Drykkjuskapur á Alþingi

Myndband af Sigmundi Erni Rúnarssyni  í ræðustól á alþingi hefur vakið upp þær grunsemdir að hann hafi verið ölvaður.

Á Vísi is. er haft eftir vitnum að hann hafi hellt í sig víni í kvöldverðarboði MP banka fyrr þetta sama kvöld og hann hélt ræðuna. Sjálfur þvertekur hann fyrir að hafa drukkið áfengi.  Vísir segist hafa rætt við fjölmarga þingmenn sem voru í þingsalnum og enginn kannaðist við að Sigmundur hafi verið drukkinn. 

Kvöldfréttir Ríkisútvarpsins í gærkvöldi og Mbl. is í dag sögðu frá því að Ragnheiður Ríkharðsdóttir ætli að ræða framkomu Sigmundar á fundi forsætisnefndar á morgun.

Sigmundur Ernir hefur gefið sínar skýringar: ''Upp úr klukkan tíu og fram til hálftólf var kominn mikill galsi í þingsalinn og orðafar manna eftir því," segir hann.  Með þessum orðum sínum játar þingmaðurinn að umræðurnar hafi í það minnsta eitthvað verið öðruvísi en venjulega. Það er því ekki út í hött, ekki síst í ljósi myndbandsins, að mönnum detti í hug að  eitthvað hafi verið athugavert við þingmanninn.

Vitni segja að hann hafi neytt áfengis. Hann segist ekki hafa gert það. Annar hvor vitnisburðurinn er ósannur. Það er alvarlegt ef venjulegir borgarar bera ljúgvitni  gegn öðrum borgara . En það er enn þá alvarlegra ef þingmaður segir ósatt og reyndar einnig það að hann sé drukkinn í ræðustól á alþingi.

Það verður fróðlegt að sjá hvað kemur út úr fundi forsætisnefndar. 

Það er óþolandi ef þingmaður er undir áhrifum áfengis í umræðum á alþingi. Slíkt á ekki að koma fyrir. Um það eiga allir þingmenn að vera sammála og fordæma slíkt athæfi og ætti þar engu máli að skipta hver í hlut á.

Meðvirkni þjóðarinnar í áfengismálum er hins vegar mikil. Meðvirkni manna í stjórnmálaflokkum með hverjum öðrum er ekki minni. Skyldi Ragnheiður hafa tekið þetta mál upp ef Sjálfstæðismaður hefði átt í hlut? Nei, ætli það.

Eigi að síður er gott að hún hafi tekið upp málið og það á að veita henni stuðning í því. Menn eiga að gleyma stjórnmálunum um stund og einbeita sér að umgengnishætti þjóðarinnar við áfengi.

Það á að komast heiðarlega til botns í þessu máli. Það á ekki að láta það bara detta upp fyrir.

 

 

Athugasemdir

[Mr. Jón Scout Commander (IP-tala skráð) 26.8.2009 kl. 13:28]

Kannski fullmikið að segja að hann hafi verið drukkinn; hefur hann ekki frekar verið "kenndur". ?

(Án þessað ég þekki til aðstæðna).

[Sigurður Þór Guðjónsson, 26.8.2009 kl. 13:37]

Það er sama að vera ''kenndur'' og vera drukkinn.

[Mr. Jón Scout Commander (IP-tala skráð) 26.8.2009 kl. 15:29]

Verða menn drukknir af 3-4 léttvínsglösum?

Ég skilgreyni drukkinn mann þannig; að hann hafi enga stjórn á aðstæðum.

Það var nú varla svo í þessu tilviki.

(Án þess að ég ætli að fara að halda uppi vörnum fyrir manninn)

[DoctorE (IP-tala skráð) 26.8.2009 kl. 15:47]

Kannski var hann bara svona blóðlaus, þannig að léttvínir fór alveg með hann ... :)

[Emil Hannes Valgeirsson, 26.8.2009 kl. 17:13]

Það er aðeins virðulegra að vera kenndur heldur en drukkinn.

[Sigurbjörn Sveinsson, 26.8.2009 kl. 17:31]

Drukkinn eða kenndur. Gildir einu. Hann var ekki í eðlilegu ástandi og tilsvörin og viðbrögð önnur en til mátti ætlast. Þetta skiptir þó minna máli en það, að alþingismaðurinn laug að þjóðinni eins og bert er orðið. Hann reyndi að bjarga sér úr þessum pytti með ómerkilegri afneitun.

Það veit ekki á gott. Er málatilbúnaðurinn sama marki brenndur í því, sem meira máli skiptir? Sá spyr sem ekki veit. 

Ásgeir heitinn í Ásgarði, fyrrum þingforseti, sagði mér margar sögur af kennderíi þingmanna allt frá árinu 1949. Ég minnist þess ekki að hann hafi sagt þá hafa reynt að skrökva sig út úr vandræðunum.

[Sigurður Þór Guðjónsson, 26.8.2009 kl. 17:37]

Drykkjuskapur þingmanna á þingi hefur reyndar lengi verið vel þekktur. Ég bíð eftir viðbrögðum forsætisnefndar sem mér finnst miklu skipta. Mín afstaða er einföld:  Menn eiga ekki að kóa í svona málum eins og mér sýnist menn reyndar vera að gera út um allt netið. Það ætti að vera sú einfalda regla að þingmaður sem stígi undir áhrifum áfengis í ræðustól alþingis víki af þingi. Einföld regla er gilti fyrir alla. Annað er meðvirkni og áfengisdaður.

[Eygló, 26.8.2009 kl. 18:31]

Heyrði á samtal í heita pottinum:  "Þeir (Alþ.m.) mættu allir vera í'ðí, það gæti ekki versnað".

En svona án gríns, þá má þetta ekki líðast. Hann hefur viðurkennt að hafa drukkið áfengi.

[ElleE (IP-tala skráð) 26.8.2009 kl. 18:51]

Það hæfir ekki að mæta kenndur í opinbert embætti og vera þar með óhæfur í verkefnið.

[Vilhjálmur Örn Vilhjálmsson, 26.8.2009 kl. 20:02]

Sigmundur var haugafullur, vel kenndur og drukkinn eins og svín og nú lýgur hann eins og hann mígur. Hann ætlar að leysa vandann í landinu í einni allsherjar vímu.