Pirringur

Vefir Veðurstofunnar á netinu eru þeir bestu sem veðurstofur Norðurlanda bjóða upp á og þó miklu víðar væri leitað.

Þeir eru nú tveir í gangi, sá nýi og sá gamli.

Eigi að síður ætla ég að kvarta dálítið yfir þeim núna. 

Á gamla vefnum birtist kvölds og morgna yfirlit um nóttina og daginn. Á morgnana er hægt að sjá þarna sólskinsstundirnar sem mældust daginn áður í Reykjavík og kemur þetta hvergi annars staðar fram á vefum Veðurstofunnar. En undanfarið hefur verið óregla á þessum upplýsingum. Þær koma ekki. Síðustu upplýsingar núna eru t.d. frá því klukkan sex í gær. Engar upplýsingar er þá að hafa um sólina í Reykjavík auk þess sem hámarks-og lágmarkshiti í Reykjavík og á landinu um nóttina og svo aftur yfir daginn og mest úrkoma og vindur kom þarna alltaf fram.

Mesti og minnsti hiti koma fram hér á nýja vefnum fyrir sjálfvirkar stöðvar en aðeins fyrir þrjár stöðvar í einu. En ekki fyrir mönnuðu stöðvarnar. 

Þær koma hins vegar á gamla vefnum hér. Sá galli er þó á gjöf Njarðar að hitinn er frá kl. 18 til 18 sem þýðir það að stundum er mesti hiti sem gefinn er upp í rauninni frá því daginn áður. Annar listi er frá kl. 9 til 9 sem kemur á morgnanna. Hann er skárri að þessu leyti. Það var áður hægt að smella á sjálfvirku stöðvarnar sem fylgja þarna með hinum mönnuðu og leiddi það menn beint inn á upplýsingar frá viðkmomandi sjálfvirkir stöð. Þetta er ekki hægt lengur heldur kemur þetta sem þýðir  að menn verða að leggja í leit og vesen. Þetta er afturför.

Ég botna satt að segja ekkert í því að ekki sé búið að setja inn á nýja vefinn daglegt uppgjör fyrir allar stöðvar fyrir hita og úrkomu, að ógleymdu sólskini fyrir Reykjavík og Akureyri. Hitalistarnir fyrir mönnuðu stöðvarnar ættu alls ekki að vera frá klukkan 18 til 18 eða klukkan 9 til 9 heldur frá klukkan 9-18 og svo aftur frá klukkan 9 til 18. Listarnir fyrir sjálfvirku stöðvarnar mættu vera frá miðnætti til miðnættis eins og nú er á nýja vefnum en einungis fyrir þær þrjár stöðvar sem mæla mest og minnst. Þær ættu allar að vera inni með daglegan hámarks-og lágmarkshita og úrkomu sem það mæla. 

Á gamla vefnum voru skemmtileg kort sem birtust reglulega á þriggja tíma fresti allan sólarhringinn. En nú hefur óregla hlaupið í þetta.  Kortin birtast þannig að einhvern tíma eftir klukkan níu á morgnana koma kortin frá klukkan 3,6 og 9 en fremst er alltaf kortið frá hádegi daginn áður! Síðan kemur ekkert meira á síðuna fyrr en næstu nótt þegar hægt er að sjá kortin sem komu eftir hádegi og fram til miðnættis. En alltaf er eitthvað hádegiskort fremst. Upplýsingarnar sem á þessum kortum er hægt að sjá annars staðar. En þessi kort eru mjög skemmtileg og falleg og þau eiga að vera í lagi úr því verið er að birta þau á annað borð. 

Mér sýnist gamli vefurinn vera að drabbast niður án þess að hirt sé um að koma upplýsingum á honum inn á þann nýja. Pirrandi! 

Að lokum: Eitthvað er í ólagi með lágmarkshitann á mönnuðu stöðinni á Höfn í Hornafirði. Hún er nú hvað eftir annað með mesta kulda á landinu, með eins stigs frost í nótt. Það gengur engan veginn upp.

Afsakið pirringinn í mér í dag. En þetta er meðfæddur andskoti!

 

 

Athugasemdir

[Sigurbjörn Svavarsson, 4.9.2009 kl. 12:39]

Sæll Sigurður.

Þú ættir að skoða norska www.yr.no. sem er frábær vefur. Hægt er að fá spár fyrir einstaka staði hér á land. Kannski veistu af honum nú þegar.

[Sigurður Þór Guðjónsson, 4.9.2009 kl. 12:50]

Ég veit af þessum vef. Þegar ég segi að íslenska vefsíðan sé svona góð á ég fyrst og fremst um upplýsingar um veður á landinu sem eru meiri en flestar veðurstofur gefa upp til almennings. Ég hef reyndar engan sérstakan áhuga á spám um veður, meiri um raunverulegt veður. 

[DoctorE (IP-tala skráð) 4.9.2009 kl. 14:45]

Elsku kallinn minn.. ég ætla að kvarta undan þessari mynd af þér, ég væri löngu búinn að heimsækja þig nema að mér fannst alltaf að þetta væri Hannes Hólmsteinn... sorry :)

[Jón Steinar Ragnarsson, 4.9.2009 kl. 18:47]

Mér finnst hann bara landsföðurlegur DoctorE.  Þetta er eins og portrett af þjóðhöfðingja. Treystu því að Sigurður er ekki í neinum skilningi líkur Hannesi Hólmsteini. Mætti segja hann andhverfuna ef eitthvað er.

Fyrirgefðu svo Sigurður að ég hafi þig hér í þriðju persónu á eigins bloggi.

[Sigurður Þór Guðjónsson, 4.9.2009 kl. 18:54]

Ég er að hugsa um að leysa þennan myndaágreining með því að láta bara mynd af mínum sérlega sendiherra, monsjör Mala, á forsíðuna.

[Kama Sutra, 4.9.2009 kl. 19:04]

Mjá