Ó, er ekki tilveran dásamleg!

Hitabylgjan gerir það ekki endasleppt. Í dag varð mesti hiti í Reykjavík 23,5 stig og var í þeirri tölu einmitt við athugun kl. 18. Það er ekki útilokað að hámarkið eigi enn eftir að stíga og sést það við hámarksathugun í fyrra málið. Hvergi á landinu varð hlýrra á mannaðri veðurstöð.

Á sjálfvirkri stöð varð hlýjast 24,3 stig á Þyrli í Hvalfirði, 24,2 á Korpu og 24,1 í Geldinganesi, á  Reykjavíkurflugvelli og á Möðruvöllum í Hörgárdal. Já og meira að segja stöðvarómyndin í Straumsvík sem svamlar oftast nær í úrsvalri hafgolu rauk upp í 23,8 stig! Henni er þá ekki alls varnað greyskarninu!

Nú er svo komið að fjórum sinnum á átta dögum hefur hitinn í Reykjavík farið í 22,5 stig eða meira. Það á sér ekkert fordæmi. Og svo er að koma verslunarmannahelgi við þessar aðstæður. Ó, er ekki tilveran dásamleg! 

Þess má líka geta að síðustu þrjá dagana hefur hitinn komist í 20 stig í Grundarfirði en í öllum þessum hamagangi hefur hitinn ekki náð 20 stigum í Stykkishólmi fremur en fyrri daginn. Þar hafa verið veðurathuganir síðan 1846, lengur en nokkurs staðar annars staðar og er vart hægt að finna stað á öllu landinu sem er eins ónæmur fyrir hitabylgjum og einmitt Stykkishólmur. Það er því alveg ómögulegt að fá svo mikið sem grænan grun um hitabylgjur á landinu í gamla daga út frá athugunum á þeim hinum herlega stað.

Það breytist allt mannlíf á götum Reykjavíkur í svona miklum hitum. Stemningin verður engu lík og allt öðru vísi en á venjulegum góðviðrisdögum. Það verður útlenskt ástand og gjörsamlega tryllt. Allir eru líka hálfberir eða meira en það og það skapast upprífandi erótík í hlýja loftinu. (Meira að segja jafn gamlir, virðulegir og djúpvitrir menn og ég verða aftur ungir í anda og fara að sjá sætar stelpur á hverju götuhorni) En þetta var nú bara innan sviga og á ekki að fara hátt. Og þetta upplifum við aðeins á margra ára fresti og varla það. En þeir eru víst til sem velja heldur 12 stigin og rigninguna. Það er ólukkans Jan Mayen gengið!   

En ekki má svo gleyma því með mikilli samúð í hjarta að á Neskaupsstað voru einmitt 12 stig í dag. Og samt búa þar víst bæði bókhneigðar manneskjur og afar stolt kattardýr og una öll glöð við sitt!

Athugasemdir

[Malína (IP-tala skráð) 1.8.2008 kl. 20:46]

Meiri dellan í þessum veðurdellukörlum alltaf hreint!

[Sigurður Sveinsson, 2.8.2008 kl. 03:29]

Það er yfirleitt mitt fyrsta verk á morgnana að kíkja á vef Davis veðurstöðvarinnar hér á Selfossi. Hún er í einkaeigu og er afar fróðleg veðurdellufólki. Slóðin er verksud/vedur.is. Á þriðjudaginn fór hitinn í 28° og í gær í 24,3 Ölfusá er nú eins og kakó á litinn, laxveiðimönnum til mikillar hrellingar.

[Brjánn Guðjónsson, 2.8.2008 kl. 03:55]

þetta þykir víst ekki merkilegt á Ítalíu. jafnvel hátt í ölpunum.

[Sigurður Þór Guðjónsson, 2.8.2008 kl. 12:02]

Sigurður: Ég veit vel af þessari veðurstöð á Selfossi. En það eru til fleiri slíkar stöðvar. Brjánn. Við erum ekki á Ítalíu. Maður verður að miðs frávik í veðri frá þeim stað sem verið er að ræða um.   

[Sigurður Þór Guðjónsson, 2.8.2008 kl. 12:34]

Einhvern tíma rétt eftir kl. 18 í gær fór hitinn í Reykjavík upp í 23,6 stig. Það er næst mesti hiti sem þar hefur mælst í ágúst.   

[Sigurður Þór Guðjónsson, 2.8.2008 kl. 22:02]

Annars er tilveran verulega andstyggileg! Og bara fífl sem halda öðru fram.  Nú er ég að hlusta á Schumann sem varð brjálaður á endanum.