Rysjóttur september

Jæja, það er best að halda sig þá bara við veðrið!

September er nú hálfnaður. Meðalhitinn er í Reykjavík 10,0 stig, tæp tvö stig yfir gildandi meðallagi.  Hitinn hefur farið upp í 10 stig eða meira hvern dag í Reykjavík en það er ekki alltaf svo þegar mánuðurinn er hálfnaður. Flesta daga hefur rignt en úrkomumagn er ekki mikið.

Það sem stendur upp úr finnst manni er það hvað mánuðurinn hefur verið hryssingslegur alveg eins og í fyrra. Sól er nánast aldrei svo heitið geti.

Eftir því sem lengra líður á mánuðinn dofna vonir manns að fá notalegan sólskinsdag með sæmilegum hita, það er að segja hita sem gæti verið á sumardegi. Þrátt fyrir tiltöluleg hlýindi finnst mér þessi mánuður vera antiklímax á sumrinu. Hann er reyndar ekki búinn en spáin næstu daga gefur ekki ástæðu til að vona að verulega góðir dagar komi nokkuð hér syðra. 

Þessi svokallaða hitabylgja var svo sem ágæt fyrir norðan en það fylgir þessu öllu saman mikill hryssingur og vesen, eitthvað svo langt langt frá mildum og góðum haustdögum.    

Engir dagar ársins finnst mér eins sérstakir sem tiltölulega hlýir og bjartir dagar  um jafndægur á hausti án þess þó að um einhvern methita sé að ræða en slíkum hitum fylgir yfirleitt ekki sól á þeim árstima á suðurlandi.

Ég á við daga eins og þennan sem hér sést.

Viðbót 17.9. Enn heldur Höfn í Hornafirði, af öllum stöðvum, að mæla flesta daga minnsta lágmarkshita á kvikasilfursmæli á landinu. Þessar mælingar sýna svona fimm stig lægra en  sjálfvirki mælirinn á staðnum og eru auk þess í engu samræmi við hitafarið annars staðar á suðausturlandi og það sem venjan segir að búast megi við á stað eins og Höfn á þessum árstíma  í því veðurlagi sem ríkt hefur. En svona hefur samt þetta gengið allan mánuðinn.

 

Athugasemdir

[DoctorE (IP-tala skráð) 16.9.2009 kl. 22:32]

Alltaf gott að demba sér í veðurumræður inn á milli

[Sigurbjörn Sveinsson, 16.9.2009 kl. 22:38]

Nú er bara spurningin hvort krossnefurinn gerir sér hreiður um eða eftir áramót. Sú vangavelta er í raun makalaus en að öllu leyti í takti við náttúruna.

[Sigurður Þór Guðjónsson, 16.9.2009 kl. 22:42]

Smá bloggleyndó: Ég er mjög meðvitaður blogari og nota stundum veðurfærslur einmitt til að lægja öldur sem farnar eru að rísa hátt á blogginu!

[Sigurbjörn Sveinsson, 16.9.2009 kl. 22:47]

Nettop!

[Kama Sutra, 16.9.2009 kl. 23:05]

Líkt og ísköld sturta eftir hot og steamy sex... 

[Sigurður Þór Guðjónsson, 16.9.2009 kl. 23:09]

Kama Sutra ætti að vita það!

[DoctorE (IP-tala skráð) 17.9.2009 kl. 10:24]

Ég gæti nú æst málin smá í þessu veðurtali með því að fara að skammast út í veðurguði

[Sigurður Þór Guðjónsson, 17.9.2009 kl. 10:39]

Ef þú ferð að atast í veðurguðunum Doksi skaltu eiga mig á fæti!

[DoctorE (IP-tala skráð) 17.9.2009 kl. 12:20]

Ef trúarbrögð væru með veðurfréttir ;)

[Kama Sutra, 17.9.2009 kl. 17:24]

Dokksinn hittir í mark eins og venjulega. 

[Áskell Örn Kárason (IP-tala skráð) 17.9.2009 kl. 18:32]

Fátt er ljúfara en milt haustveður. Við Norðlendingar kvörtum ekki, þótt stundum hafi blásið fullmikið af suðvestri. En örvæntið eigi, Sunnlendingar! Eg man 13-15 stiga hita í okt-nóv og indælt faðmlag við haustfagra náttúru í svo mildu veðri. Það kemur, veriði viss!

[Sigurður Þór Guðjónsson, 17.9.2009 kl. 19:32]

Það er ekkert víst að komi svona dagur í Reykjavík héðan af. Í fyrra gerðist það ekki.