Fyrstu og síðustu frost og snjóar í Reykjavík

Fyrsta frost á þessu hausti í Reykjavík mældist að kvöldi 3. október. Samkvæmt skráningarreglum Veðurstofunnar verður það bókað 4. október. Síðasta frostið í vor kom 25. apríl. Frostlausi tíminn hefur  því varað í 161 dag. 

Alautt varð til frambúðar svo snemma í vor sem 31. mars en alhvítt varð fyrst í haust 6. október. Dagarnir þarna á milli eru 188.

Skráningar á síðustu vorfrostum og fyrstu haustfrostum eru til fyrir Reykjavík árin 1880 til 1903  eftir sírita og frá stofnun Veðurstofunnar 1920 og er þá farið eftir kvikasilfursmælingum. 

Skráningar á því hve nær alautt verður að staðaldri á vorin og fyrst alhvítt á haustin eru til samfelldar frá því 1924. Einstaka sinnum hefur það gerst að dagar koma flekkóttir af snjó áður en fyrst verður alhvítt á haustin en þetta eru aðeins fáein tilvik sem hér verða ekki rakin.

Meðaltal síðasta frosts að vori árin 1961 til 1990 er 14. maí en fyrsta frosts að hausti er 5. október. Frostlausi tíminn er því 143 dagar. Meðaltal dagsins sem fyrst verður alautt að vori er 24. apríl en fyrst verður alhvítt að meðaltali 7. nóvember. Dagarnir þarna á milli eru 196.

Árin 1931 til 1960 voru samsvarandi dagsetningar 10. maí og 6. október með frostin en 20. apríl og 6. nóvember með snjóinn. Þarna munar meira að vori en hausti. Frostlausu dagarnir voru 148 en snjólausu dagarnir 199.

Á árunum 1880-1903 voru síðustu frost á vorin að meðaltali 22. maí en fyrstu haustfrost  25. september. Frostlausi tíminn var 125 dagar, 18 dögum færri  en 1961-1990 og 23 dögum færri en á hlýindaskeiðinu 1931-1960.

Fyrsti haustssnjór í Reykjavík árið 2005, 29. október. 

Síðan Veðurstofan var stofnuð árið 1920 hefur frostlausi tíminn lengstur verið árið 1939, 201 dagur, frá 23. apríl til 9. nóvember. Næst koma árin 1941, 186 dagar og 1959 og 1991 með 174  daga. Fæstir hafa frostlausu dagarnir verið 102 árið 1927, sem samt var gott ár, 103 dagar 1962 og 105 dagar 1952. 

Síðasta vorfrost hefur fyrst orðið 3. apríl árið 1974 en síðast 7. júní árin 1927, 1936, 1977 og 1997.

Fyrsta haustfrost sem komið hefur var reyndar svo snemma sem 27. ágúst 1956, en næst fyrst 4. september 1982 og 10. september 1965 en hins vegar ekki fyrr enn 10. nóvember 1939. Það ár er í eina skiptið sem ekki hefur komið frost fyrr en í nóvember í Reykjavík frá stofnun Veðurstofunnar en líklega gerðist það þó einnig árið 1915. Aðeins einu sinni, náttúrlega 1939, hefur hvorki frosið í maí og október eða nokkrum mánuði þar á milli. Næstu dagsetningar á eftir 1939 eru 28. október 1959 og 1976 og 27. október 2001.  

Snjólausir dagar milli vors og hausts voru flestir 248 árið 2000 en 243 árin 1955 og 1995, en fæstir hafa þessir dagar verið 121 árið 1926, 152 1929, 158 árið 1967, 159 árið 1944 og 165 dagar 1969 og 1935.

Síðast að vori sem jörð hefur orðið alauð er 29. maí 1949, en þá var reyndar aldrei talin alhvít jörð í maí heldur aðeins flekkótt,  og 21. maí 1979 en fyrst 23. mars 1928, 25. mars 1955, 26. mars 1939  og 31. mars á þessu ári. Síðasti dagur á vori sem jörð hefur verið talin alhvít í Reykjavík er 16. maí 1979. 

Jörð hefur fyrst orðið alhvít að hausti í Reykjavík 9. september 1926, 26. september 1954, 28. september 1924 og loks 30. september 1969. Ekki hefur orðið alhvítt í öðrum septembermánuðum en þessum eftir að Veðurstofan var stofnuð. Einstaka sinnum er vel liðið á veturinn þegar koma fyrstu snjóar. Svo virðist sem fyrsti alhvíti dagur að hausti árið 1933 hafi ekki komið fyrr en 18.  desember en frá 1949 gerðist það 16. desember árið 2000 og 10. desember 1976. 

Á árunum 1880 til 1903 mældist síðasta vorfrost seinast 7. júní árin 1881 og 1885 en árið 1889 kom síðasta vorfrostið 27. apríl. Fyrsta frost að hausti kom 2. september 1894 og 1897 en ekki fyrr enn 6. október 1902.

Jóns Þorsteinsson mældi með hámarks-og lágmarksmælum í Reykjavík frá því í júlí 1829 og síðasta haustið hans var 1853. Þó þessar mælingar séu kannski ekki sambærilegar við yngri mælingar er samt fróðlegt að sjá að hann mældi síðast vorfrost 11. júní 1848. Það er síðasta dagsetning sem hægt er að finna eftir mælingum með frost að vori í Reykjavík. Árið 1845 kom síðasta vorfrostið hins vegar 14. apríl. Fyrsta haustfrost mæld Jón 4. september 1841 en árið 1830 ekki fyrr enn 26. október.

Í fylgiskjali við þessa færslu má sjá dagsetningar við síðustu vorfrost, fyrstu haustfrost, fyrsta alauðan dag að vori og fyrsta alhvítan dag að hausti í Reykjavík. Fyrir árin 1920-1923 eru snjóatölurnar  óáreiðanlegar og eiginlega ágiskun, þó út frá nokkrum líkum, og eru hér settar inn sem utan dagskrár efni. Útgildi  í  töflunni eru svartletruð og því auðvelt að finna þau. Villur geta leynst  í þessu og verða leiðréttar þegar upp um þær kemst. 

 

 

Skrár tengdar þessari bloggfærslu:

• frosti.xls

Athugasemdir

[Emil Hannes Valgeirsson, 11.10.2009 kl. 22:31]

Búinn að lesa. Snjómælingar á Veðurstofunni eru væntanlega gerðar að morgni klukkan 9. Samkvæmt mínum frumstæðu skráningum sem gerðar eru á miðnætti voru 237 alauðir dagar frá vori til hausts árið 2000. Þ.e. frá 24. mars til 16. nóvember. Eftir 16. nóvember varð jörð næst hvít um miðnætti þann 15. desember eftir mikinn úrkomudag.

[Einar Sveinbjörnsson, 12.10.2009 kl. 11:20]

Enn ein afar gagnlega samantekt þín  Sigurður Þór !

Yfir lengri tíma, þ.e. áratugi gefa upplýsingar um, sérstaklega fyrsta og síðasta frost ágæta tilhneigingu umveðurfarssveiflur.  Snjórinn vitanlega líka.  En muna verður þarna að vinna með meðaldagsetningar yfir lengri tíma !

ESv 

[Sigmar Þór Sveinbjörnsson, 14.10.2009 kl. 18:20]

Heill og sæll Sigurður Þór, þetta er fróðleg lesning. Mér datt í hug eftir að hafa lesið þennan pistil þinn hvort það sé til á veðurstofu Íslands samantekt á mannskaðaveðrum sem komið hafa yfir landið, og þá hvort haldið er ská um þau slys sem þau valda. Og í framhaldi af því hvort hægt er að komast yfir slík gögn ef þau eru til.

kær kveðja Sigmar Þór Sveinbjörnsson

[Sigurður Þór Guðjónsson, 14.10.2009 kl. 18:52]

Í mánaðarriti Veðurstofunnar, Veðráttunni, er alltaf sagt frá ofviðrum í hverjum mánuði og skaða sem af þeim hlýst. En ég veit ekki hvort hún telur allan mannskaða, en öll stærri slys. Sérstök skrá um þetta eingöngu held ég nú að ekki sé til.

[Sigmar Þór Sveinbjörnsson, 14.10.2009 kl. 20:39]

Heill og sæll Sigurður Þór og takk fyrir þetta svar. Það sem ég er að fiska eftir eru aðalega slys á sjómönnum eða skipstapar.

kær kveðja

[Sigurður Þór Guðjónsson, 14.10.2009 kl. 21:17]

Skiptapar eru mjög áberandi í Veðráttunni.