Ekki neitt blíðskaparveður

Í morgun var alhvít jörð í fyrsta sinn í haust á nokkrum veðurathugunarstöðvum á láglendi. Mest var snjódýptin 12 cm í Steinadal  inn af Kollafirði á Ströndum en einnig var alhvítt  innst í  Steingrímsfirði og á einum stað við Ísafjarðardjúp.

Ansi er þetta snemma og ansi er þetta vondur endir á góðu sumri. Þessi september hefur reyndar verið ósköp leiðinlegur á suðurlandi. Sólarlítill og hryssingslegur og ætlar að enda illa. Þegar upp verður staðið er vafasamt hvort hann nái hitameðaltali áranna 1931-1960 en hann nær meðaltali  áranna 1961-1990 en það meðaltal er eiginlega orðið út í hött fyrir veðurfar nútímans.

Á mánudag verður bjart veður um land allt en einungis fárra stiga hiti um hádaginn. Ásdís Auðunsdóttir veðurfræðingur kallaði það ''blíðskaparveður'' í sjónvarpsspánni í gær. Það finnst mér ekki viðeigandi lýsing. Mér finnst að hiti skipti líka máli þegar talað er um blíðskaparveður. Það er ekki nóg að sé kyrrt veður og stillt. Orðið blíða felur í sér mildi en ekki hörku.

Stillt og bjart veður á þessum árstíma með næturfrostum og kannski fimm stiga hámarkshita  í sólinni er ekki blíðskaparveður. Ef hitinn færi í 10 stig væri nær lagi að  tala um blíðskaparveður en fyrst og fremst ef hitinn væri enn þá meiri.

Það dettur úr manni allur sumarfílingur að fá bjartviðri í september með næturfrostum og dagshita rétt yfir frostmarki. 

Það er nánast þjófstart á haustinu og ekki blíðskaparveður fyrir fimm aura í mínum augum.

Athugasemdir

[Emil Hannes Valgeirsson, 25.9.2009 kl. 22:58]

Þetta er nú meiri gusturinn. Haglél og læti.

[Sigurður Þór Guðjónsson, 25.9.2009 kl. 23:12]

Algjör viðbjóður. Forsmekkurinn að Hreggviði, harðasta vetri í manna minnum sem er að fara að skella á! 

[Sigurbjörn Sveinsson, 26.9.2009 kl. 01:07]

Mokaði mig í gegnum skafla á Svínadal vestri í október 1980. Eftir það komu sjö harðir vetur.

[Sigurður Þór Guðjónsson, 26.9.2009 kl. 09:49]

Í alvöru talað þá voru árin kringum 1980 sérlega köld og veturnir frá 1975 og áfram í mörg ár alveg einstaklega. Það er ekki líklegt, miðað við stöðu mála, að eitthvað ámóta sé í uppsiglingu.

[Svavar Alfreð Jónsson, 26.9.2009 kl. 09:55]

Hér fyrir norðan blása viðskotaillir vindar. Á slíkum dögum er upplagt að elda kálfakjöt. Það ætla ég einmitt að gera í kvöld. Þá býð ég upp á soðinn kálf í túnfisksósu. Það hefði nú ekki verið amalegt að geta boðið þér í mat.

[Sigurður Þór Guðjónsson, 26.9.2009 kl. 10:29]

Sama og þegið.

[áskell örn kárason (IP-tala skráð) 28.9.2009 kl. 17:01]

Mér finnst þú full prinsippfastur þarna, Sigurður. 5 stig með sól og logni er gott veður til útivistar. Þannig er það hér á Akureyri í dag: pollurinn spegilsléttur og fullur af haustlitum úr hlíðum Vaðlaheiðar. Þetta eru blíð sköp frá mínum bæjardyrum séð.

[Sigurður Þór Guðjónsson, 4.10.2009 kl. 01:03]

Þetta er ekki nein prinsippfesta. Ég er að tala um ákveðið veðurlag, hlýja haustdaga sem stundum koma. Ekki neita ég því að það sé gott og fallegt haustveður t.d. í dag en það er bara annars konar veður en ég hef í huga, ég á við haustdaga sem fyrir hita sakir gætu gengið sem sumardagar. Slíkir dagar koma þó nokkuð oft seint i september og jafnvel fyrst í október og eru allt annar veðurflokkur en veðrið sem nú er. Það fylgir þeim ekstra sjarmi. En sá sjarmi kemur ekki nema í sumum árum. Hins vegar er þetta kuldakast nokkuð hastarlegt eftir árstíma og ekki dæmigert fyrir árstíðina þó annað eins gerist auðvitað stundum.