Burt með þá báða!

Geir Haarde forsætisráðherra hefur setið á fundi með lögreglunni og áreiðanlega gefið fyrirmæli um það hvernig taka skuli á mótmælendum.

''Geir sagði að lögreglunni bæri að vernda borgarana og hún væri að sinna hlutverki sínu afar vel. Hann tekur ekki undir gagnrýni um að lögreglan hafi gengið of hart fram í störfum sínum.''

Hann tekur þarna í sama streng og dómsmálaráðherra. Þeir vita báðir ósköp vel að nú er lögreglan fyrst og fremst að vernda hagsmuni ráðandi afla, ríkisstjórnin situr nú einungis í skjóli lögregluvalds eins og Stefanía Óskarsdóttir stjórnmálafræðingur bendir á. Báðir neita því að lögreglan hafi gengið of langt þrátt fyrir fjölda vitnisburða venjulegs fólks um að svo hafi verið.

Báðir gefa skít í þjóðina. Báðir gefa skít í allt nema eigin völd. 

Enginn bjóst svo sem við öðru.

Báðum þessum gaurum ber að velta úr sessi sem  allra fyrst.

Niður með valdsstjórnina!

Það fór eins og ég sagði í síðasta bloggi að einu aðgerðir ríkisstjórnarinnar við mótmælunum, kröfu fólks um kosningar, aðgerðir gegn fjárglæpamönnum og mörgu fleiru, yrðu þær að efla lögregluna og viðbúnað hennar. Björn Bjarnason dómsmálaráðherra segir það einmitt í dag: 

''Ef að mótmæli verða harðari og mótmælendur einbeittari í því að brjóta á bak aftur valdsstjórnina þá þarf að útbúa hana þannig að hún geti tekist á við það viðfangsefni, bæði með tækjum og mannafla."

Þetta skilst alveg. Dómsmálaráðherra er það efst í huga að berja á mótmælendum af enn meiri hörku en var í gær. Hann segir um aðgerðir lögreglunnar; ''að lögreglan hafi haldið afar vel á málum og neyðst til að grípa til aðgerða sem hann vilji helst ekki að gripið sé til hér á landi.''

Það er samdóma álit allra þeirra sem blogguðu um þessa atburði í gær, bæði á Moggablogginu og annars staðar, svo og eftir vitnisburði manna í fréttaviðtölum í sjónvarpi, að lögreglan hafi upphafið ofbeldi fullkomlega af tilefnislausu. 

Björn Bjarnason er því hreinlega að ljúga framan í þjóðina um ástæurnar fyrir aðgerum lögreglunnar. Hann hlustar heldur ekki á þjóðina af því að hann skynjar  hana ekki . Hann fyrirlítur þjóðina en skynjar einungis hagsmuni þeirrar valdastéttar sem hann er hluti af. Og hugur hans fer ekki framhjá neinum. Hann ætlar að svara kalli þjóðarinnar um kosningar og um einhverjar aðgerðir gegn stórglæpamönnum sem vaða uppi með dólgshætti og hroka með enn meira ofbeldi. Vopnuðu ofbeldi sem getur drepið.

Þetta er það sem hann er að boða í reynd ef mótmælunum verður haldið áfram.

Mótmælunum mun verða haldið haldið áfram. Það skal hann vita. Mótmælunum veðrur haldið áfram þangað til að hann og aðrir þeir sem gerðu landráðamönnunum kleyft að fremja landráð sín og hafa haldið hlífiskildi yfir þeim í reynd til þessa dags hafa lagt niður völd. 

Mótmælendur ættu að setja dómsmálaráðherra algjörlega í herkví. Gera honum ókleyft að mæta í  vinnuna til að skipuleggja stríð sitt gegn þjóðinni.

Taka hann úr sambandi. 

Og þannig á að afgreiða alla ráðherra ríkisstjórnarinnar, hvern af öðrum. Þingfundi hefur nú verið aflýst. Það er gott. Mótmælin eru farin að hafa alvöru áhrif. Það er ekkert gagn af þessu skrípalega þingi. 

Það má ekki gefa valdsstjórninni neinn vinnufrið af því að við viljum ekki þessa stjórn. 

Niður með valdstjórnina!

 

Lögreglan hefur gefið tóninn fyrir áframhaldið

Lögreglustjórinn í Reykjavík sagði í Kastljósi að lögreglan hafi sýnt óvenju mikla þolinmæði við mótmælendur hingað til en í dag hafi þeir gengið of langt.

Þetta stangast alveg á við frásagnir þeirra sem voru á staðnum, bæði í sjónvarpinu og á blogginu, eins og til dæmis Ómars Ragnarssonar.  Þeir segja að lögreeglan hafi gengið fram af fátæma fantaskap án raunverulegs tilefnis. 

Auðvitað gátu menn sagt sér það sjálfir að lögreglan myndi skapa þessar aðstæður og réttlæting lögreglustjórans var eins og tekin beint úr lélegustu bloggunum ef ekki bara frá þeim allra lélegasta í þjóðfélaginu, sjálfum forsætisráherranum.

En lögreglan er búinn að gefa tóninn fyrir framhald mótmælanna. Þau verða hörð og ofbeldisfull og jafnvel blóðug. 

Látum ekki blekkjast af orðum lögreglustjórans um að lögreglan sá einungis að gæta laga og réttar. 

Lögreglan er búinn að sýna sitt rétta andlit.

Þó hlutverk hennar sé að halda uppi lögum og reglum meðan allt leikur í lyndi í þjóðfélaginu þá breytist hlutverk hennar við aðstæður eins og þær sem nú ríkja. Hún verður þá fyrst og fremst varðskjöldur  hinna óhæfu stjórnvalda og mun beita valdi sínu vægðarlaust í þeirra þágu.

Almenningur á ekki að láta þessi ofbeldisöfl kúga sig.

Hann á að margeflast í mótmælunum.

Láta hart mæta hörðu. 

En ekki mega mótmælendur fyllast bjartsýni og halda að það verði neinn leikur að fá stjórnina til að gera einhverjar breytingar. Það sem stjórnin mun gera á næstu dögum verður fyrst og fremst það  að efla viðbúnað lögreglunnar og ef fram heldur sem horfir mun koma til meiri átaka, menn munu verða handteknir og ákærðir, ekki fyrir brot á lögreglusamþykkt heldur fyrir meint alvarlegri brot og þeir munu verða dæmdir og settir í fangelsi. Bæði lögreglan og dómstólar munu ganga í lið með valdinu þegar  á reynir. Það er eitthvað að gerast, eitthvað óskipulegt og sprengjufimt, eittvað sem á sér enga hliðstæðu í í íslensku þjóðlífi en á uppsprettu í þjóðardjúpinu. Valdastéttin er farinn að óttast. Og hrædd valdastétt er til alls vís. Þessi ríkisstjórn mun ekki lyppast niður. Hún mun fyrst og fremst verja sig og þau hagsmunaöfl sem hún er fulltrúi fyrir. Hún mun ekki hika við að reyna að kæfa mótmælin niður með hörku. 

Mótmælendur verða að gera sér grein fyrir þessu. Þeir eiga að halda  áfram mótmælum allan sólarhringinn dögum saman, skipuleggja mótmælavakt sem aldrei linnir, vera alltaf með hávaða,  teppa götur sem ráðherrar fara um, varna þeim að komast inn í stjórnarráðin eða út úr þeim. Og mótmælendur eiga að mæta með grímur því ástæða er fyrir einstaklinga  í mótmælum að óttast lögregluna. Hún mun héðan í frá einskis svífast því hún er ekki lengur gamla góða löggan heldur hefur breyst í raunverulega lífvarðarsveit ríkisstjórnarinnar. 

Aðgerðir lögreglunnar í dag sýna það.

Mótmælendur eiga engan grið að gefa, þeir eiga að mótmæla allan sólarhringinn i marga daga stanslaust, skiptast á vöktum og gefa ekki eftir.

Fólk hefur engu að tapa lengur en allt að vinna að koma þessari spillingarstjórn frá völdum.   

 

 

2009

Gleðilegt ár! Ég ætla að halda mér saman á þessu ári!