Ja, hvur skollinn!

Hér koma niðurstöður hinnar vísindalegu skoðanakönnunar sem verið hefur á þessari gagnmerku bloggsíðu langa lengi. Spurt var formálalaust: Verður norðurpóllinn íslaus í haust? Svarendur voru gríðarlega margir og sögðu 18,4% hiklaust já en 42,7% blákalt nei.

Þá er það komið á hreint.

En könnunin var líka kænlega dulbúin skoðanakönnun um trúarviðhorf þjóðarinnar. Einn svarmöguleikinn var nefnilega: Það veit skollinn, og 22,3% prósent hinnar íslensku þjóðar treystu honum einmitt til að vita það. Og svo var spurt all lymskulega: Það veit guð, og einungis 16,5% þjóðarinnar treystu þeim herra til að vita það.

Niðurstaðan er þá sú að 5,8% fleiri af hinni hingað til sögðu kristnu þjóð treysta skollanum betur en guði til að sjá fram í tímann og um hinstu rök. 

Þetta eru merk tíðindi og kaflaskil í trúarsögu þjóðarinnar. Það hlýtur nú að fara allmjög um ofurkrissana og bókstafstrúarmennina og alla hina líka.

Það held ég nú.

    

Athugasemdir

[Lára Hanna Einarsdóttir, 28.7.2008 kl. 17:32]

Það held ég líka...! 

[Jenný Anna Baldursdóttir, 29.7.2008 kl. 10:20]

Sigurður, mikið djöfulli ertu djúpur.......................

[Malína (IP-tala skráð) 29.7.2008 kl. 12:33]

Ertu ekki að koma þér í skollans vandræði með þessum pistli?  Ég hlakka til að sjá viðbrögðin!

[Jón Bragi (IP-tala skráð) 29.7.2008 kl. 12:41]

En, hafið þið tekið með í reikninginn að á miklu kirkjuþingi fyrir meira en hundrað árum var helvíti formlega lagt niður sem stofnun og öllum þar sagt upp?

En kannske skollinn hafið þá farið útí það að vinna freelans sem consult/ráðgjafi.

Í gvuðs friði!

[Brjánn Guðjónsson, 29.7.2008 kl. 13:52]

var ekki Mikki refur kallaður skolli í einhverri vísu Lilla slifurmúsar? hélt skolli væri orð yfir ref.

annars er rétt að kompaníin í efra og neðra hafa verið sameinuð í Andríki Group. samlegðaráhrifin talsverð og mannauðsstjórnun mun einfaldari á eftir.

[Lára Hanna Einarsdóttir, 29.7.2008 kl. 14:14]

Þegar þú talar um mannauðsstjórnun, Brjánn...  er þá sálnastjórnun innifalin?

[Emil Hannes Valgeirsson, 29.7.2008 kl. 16:43]

Ég, guð og jafnvel skollin sjálfur vitum margt en vorum ekki alveg vissir með hafísinn þegar þú settir þetta fram, en nú erum við á því að norðurpóllin verði ekki íslaus í haust.

[halkatla, 30.7.2008 kl. 02:30]

þessar niðurstöður eru miklu alvarlegra en fólk heldur, og ekkert grín vonandi funda ofurkrissar um málið hið snarasta! en ég held að ef fólk notaði rökhugsunina við að svara þá sé ljóst að skrattinn sem ræður eldinum niðrí helvíti sé sá eini sem getur hitað þennann hafís (því global warming er ekki að því einsömul)

hitabylgjurnar eru farnar að ógna sjálfum Drottinssiðnum í landinu með þessu áframhaldi...

[Sigurður Þór Guðjónsson, 30.7.2008 kl. 03:21]

Anna Karen: Ertu þú nú ekki ein hrikalegasta ofurkrissínan? 

[halkatla, 30.7.2008 kl. 12:08]

Skrattinn liggur samt í leyni og freistar mín við hvert fótmál það er mjög hrikalegt!