Hvur skollinn

Vefsíðu Kristinna stjórnmálasamtaka var lokað í einn dag en hefur hefur nú verið opnuð aftur en tvær  greinar sem þar voru um uppeldis-og fjölsyldumál hafa verið teknar út.

Hver andskotinn ætli hafi verið á seyði?

Eru nú sjálf Kristin stjórnmálasamtök farin að skrifa svo ókristilegar greinar um uppeldis-og fjölskyldumál að þær eru ekki birtingarhæfar.

Svo bregðast  krosstré.

 

Heitstrengin

Héðan í frá ætla ég að vera góði strákurinn.

Engu nær

Menn urðu engu nær af að hlusta á tvo af mestu þverhausum landsins tala um loftslagsmálin í Kastljósi.

Svona uppákoma þjónar engum tilgangi. 

 

Ótrúverðug rannsókn

Formaður loftslagsnefndar Sameinuðu þjóðanna vekur ekki upp vonir um að rannsókn nefndarinnar á ''fölsunum'' vísindamanna um niðurstöður rannsókna verði trúverðug. Hann var áður búinn að segja að nefndin myndi rannsaka ásakanirnar til hlítar.

Eftir þessi orð hans munu fáir nema sanntrúaðir leggja trúnað á heiðarleika rannsóknarinnar. 

Hann er búinn að setja tóninn.

Rannsóknin verður líklega bara réttlæting og kattarþvottur.

 

Pachauri gagnrýnir tölvuþrjóta

Fyrirgefning og sátt

Ég spurði um daginn í gamni á Fasbókinni hver væri lélegasta bókin um þessi jól.

Nú er ég í alvöru búinn að finna svarið. Það er bókin ''Fyrirgefning og sátt'' sem Skálholtsútgáfan gefur út.

Hún er ámáttlegasti þvættingur sem ég hef lesið.

 

Opið bréf til umsjónarmanna blog.is frá Nimbusi og Mala

Í morgun, meðan Nimbus var yfir bloggsíðunni sinni, gerðist það að frábærar kattamyndir sem  ágætur maður hefur sent margar inn á síðuna hurfu allar sem ein.

Þessar myndir voru í okkar augum ein höfuðprýðin á þessari síðu.  Eins og þeir sem lesa bloggið  vita og þeir eru oft margir þegar Nimbus nennir að sinna því almennilega, er hann mikill kattaunnandi og hefur heimiliskötturinn hans, monsjör Mali the malicious, sem með honum skrifar þetta bréf, verið á margan hátt einhvers konar einkennismerki síðunnar. Umræddar kattarmyndir hafa stílað upp á þetta af mikilli snilld.

Þær hafa sett hlýlegan og vinalegan blæ á bloggið okkar. 

Þeirra er sárt saknað, ekki bara af okkur, heldur áreiðanlega líka af sumum okkar  lesendum  sem kunna að meta eitthvað annað á bloggsíðum en endalaust nagg og nöldur um kreppuna og icesave.

Eftir brottfall þessara mynda er bloggsíða okkar ekki söm og áður. Monsjör Mali tekur ekki á heilum sér og er alveg hættur að mala vegna sorgar yfir því að  verða að sjá á bak öllum þessum góðu bloggvinum sínum.

Við gerum ráð fyrir að umsjónarmenn blogg.is geti skýrt út  fyrir okkur hvers vegna myndirnar hurfu af bloggsíðuni og er hér með vinsamlega um þær skýringar beðið.

En fyrst og fremst hvort þess sé ekki að vænta að þær birtist aftur í öllum sínum vinalegu skemmtilegheitum. Þá verður aftur bjart og hlýtt á bloggi.

Með bestu kveðjum 

Nimbus og Mali the malicious.

 

 

Hið góða

Er ekki hægt að kynnast hinu góða og iðka hið góða nema í gegnum guðstrú?

Hvað segja þeir sem allt vita um það? 

Spá

Gæti trúað að þetta verði kaldur og snjóasamur desember sem muni draga árshitann verulega niður.

Annars má ég hundur heita. 

 

Íslensku bókmenntaverðaunin. Fræðibækurnar

Þessar fræðibækur hafa verið nefndar til íslensku fræðibókaverðlaunanna:

Helgi Björnsson: Jöklar á Íslandi, í útgáfu Opnu
Kristín G. Guðnadóttir: Svavar Guðnason, í útgáfu Veraldar
Árni Heimir Ingólfsson: Jón Leifs – líf í tónum, Mál og menning gefur út
Jón Karl Helgason: Mynd af Ragnari í Smára, Bjartur gefur út
Þórdís Elva Þorvaldsdóttir: Á mannamáli. Ofbeldi á Íslandi, JPV gefur hana út.

Ég hef lesið allar þessar bækur nema bókina um Svavar sem ég hef þó gluggað í talsvert  og  sýnist hún vera meiriháttar. Er reyndar ekki búinn með jöklabókina.

Að mínum dómi er Á mannamáli ekki í sama gæðaflokki og hinar bækurnar.  Ég held að menn séu fyrst og fremst að sýna málefninu virðingu með því að tilefna þá bók.  

Ég tel að það sé að öðru leyti óvenju erfitt að gera upp á milli tilnefndra bóka.  

Gaman væri ef harðsvíruð raunvísindabók, Jöklar á Íslandi, hlytu verðlaunin. Tala nú ekki um ef jöklarnir eru á síðasta snúningi. En ætli fræðirit um jökla eigi minnsta séns á við jafn virðuleg fyrirbæri  og ævisögur mikilsmetinna listamanna?

Ætli það verði ekki annað hvort Svavar eða Jón Leifs en þó fyrst og fremst Ragnar í Smára.

Hún er svo andskoti skáldskaparleg! 

 

Ekki mátti tæpara standa

Nóvember var frostlaus í Vestmannaeyjum. En í nótt fór að frjósa þar.  Klukkan þrjú í nótt sýndi sjálfvirki mælirinn fyrst frost og á sama tíma var lesið -0,1 stig á kvikasilfursmælinum. Klukkan níu sýndi lágmarksmælirinn svo að mest hafði frostið orðið -0,9 stig.

Í Surtsey var hitinn á hádegi 0,0 stig en lágmarksmælirinn hafði mælt -0,2° stig á síðustu klukkustund. Þetta er fyrsta frostið þar. 

Það mátti sem sagt ekki tæpara standa með frostlausan nóvember á Stórhöfða, Vestmannaeyjabæ og Surtsey. 

Hins vegar má ekki gleyma því að í október mældist frost bæði á Stórhöfða og í bænum þó nóvember hafi verið frostlaus. Það hefði verið meira gaman ef þar hefði ekki frosið í október en slíkt hendir stundum.

Í Surtsey er frostið sem var að mælast rétt áðan hins vegar fyrsta frostið sem þar hefur mælst í allt haust. 

Dæmi eru um frostlausan mars á veðurstöð og nú nóvember.  Syðst á landinu ætti að geta orðið  frostlaust frá því einhvern tíma í febrúar og fram í desember við allra óvenjulegustu aðstæður.