Gagnatorgið og Veðurstofan

Upplýsingar frá Gagnatorgi  hafa nú legið niðri í nokkra daga vegna lagfæringa á gagnatenginu við Veðurstofuna.

Ég hef áður sagt að þessi gagnagrunnur sé ekki sérlega notendavænn fyrir venjulegt fólk, sem hann á samt að þjóna að hluta til, samkvæmt kynningu á vefnum og þyrfti skýringa við.  En rétt er þá að geta þess að hann verður manni nokkru ljósari þegar farið er að rýna í hann. Langt er þó frá því að hann sé augljós

Og þarna er auðvitað mikið af merkilegum upplýsingum sem allt í einu eru almenningi tiltækar sem er alveg frábært. 

Gagnatorgið hefur reyndar fengið mig til að hugsa ýmislegt og kannski eru sumar þeirra hugsana ekki sérlega fallegar!

Gagnatorgið er á vegum Reiknistofu í veðurfræði. Það er hlutafélag í einkaeigu. Hið sama er að segja um Data Market sem einnig kemur að málinu.

Ég spyr sjálfan mig hvernig á því stendur að slíkt einkafyrirtæki geti farið inn í gagnagrunn Veðurstofu Íslands, sem er ríkisstofnun og rekin fyrir skattfé landsmanna. Á hvaða forsendum getur Reiknistofan þetta? Það eru að vísu veðurfræðingar og kannski fleiri vísindamenn sem reka fyrirtækið en gefur það eitt og sér þeim rétt til að kynna gagnagrunn í eigu ríkisstofnunar fyrir hverjum sem er?

Getur fyrirtækið tekið upp á því að krefja notendur um greiðslu fyrir aðgang að gagnagrunni Veðurstofunnar gegnum Gagnatorgið?

Og loks hef ég verið að hugsa þetta sem lokkandi hugsun númer eitt:

Úr því einkafyrirtækið Reiknistofa í veðurfræði fær aðgang að gagnagrunni Veðurstofu Íslands má ég þá ekki alveg eins, sem heljarinnar einkaveðurnörd, fá milliliðalausan aðgang að honum?

Og ef ekki, hvers vegna þá?

Ég er að hugsa um að láta á þetta reyna með formlegri fyrirspurn til Veðurstofunnar.

Tek samt fram að ég er ekki vanur að vera með vesen af  neinu tagi og aldrei verið með frekju gagnvart opinberum stofnunum.

Mér finnst bara áhugavert að banka á þessar dyr og vita hvað gerist, hver svörin verða hver sem þau verða.

 

 

Athugasemdir

[Sæmundur Bjarnason, 24.10.2009 kl. 16:56]

Mér finnst alveg gráupplagt að þú prófir þetta. Og þetta leiðir hugann að ýmsum öðrum gagnagrunnum. Ef allskyns félög geta fengið aðgang að þeim, því þá ekki hver sem er? Kannski er þetta alveg sjálfsagt mál þó einhver skilyrði hljóti að fylgja.