Hvað segja veðurfræðingarnir

Í tvígang hefur Spegillinn talað við jarðfræðinga um upphaf litlu ísaldarinnar. Af því að einhverjir halda því fram að risaeldgos hafi hleypt henni af stað.

Hver sem orsökin var hlýtur litla ísöldin fyrst og fremst að hafa verið veðurfarslegt fyrirbrigði.

Þess vegna undrast ég mjög að Spegillinn skuli ekki hafa spurt neinn veðurfræðing út í þetta.

 

Skrár tengdar þessari bloggfærslu:

• akrv_2012_12_0.xls

Einn vetrarmánuður eftir

Nú eru þrír af fjórum vetrarmánuðum liðnir. Desember var fremur kaldur og snjóasamur, janúar snjóþungur suðvestanlans en í hlýrra lagi yfir landið og febrúar var alls staðar snjóléttur og afar hlýr, líklega í fimmta eða sjötta hlýjasta sæti allra febrúarmánaða. 

Nú er bara að sjá hvað mars gerir. Hann byrjaði með talsverðum hlýindum.

Fylgiskjalið vaktar mánuðinn með öndina í hálsinum.

 

Skrár tengdar þessari bloggfærslu:

• akrv_2012_10_0.xls

Topp tíu febrúar í hlýindum og víða mjög úrkomusamur

Þetta hefur verið mjög hlýr febrúar. Ef hann stendur við mánaðarlok eins og hann gerir nú yrði hann sá 8. hlýjasti í Reykjavík, ásamt febrúar 1956. Á Akureyri sá fimmti hlýjasti. Og á öllu landinu líklega á svipuðu róli og á Akureyri.

Breytingar á meðalhitanum þá daga sem eftir eru af mánuðinum verða líklega ekki miklar en kannski þó örlítil lækkun en alls ekki svo mikil að mánuðurinn falli út af topp tíu listanum.

Þetta er óneitanelga nokkuð einkennilegur vetur. Fyrst kaldur og snjóasamur desember, svo snjóamikill en mildur janúar og nú afar hlýr febrúar og snjóletttur. Þá er bara að vita hvernig mars verður. Kannski kemur þá hafísinn!

Úrkoman hefur víðast hvar verið mikil. Í Reykjavík er þetta þegar orðinn sjöundi votasti febrúar þó enn séu eftir tveir dagar af mánuðinum. Á Vatnsskarðshólum í Mýrdal hefur aldrei mælst meiri úrkoma í febrúar frá 1978. Í Vík í Mýrdal er metið í hættu. Í Dölunum hefur fallið miklu meiri úrkoma en þar hefur nokkru sinni verið mæld á veðurstöðvum í febrúar.

Austast og norðaustast á landinu hefur úrkoman hins vegar verið í minna lagi.

Fylgiskjalið stendur sína pligt. Mars er komin inn. 

Skrár tengdar þessari bloggfærslu:

• akrv_2012_9_0.xls

Er Golfstraumurinn að leggjast frá ströndum Evrópu

Nú er þeim hlýindum er einkennt hafa þennan febrúarmánuð að ljúka. Meðalhitinn eftir gærdaginn er 3,7 stig yfir meðallagi í Reykjavík en 6,5 stig á Akureyri. Þar og á Egilsstöðum, að ekki sé talað um Hornafjörð þar sem meðalhitinn er um fimm stig, er meðalhitin hærri í beinum tölum en hér í lastabælinu Reykjavík. Hiti hefur einhvers staðar komist í tíu stig eða meira alla dagana nema fjóra og meðaltal hámarkshita á landinu er 11,5 glæsistig. 

Úrkoman er þegar komin yfir meðaltal alls mánaðarins í Reykjavík og á nokkrum öðrum stöðvum á suður og vesturlandi.  Í morgun var í höfuðborginni talin alhvít jörð í fyrsta sinn í mánuðinum en snjódýyptin var aðeins 1 cm. Bráðum fer sólin að skipta máli með að bræða svo lítinn snjó.   

Það er sem sagt að koma kuldakast. Og það má auðvitað spyrja hvort Golfstraumurinn sé virkilega að leggjast frá ströndum Evrópu! 

En mesta furða er nú hvað sú umræða er orðinn gömul og þreytt.

 

Skrár tengdar þessari bloggfærslu:

• akrv_2012_8_0.xls

Febrúarhitamet á Teigarhorni - Snjór í Alsír

Í nótt milli klukkan eitt og tvö fór hitinn í 14,8 stig á sjálfvirku stöðinni á Teigarhorni við Berufjörð á Austfjörðum. Þarna var mönnuð veðurarhugunarstöð alveg frá því 1873 og þar til fyrir skemmstu. Á kvikasilfursmæli mældist þar hæst í febrúar 13,8 stig þann fyrsta árið 1934.

Þetta verður því að teljast nýtt og glæsilegt  hitamet í febrúar á þessari fornfrægu veðurstöð.

Ekki hafa önnur mánaðarhitamet komið á stöðvum sem lengi hafa athugað.

En sums staðar annars en á Teigarhorni, jafnvel á óvæntum stöðum, hefur líka mikill hiti mælst. Á Fáskrúðsfirði hefur hann farið í 14,1 stig og á Grundarfirði í 13,6 stig sem er þar febrúarmet en stöðin er ekki gömul. En þetta er reyndar hærri hiti en nokkru sinni hefur mælst á öllu Snæfellsnei í febrúar, bæði norður og suður nesinu en á Snæfellsnesi er reyndar elsta veðurstöð landsins, Stykkishólmur en mælingarsagan þar fer að nálgast 170 ár.

Um ástæður þessa hita geta menn lesið í tveimur síðustu færslum meistara Trausta.  

Snjó hefur mikið tekið upp á landinu. Snjólaust er á suðaustur, suður og suðvesturlandi, meðfram sjó á austfjörðum og við Eyjafjörð og sums staðar annars staðar. Alhvítt er aðeins talið í Hnífsdal, Bolungvarvík og Ólafsfirði. Líklega er einnig alhvítt við Skeiðsfossvirkjum  í Fljótum en þaðan hafa engar upplýsingar borist í nokkra daga. 

Meðalhitinn það sem af er mánaðar er 3,4 stig yfir meðallagi í Reykajvík en 6,0 stig yfir því á Akureyri! Enn hlýrra, bæði í beinum tölum og að tiltölu,  er þó á Egilsstöðum. Og á Teigarhorni er meðalhitinn nú í beinum tölum 4,6 stig en hlýjasti allur febrúar þar hingað til var 3,5 stig árin 1932 og 1948. 

En brátt fer að kólna og má þá búast við meðaltölin hrynji niður úr öllu valdi. Febrúar 1932 var hins vegar í toppformi alla dagana og hélt sínum fimm stiga meðalhita víða á landinu til síðasta dags. 

Úrkoman í Reykjavík vantar herslumuninn upp á vera kominn upp í meðaltal alls febrúarmánaðar. Á sumum stöðvum er hún þegar kominn yfir meðallagið.

Í lokin eru hér sýnishorn af snjóakasti í febrúarbyrjun í Alsír á norðurströnd Afríku.

Getum við nokkuð kvartað! 

Viðbót í kvöld: Hitinn á Teigarhorni er dagshitamet fyrir landið frá a.m. k. 1949. Og bæði meðalhitinn og hámarkshitinn á Akureyri er líka dagshitamet þar frá sama tíma. Sjá nánar í fylgiskjalinu, heitasta fylgiskjalinu á blogginu!

Skrár tengdar þessari bloggfærslu:

• akrv_2012_7_0.xls

Hlýtt og kalt

Hér er nú ágæt hláka og snjó hefur mikið tekið upp. Hlákan heldur áfram næstu daga en svo á víst að koma útsynningur með éljum.  En varla eigum við eftir að upplifa annað eins og í desember og janúar.

Aðra sögu er að segja af Evrópu eins og komið hefur fram í fréttum. Þar er nú mikið kuldakast sem nær um alla álfuna nema  Grikkland og allra syðst á Ítalíu. Hér er kort af hitanum og fleiru í álfunni snemma í morgun.  Ef smellt er á ''large map'' fyrir neðan kortið (og líka fyrir ofan) stækkar það mjög. Ef farið er með músarbendilinn á einhverja veðustöð sjást upplýsingar um hana nokkra klukkutíma aftur í tímann, t.d. lágmarkshitinn. Kortið getur verið smástund að opinberast í öllu sínu kuldalega veldi.

Hvernig stendur á kuldanum í Evrópu? Ekki get ég lagst djúpt í skýringar en þó sagt að mikill kuldapollur  í háloftunum er yfir Eystasaltslöndum. Hann má sjá hér á myndinni sem sýnir þykktina upp í 500 hPa flötinn en kvarðinn er tiltekinn neðst á myndinni, fjólublátt er kaldast en gult og brúnt er hlýjast, en það hlýjasta á kvarðanum nær ekki inn á kortið enda er hávetur. Því meiri þynnka því kaldara er loftið í sínu skítlega eðli en kuldinn hefur orðið fjölda manns að bana. Líka sést á kortinu loftþrýstingur við sjávarmál. Við jörð hefur feiknamikil hæð verið undanfarið yfir NA-Rússlandi, sést 1056 hPa á kortinu, en lægð er nú að flækjast yfir Ítalíu. Vegna þessara veðrakerfa streyma kaldir loftstraumar frá Rússlandi yfir Evrópu allt til Spánar og lægðin við Ítalíu veldur snjókomu þar og í grennd.

Og fyrir alla muni: Þetta kuldakast hefur ekkert með gróðurhúsaáhrifin að gera, hvorki til né frá! 

Fylgiskjalið fyrir Ísland er svo á sínum stað. 

 

 

 

Skrár tengdar þessari bloggfærslu:

• akrv_2012_4_0.xls

Litla ísöldin og örsmæðar ísöldin

Merkilegt er að heyra og lesa um rannsóknina á litlu ísöldinni sem verið hefur í fréttum í dag. Hins vegar hef ég ekki enn fundið hina upprunalegu grein sem vísað er til og er fremur leiður yfir því. En ég hef ekki leitað mikið og er auk þess eitthvað sljór og lesblindur í dag. Kannski er greinin ekki á netinu en þar ætti hún samt að vera.   

Hins vegar er nú kominn febrúar og fylgikskjalið fylgist með því hvort  örsmæðar ísöldin sem hófst í desember haldi nokkuð áfram í febrúar.

 

Skrár tengdar þessari bloggfærslu:

• akrv_2012_3_0.xls

Hlý og vot nótt

Mikil hlýindi og úrkoma voru í nótt. Hitinn komst í 15,6 stig á Skjaldþingsstöðum í Vopnafirði og 14,6 á Sauðanesvita. Það er þó um það bil einu stigi frá allsherjar meti á þessum stöðvum í janúar.  Þessu fylgdi mikil úrkoma. Á Kirkjubæjarklaustri var sólarhringsúrkoman í morgun 88,8 mm sem ég held að sé met þar í janúar.

Meðalhiti mánaðarins er nú meira en hálft stig yfir meðallagi á suðvesturlandi en talsvert meira en það á norður og austurlandi. Þrátt fyrir venju fremur þrálátan snjó sums staðar er varla hægt að segja að mikið fannfergi, hvað þá vetrarhörkur, hafi verið á landinu miðað við það sem stundum hefur áður orðið.

Snjólaust er nú talið i Reykjavík og ekki er reyndar alhvít jörð víða á landinu eftir nóttina en jörð er á flestum stöðvum flekkótt. 

Það leggst nú þannig í gigtina mína að það versta sé búið! En í Evrópu er það versta rétt að byrja.

Fylgiskjalið sýnir stöðuna, líkt og venjulega, eins og  hún er nú. Blað 1 fyrir Reykjavík og landið, blað 2 fyrir Akureyri.

 

 

 

 

Skrár tengdar þessari bloggfærslu:

• akrv_2012_2_0.xls

Snjólaust í Reykjavík og hiti yfir meðallagi

Þegar janúar er hálfnaður er hitinn í Reykjavík 0,9 stig yfir meðallagi. Og í morgun var jörð þar talin alauð samkvæmt reglum en þær líta framhjá klakabunkum og snjólænum. Síðar i dag fór reyndar að snjóa. 

Það er því ekki hægt að segja að þessi janúar sverji sig alveg í ætt við desember sem sannarlega var ansi kaldur og einstaklega snjóamikill.

Framundan eru þó því miður engin hlýindi. 

Úrkoman í Reykjavík er þegar komin 17% fram yfir meðaltal alls janúarmánaðar.  

 

 

Skrár tengdar þessari bloggfærslu:

• akrv_2012_1_0.xls

Næstum því algjör merkingarleysa

Borgarstjórinn sagði í kvöldfréttum Rikisútvarpsins að við búum á Íslandi. Með því vildi hann réttlæta það ástand sem ríkir víða hvað hálku varðar í höfuðborginni. Það skal játað að erfitt er við hana að eiga þegar snjóar og snjóar meira ofan í það sem fyrir er, en þessi orð eru nákvæmlega það mesta rugl sem hægt er að segja varðandi vandamál sem stafa af veðri, þó það sé reyndar oft sagt, að við búum á Íslandi.

Það getur líka snjóað heil ósköp á Norðulöndum, Rússlandi, sums staðar í Evróu, Japan, Kóreu, Kína, Íran, Norður-Ameríku og víða annars staðar á norðlægum breiddargráðum.

Íslenskt veðurfar hefur auðvitað sín sérkenni en er samt í grundvallaratriðum ekkert öðruvísi en veðurfar á norðlægum slóðum hvað varðar vandræði af venju fremur miklum snjó og ýmsum öðrum aftökum í veðri. Mestu varðar góð og skipuleg viðbrögð. Að lýsa því yfir sem skýringu eða afsökun vegna afleiðinga veðuratburða, að við búum á Íslandi, er næstum því fullkomin merkingarleysa.

 

Skrár tengdar þessari bloggfærslu:

• akrv_2012_0_0.xls