðbréfum Kínverja út af fyrir sig, hvað sem líður almennum mannréttindabrotum og efnahagslegum og stjórnmálalegum samskiptum Íslendinga við Kínverja, ætti að vera alveg nægjanlegt til að forystumenn þjóðarinnar ættu að hafna boðinu um að vera viðstaddir ólympíuleikana.

Menn fara ekki í boð þar sem bein mismunun og fordómar gegn fólki eru sérstaklega teknir fram í boðsbréfinu. Mat manna á því hvort eigi að þiggja boð á ólympíuleikana ætti að hníga að því hvort rétt sé að þiggja þetta tiltekna boð, vegna þess hvernig að því er staðið, en ekki um annars konar almenn samskipti við Kína.

Hvers vegna sér enginn þetta svona einfalt nema ég? Allir eru að tala um þetta á almennum nótum stjórnmála-og viðskiptasambanda og vísa til annarra ólympíuleika sem ollu pólitískum deilum, t.d. leikana í Moskvu þar sem engum hópum manna var þó vísað frá.

Ég næ þessu bara ekki.

Annars er þetta ekki í fyrsta skipti sem mér finnst að kjarni einhvers máls sé annar en allir aðrir eru að tala um.

Og hvernig ætli standi nú á þv?       

Undir lokin fóru menn Í vikulokunum að tala um veðrið. Stjórnandinn sagði eitthvað á þá leið að þetta væri einkennilegt veður í gær og í dag, hvasst og bjart en samt hlýtt. En það er ekkert sérlega hlýtt í dag í Reykjavík og eiginlega vafasamt hvort hægt sé að tala um sama veður þar og í gær en þá var ekkert hvasst fyrr en fór að líða vel a daginn.  En þetta er afar algengt í umræðum manna eftir að virkilega hlýr dagur kemur í Reykjavík. Menn halda áfram að tala eins og einhver sérstakur hiti sé í loftinu þó hann sé liðinn hjá. Svo spurði stjórnandinn hvort einhver myndi eftir svona veðri  áður. Rámaði þá einn viðmælandinn í hitabylgjuna í ágúst 2004 sem var miklu magnaðari en þessi, en hins vegar alltof hægviðrasöm og ekki hvöss. Ef vindur hefði þá erið snarpari af landi hefði orðið enn hlýrra en raunin varð á hér í bænum.   

Athugasemdir

[Júlíus Valsson, 26.7.2008 kl. 16:20]

E.t.v. hafa þeir lesið "Lestrarbók fyrir heldri manna börn" í æsku?

[Sæmundur Bjarnason, 26.7.2008 kl. 16:26]

Það má margt segja um þessi mál. Vel er hægt að drekkja þessu öllu í fjasi. Mér finnst þó að hugsanlega megi nálgast kjarna málsins með tveimur spurningum: Af hverju Ólympíuleikarnir? Af hverju Ísland?

[Eva Hauksdóttir (IP-tala skráð) 26.7.2008 kl. 17:10]

Takk fyrir góða færslu og þarfar ábendingar. Það er til skammar að við skulum leggja nafn Íslands við þetta svínarí.

[Sigurður Þór Guðjónsson, 26.7.2008 kl. 19:47]

Ég hefði alla vega gaman af að sjá þig Halla eftir meira en 35 ár!

[halkatla, 27.7.2008 kl. 12:45]

mikið er ég sammála

[Sigurður Þór Guðjónsson, 27.7.2008 kl. 12:56]

Er hysteríksur aðdáandi minni, frátekinn í fyrsta sæti, mér nokkurn tíma ósammála? Mali biður að heilsa Kassöndru pöddukisu og Karitas breiðskottu.

[halkatla, 27.7.2008 kl. 14:01]

Ég: næstum alltaf sammála

Karítas og Kassandra: ALDREI ósammála