Byltingin er hafin!

Jæja. Þá er komið að því sem legið hefur í loftinu. 

Að byltingin byltist yfir.

Mótmælendur í Seðlabankanum harðneita að fara nema Davíð fari. En Davíð vill ekki fara og Geir Haarde mun ekki láta hann fara.

Það er því tímaspursmál hve nær lögreglan lætur til skarar skríða. Og mótmælendurnir munu taka hraustlega á móti.

Kylfur á  lofti og piparúði! Slysavarðstofan!

Geir Jón mun verja allar aðgerðir lögreglunnar með hnúum og hnefum. Jafnvel þó þeir drepi einhvern.

Forsætisráðherra og seðlabankastjóri munu æpa um skríl. Það síðasta sem þeim dettur í hug er að líta í eigin barm. 

Verði einhverjir mótmælendur handteknir og ákærðir munu þeir samstundis verða þjóðhetjur.

Og þá er garanterað að næsta aksjón mótmælenda verður að taka forsætisráðherrann og seðlabankastjórann í rúmum sínum með bareflum og eiturúðum.

Byltingin er hafin!   

Enginn hefur verið handtekinn

Íslensk tunga á best við í íslenskum tölvum. Hvað menn athugi!

Ég á tvær tölvur og er önnur með ensku á stýrisumhverfinu en hin íslensku. Ekki ber ég það saman hvað íslenskan er viðkunnanlegri og sjálfsagðari. Reyndar líka skiljanlegri.

Samt hef ég heyrt mikla tölvumenn segja að það sé "betra" að hafa þetta á ensku. Engin rök hef ég þó heyrt fyrir því.

Ég held að þessi auðmýkt fyrir enskunni hvað tölvurnar varðar sé sambland af hugsunarleysi, vantrú á íslenskunni og hreinlega undurlægjuhætti gagnvart enskunni. Mönnum finnst fínna að hafa þetta allt á ensku en hálf hallærislegt á íslensku.

Eins og enskt tölvumál er nú leiðinlegt.

Mér finnst líka hvimleitt hve margir birta óþýddar langar tilvitnanir á ensku á bloggsíðum sínum. En auðvitað ekki á dönsku, þýsku eða búlgörsku. Allt skal á ensku vera!

Ég held fram málstað íslenskunnar á öllum sviðum. Það er málið sem við hugsum á og ef við getum ekki orðað hugsanir okkar á móðurmálinu er þess ekki að vænta að við getum orðað þær á nokkru öðru máli.

Innan við fimmtungur velur íslensku

Athugasemd

Meðan ég var í mínu riterementi gerðist mér sú skráveifa í bloggkerfinu, eða ég hef gert hana í einhverju óráði, að athugasemdakerfið lokaðist í þeirri stöðu að leyfa ekki athugasemdir fyrr en ég væri búinn að samþykkja þær.

Og nú er ég í óðaönn að opna fyrir athugasemdirnar og verð að gera það handvirkt fyrir hverja og eina. En ég geri nú samt engar athugasemdir við það. Mest þykir mér til koma þær snjöllu athugasemdir sem komu við hina stórbrotnu greinargerð um Efnisyfirlit yfir veðurfærslur, helsta stolt og réttlætingu þessarar dæmalausu bloggsíðu.  

Je, ræt!   

Hysterískir aðdáendur mínir nær, en þó einkum fjær, ættu því endilega að droppa hér inn á næstunni til að skoða allar frábæru athugasemdirnar, að ekki sé minnst á athugasemdirnar við athugasemdirnar, en þó fyrst og fremst athugasemdirnar við athugasemdirnar við athugasemdirnar.

Hefur svo einhver nokkuð við þetta að athuga?